Genesis 4

1

2

3

4

6

7

8

9

11

12

13

14

15

16

17

18

19

21

22

25

26

28

35

37

39

40

41

42

45

46

48

49

50

¹Ma Adam awana Eve maiteni i matave ma i duama ma tevera orotona i tupua. Ma i riwa, “Bada ana aguei natu a vaia.” Lamna aubaina i ḡorei “Cain.”

²Ma muriai tevera orotona ḡelauna i ḡuni ma i ḡorei “Abel.” Ma maranai taui i vilaraga, Abel tauna tauviḡamoḡamo ma Cain tauipi.

³Mara tagogi Cain doa uana ḡelaui i neiai da i puloei Bada awarina.

⁴Wate Abel nanare sipu natuevouii i vunu-naiei ma sia monamonai i apui Bada awarina ana pulo. Bada Abel ma ana pulo i vinuaiaiei.

⁵Wate Cain ma ana pulo eḡa ita vinuaiaiei. Ma lamna aubaina, Cain amlona i ḡaiḡai ma naona i peu.

⁶Anina ma Bada Cain i riwei i pa, “Aiwai aubaina amlom i ḡaiḡai? Aiwai aubaina naom i peu?

⁷Mepa da kaua aiaina uta kauei, lamna ata vinuaiai awarim. Wate am nota da apoapoena ma kauei, lamna ma aramanei da apoapoe am au metaeta e daradaraim da ina vovaiubaim. Wate tam ma virewapana da ma vovaiubai.”

⁸Ma muriai Cain ana tevera Abel i riwei, i pa, “Tana nae, tana babara.” Ma maranai i ḡeta au wapu, Cain i vomairi ma ana tevera Abel i vunui da i viraḡeni.

⁹Ma Bada Cain i paridadani i pa, “Am tevera Abel mepa?” Ma Cain i paribelei, i pa, “Eḡa ata aramanei! Tau au tevera taupainina bo?”

¹⁰Ma Bada i riwa, i pa, “Aiwai u kauei? Am tevera tarana doei e kwatukwatu raubiwa aubaina.

¹¹Lamna aubaina tam marina apoapoe awarim a tereterei. Am tevera tarana uramei au doa i toi da doa i matave ḡaḡari.

¹²Ma lamna aubaina maranai u ḡoei da doa uta ipiei, lamna uana eḡa ma nelaḡai ma am animae eḡa. Tam ma babara labalababa.”

¹³Cain Bada i riwei, i pa, “Au kovoḡa i rata kaua ma eḡa tagotagogina da ana avarai!

¹⁴Tam wei doanei e viviopuniu da naom eḡa ana inana-melei. Tau ana babara labalababa ma eḡa au animae. Ma rava ina nelaḡaiu ma ina viraḡeniu.”

¹⁵Ma Bada i paribelei, i pa, “Eḡa! Aiai da i viraḡenim, ana kovoḡa ina rata guratana.” Ma ana mataira Cain awarina i terei da rava ita viḡaei da tauna avena ita vunui, maranai i nelaḡai.

²⁵Adam awana maiteni i matave ma Eve natui ḡelauna i ḡuni. Eve i riwa, i pa, “Cain ana tevera Abel i viraḡeni. Ma lamna aubaina God natu orotona i vereu da Abel i raviepaiai.” Ma i ḡorei Seth.

²⁶Seth natuna orotona i tupua ma i ḡorei Enosh. Ma nai marana, rava, Bada wavana vivivireina viborumana i vikarei.