1K'Adama ŋambəpɛnɛ kɔ wəran kɔn Hawa, kɔ Hawa ɛmbɛkəs, k'oŋkom Kayin. Kɔ Hawa oloku: «Isɔtɔ wan wərkun kəmar ka Kanu disrɛ.»
2Kɔ Hawa oŋkom sɔ wəfɛt ka Kayin nwɛ anawe Abɛl mɔ. K'Abɛl ende pəyɔnɛ wəkɛk ka cir kɔ ŋkesiya. Kɔ Kayin ɔyɔnɛ wəbifti.
3Kɔ tɛm tɔlɔma tende tɛbəp mɔ, kɔ Kayin ɛlɛk yokom ya dəntɔf, k'ɛŋkɛrɛ yi Kanu kədeloŋnɛ.
4K'Abɛl nkɔn sɔ, ɛŋkɛrɛ yokom yɔcɔkɔ-cɔkɔ ya yɔcɔl yɔn kɔ moro ma yi. Kɔ Kanu Kəpɔŋ kəmɔmənɛ Abɛl kɔ kəloŋnɛ kɔn fɔr yɔtɔt.
5Mba Kanu kəmɔmənɛ fɛ Kayin kɔ kəloŋnɛ kɔn fɔr yɔtɔt. Kɔ pəntɛlɛ Kayin, k'ɛŋɛy kəro.
6Kɔ Kanu kəyif Kayin: «Ta ake tɔ pəntɛlɛn' am-ɛ, ta ake tɔ məŋɛyɛ kəro-ɛ?
7Kɔ məŋkɔt bel-bel-ɛ, məndesel. Kɔ kɔ məŋkɔt pəlɛc-ɛ, kiciya kəy' əm dəkusuŋka kɔ mɛfaŋ ma ki mey' əm. Mba məsɛp mətasərnɛ ki.»
8Kɔ Kayin ɔŋcɔpər wɛŋc Abɛl. Mba ntɛ ŋanayi dalɛ mɔ, kɔ Kayin ɛyɛfər wɛŋc Abɛl kəsutɛnɛ, k'endif kɔ.
9Kɔ Kanu kəyif Kayin: «Deke wɛŋc əm Abɛl eyi-ɛ?» Kɔ Kayin oloku fɔ: «Iŋcərɛ fɛ. Cepɔ wəkɛkəs kɔn iyɔnɛ ba?»
10Kɔ Kanu kəloku Kayin: «Cəke cɔ məyɔ wɛŋc əm-ɛ? Dim da mecir ma wɛŋc əm deyi kəkulɛ-kulɛ kəyɛfɛ dəntɔf haŋ nnɔ iyi mɔ.
11Ndɛkəl oŋ, kətolan' am k'antɔf ŋender pəlɛc, nŋɛ ŋɛwani kusu kɔ məsɔŋɛ ŋi kəmerəs mecir ma wɛŋc əm mɔ.
12Kɔ mənde məcbəc antɔf-ɛ, ŋɔfɔde ŋɔcsɔŋ əm pəbotu pa ŋi. Ti tɔ pənde pəctɛlɛn' am məc-cepɛ-cepɛ dəkəbəc.»
13Kɔ Kayin oloku Kanu: «Pəlel pa kiciya kem pɛmbɛk kəsarɛ.
14Məmbɛləs im mɔkɔ nnɔ antɔf ŋam ŋebi ŋeyi mɔ. Pənamar im kəgbɔpən' am, kɔ kəcepɛ-cepɛ dəntɔf, kɔ fum ɛmbəp im dənda-ɛ, pədif im.»
15Mba, kɔ Kanu Kəpɔŋ kəloku kɔ: «Kɔ fum endif Kayin-ɛ, aŋluksɛ ayɛk ŋɔn camət-mɛrəŋ.» Kɔ Kanu kəŋgbesi Kayin ntɛ tɔŋsɔŋɛ aŋɛ ŋambəp kɔ mɔ, ta ŋasut kɔ ŋadif.
16Kɔ Kayin owur fɔr ya Kanu kiriŋ dalɛ da Edeŋ, k'ɔŋkɔ pəyi atɔf ŋa Nɔdu nde dec dɛmpɛ dalɛ da Edeŋ mɔ.
17Kɔ Kayin ŋambəpɛnɛ kɔ wəran kɔn. Kɔ wəkakɔ ɛmbɛkəs k'oŋkom Henok. Kɔ Kayin owurɛ dare k'ɔsɔŋ di tewe ta wan kɔn Henok.
18Kɔ Henok oŋkom Iradu, k'Iradu oŋkom Mehuyayɛl, kɔ Mehuyayɛl oŋkom Metusayɛl, kɔ Metusayɛl oŋkom Lɛmɛk.
19Kɔ Lɛmɛk ɛlɛk aran mɛrəŋ, pacwe wəkin «Ada,» kɔ wəka mɛrəŋ «Cila.»
20K'Ada oŋkom Yabal, nkɔn ɔyɔnɛ wətem ka akɛk yɔcɔl acepɛ-cepɛ.
21Tewe ta wɛŋc tɛnayɔnɛ Yubal: Nkɔn ɔyɔnɛ wətem k'afer coŋkəlo k'afula luk.
22Kɔ Cila nkɔn sɔ dəmnɛ oŋkom Tubal-Kayin, nwɛ ɛŋcgbɛc ca fəp ya kɔpər kɔ ya fɛc mɔ. Wəkirɛ kɔn aŋcwe Nahama.
23Kɔ Lɛmɛk oloku aran ɔn: «Ada kɔ Sila nəcəŋkəl dim dem! Aran a Lemɛk nəsu ləŋəs nəcəŋkəl moloku mem. K'asut im-ɛ, indif fum. K'ambopər im-ɛ, indif wanfɛt.
24Kɔ pəyɔnɛ fɔ padif afum camət-mɛrəŋ kəluksɛ ayɛk ŋa Kayin-ɛ, andedif afum 77, a pacluksɛ ayɛk ŋa Lemɛk.»
25Adama kɔ Hawa ŋasɔtɔ sɔ wan. Kɔ Hawa ewe kɔ «Sɛt», ti tɔ tatɔkɔ «Kanu kəsɔŋ im sɔ wəlɔma kədeyɔn' em Abɛl wəkɔ Kayin endif mɔ.»
26Kɔ Sɛt ende pəkom wan pac-we kɔ Enɔs. Tɛm tatɔkɔ t' anacop kəkor-koru tewe ta Kanu Kəpɔŋ.
