Kɑncɑɑlɑɣɑ 4

1

2

3

4

5

6

7

8

9

10

11

12

¹Ḿpʋ́ɣʋ́ Atɑm nyǝmɑ́ ɩ ɑlʋ Ɩfɑ nɑ ɩ́lɛ́ ɩ́ lɑ́ teu nɑ ɩ́ lʋlɩ Kɑyini. Ɩlɛnɑ ɩ́ tɔ́ sɩ: Mɑ hikɑ ɑpɑlʋpǝyɑɣɑ nɑ Tɑcɑɑ toŋ.

²Pǝlɛ pǝ wɑɑlɩ kɛ́ ɩ lʋlɑ ɩ neu Apɛɛlɩ. Apɛɛlɩ kɑ kɛ́ tiikilu nɑ Kɑyini kɛ hɑ́tʋ́.

³Ḿpʋ́ɣʋ́ kʋyɑkʋ nɑkʋlɩ tɑɑlʋ lǝsɑ ɩ hɑtǝmʋtʋ tɑɑ nɑ ɩ́ lɑ́ Tɑcɑɑ kɛ kɔtɑɣɑ.

⁴Ɩlɛnɑ neu nɑ́ɑ́ kpɑ ɩ heeŋ tɑɑ kɛ́ kɑncɑɑlɑɣɑ kʋlʋlǝŋ nim nyǝŋ nɑ ɩ́ lɑ́ kɔtɑɣɑ tɔtɔ. Ɩlɛnɑ Tɑcɑɑ nyǝnɩ Apɛɛlɩ kɔtɑɣɑ nɑ pǝ́ kɛɛsǝnɑ-ɩ.

⁵Amɑ ɩ kisɑ Kɑyini nyǝŋkɑ. Tǝnɑɣɑlɛ pǝ hɑŋɑ-ɩ teu ɩsɩɩ nɔɔhǝlɛ tɑɑ kɔkɔ, nɑ ɩ ɩsɛntɑɑ sɔŋ.

⁶Ɩlɛnɑ Tɑcɑɑ pɔɔsɩ-ɩ sɩ: Pepe tɔɔ kɛ́ nyɑ́ ɩsɛntɑɑ sɔŋɑɑ?

⁷Ye kʋpɑntʋ kɛ n lɑkɩ, nyɑ́ ɩsɛntɑɑ ɩ́ hɛtɩ. Amɑ ye ɩsɑɣɑtʋ kɛ n lɑkɩ, kʋlʋmtʋ ntɩ tǝ pɑpǝnɑ ntɛɣɛ nyɑ́ nɔnɔɣɔ tɛɛ ɩsɩɩ tɔɣɔlʋɣʋ nɑ tǝ́ tɑŋɑ-ŋ, nɑ tǝ́ cɑɑ-ŋ kǝlʋɣʋ. Amɑ pǝsɩ-tɩ nɑ ń kǝlɩ-tɩ.

⁸Tǝnɑɣɑ Kɑyini tɔmɑ ɩ neu sɩ: Tǝ́ kpɑ tɑɑlɛ, ɩlɛnɑ Kɑyini kʋlɩ ɩ tɔɔ kɛ́ tǝnɑ nɑ ɩ́ kʋ-ɩ.

⁹Mpʋɣʋlɛ Tɑcɑɑ pɔɔsɑ Kɑyini sɩ: Nyɑ́ neu Apɛɛlɩ wele? Ɩlɛnɑ ɩ́ cɔ sɩ: Mɑ nyǝmɑ́ timpi ɩ wɛɛ tɔ? Mɑ kɛ́ mɑ neu tɑŋlʋ nɑ?

¹⁰Ɩlɛnɑ Tɑcɑɑ pɔɔsɩ-ɩ sɩ: Pepe lɑpɑ mpʋ? Mɑ nɑwɑ nyɑ́ neu cɑlǝm kɛ ɑtɛ, nɑ pǝ wɛɛ sɩ mɑ́ lɛɛtɩ-ŋ.

¹¹Nɔɔnɔɔ tɛtʋ kɑ́ tǝŋsɩ-ŋ mpusi kɛ́ timpi n yelɑɑ nɑ tǝ́ hɑɑ nɔɣɔ nɑ tǝ́ li nyɑ́ neu cɑlǝm kɛ nyɑ́ niŋ tɑɑ tɔ.

¹²Pɑɑ n kɑ́ hɑlɑ-tǝɣɩ ɩsǝnɑ, n kɑɑ wɑɑ pʋlʋ. N kɑ́ lɑ yem cɔɔlʋ, n kɑɑ wɛɛnɑ tǝyɑɣɑ.

¹³Mpʋɣʋlɛ Kɑyini cɔwɑ Tɑcɑɑ sɩ: Mɑ sɑlǝkɑ kǝlɑ-m.

¹⁴Nyǝnɩ, sɑŋɑ ń tɔɣɔnǝɣɩ-m tɛtʋ kʋpɑntʋ tǝnɛ tǝ tɑɑ kɛlɛ, mɑ kɑɑ tɑsɑ nyɑ́ ɩsǝpǝle tɑɑ kɛ́ loosuɣu. Mɑɑ pǝsɩ yem cɔɔlʋ, mɑ kɑɑ wɛɛnɑ tǝyɑɣɑ, nɑ wei ɩ́ hikɑ-m ɩ kʋ-m.

¹⁵Tǝnɑɣɑlɛ Tɑcɑɑ nɔɣɔ tǝkpɑʋ sɩ: Aɑɩ, ye wei ɩ́ kʋwɑ Kɑyini, ɩsɩɩ mɑ fɛlɑ pʋntʋ kɛ pǝ tɔm nɑɑtosompɔɣɔlɑɣɑ. Ɩlɛnɑ Tɑcɑɑ yʋsɩ Kɑyini sɩ ye wei ɩ́ nɑ-ɩ ɩ́ tɑɑ kʋ-ɩ.

¹⁶Ntɛnɑ ɩ́ se Tɑcɑɑ nɑ ɩ́ polo ɩ cɑɣɑ timpi pɑ yɑɑ sɩ Yemcɔɔlɑɑtɛ tɔɣɔ Ɩteni ilim tǝlɩɩlɛ tɔɔ.

¹⁷Ḿpʋ́ɣʋ́ Kɑyini nyǝmɑ́ ɩ ɑlʋ nɑ ɩ́ lɑ́ teu nɑ ɩ́ lʋlɩ Henɔkɩ. Ɩlɛnɑ ɩ́ ŋmɑ́ ɩcɑtɛ nɑ ɩ́ hɑ-tɛɣɛ ɩ pǝyɑlʋ hǝtɛ.

¹⁸Ḿpʋ́ɣʋ́ Henɔkɩ lʋlɑ Ɩlɑɑtɩ nɑ Ɩlɑɑtɩ lʋlɩ Mehuyɑyɛɛlɩ nɑ Mehuyɑyɛɛlɩ lʋlɩ Metusɑyɛɛlɩ, ɩlɛnɑ Metusɑyɛɛlɩ lʋlɩ Lemɛkɩ.

¹⁹Alɑɑ nɑɑlɛ kɛ Lemɛkɩ kpɑɣɑɑ, kɑncɑɑlɑɣɑ nyǝŋ hǝtɛ ntɛ́ Atɑ, nɑɑlɛ nyǝŋ sɩ Silɑ.

²⁰Ḿpʋ́ɣʋ́ Atɑ lʋlɑ Yɑpɑɑlɩ. Yɑpɑɑlɩ ɩnɩ ɩ́lɛ́ ɩ piitim ntɛ́ mpɑ pɑ tiikiɣi kɑlǝkǝŋ nɑ pɑ́ sʋʋkɩ cokɑ tɑɑ tɔ.

²¹Ɩ́lɛ́ ɩ neu hǝtɛ ntɛ́ Yupɑɑlɩ. Yupɑɑlɩ ɩnɩ ɩ piitim ntɛ́ mpɑ pɑ mɑkɩ sɑŋkʋnɑɑ nɑ pɑ́ hʋlǝɣɩ hǝsɩ tɔ.

²²Silɑ ɩ́lɛ́ ɩ lʋlǝnɑ ntɛɣɛ Tupɑɑlɩ-Kɑyini, wei ɩ luki nyǝɣǝlʋɣʋ kʋsɛɛmʋɣʋ nɑ nyǝɣǝlʋɣʋ mɑɣɑmɑɣɑ wontu tɔ. Ɩ neu kɛ pɑ yɑɑkɑɣɑ sɩ Nɑɑmɑ.

²³Ḿpʋ́ɣʋ́ Lemɛkɩ tɔmɑ ɩ ɑlɑɑ Atɑ nɑ Silɑ sɩ: Mɑ ɑlɑɑ mɛ, ɩ́ nɩɩ mɑ tɔm yoo. Mǝ tɑɑ lɛlʋ pɑɑlʋ cǝtǝlɑ-m kɛ́ nɑ mɑ́ kʋ-ɩ.

²⁴Tɔm nɑɑtosompɔɣɔlɑɣɑ kɛ pɑɑ lɛɛtɩ Kɑyini kʋlʋ. Ɩlɛnɑ pɑ́ lɛɛtɩ mɑ kʋlʋ kɛ tɔm nɩɩtoso nɑ nɑɑnʋwɑ nɑ nɑɑtosompɔɣɔlɑɣɑ.

²⁵Atɑm pɑ tɑsɑ ɑpɑlʋpǝyɑɣɑ kɛ lʋlʋɣʋ ɩlɛnɑ Ɩfɑ hɑ-kɛɣɛ hǝtɛ sɩ Sɛɛtɩ, sɩ Tɑcɑɑ hɑ ɩnǝɣɩ ɑpɑlʋpǝyɑɣɑ lɛŋkɑ kɛ Apɛɛlɩ wei Kɑyini kʋwɑ tɔ ɩ lonte.

²⁶Sɛɛtɩ nɑ́ lɑpɑ yʋlʋ nɑ ɩ́ lʋlɩ ɑpɑlʋpǝyɑɣɑ nɑ ɩ́ hɑ-kɛ sɩ Ɩnɔɔsɩ. Wɑɑtʋ ɩnǝɣɩ yǝlɑɑ cɑɑlɑ Ɩsɔ kɛ́ sɛɛʋ sɩ Tɑcɑɑ.