Luka 13:1-12

¹Dameŋ ijaha ŋic gâcne fisirâ juhuc Jesu dâŋ binaŋ ʒiŋuc ecnembiŋ: “Pilatozi mume momorifâcne jaŋe Galilaia mâreŋkonec ŋic â bâzi ririkere lama bulimakaofâc‐jeŋic mâmâc joparâ socjeŋic bâsifuckembiŋ.”

²Dâŋ binaŋ iŋuc ecnepie ʒiŋuc jazawec: “Ŋoŋe wiac ŋemâcne i ejarekicnere ʒiŋuc moc mupie: ‘Kiŋjeŋic Galilaia ŋic gâcne jaŋere kiŋ sirickewec.’

³Iŋuc mâcne, gâcne ŋoŋere kiŋ fokac jaha, irec maŋŋeŋic mi bârisieniŋmuo iŋuc jaha sipricke‐fâreniŋmu.

⁴Me Jerusalemnec ŋic 18 Siloam hârâczi ŋemac‐jopawec jaŋere wâc ʒiŋuc mi munʒepieŋ: ‘Kiŋjeŋic Jerusalem haeonec ŋic gâcne jaŋere kiŋ sirickewec.’

⁵Iŋuc mâcne, gâcne ŋoŋere kiŋ fokac jaha, irec maŋŋeŋic mi bârisieniŋmuo iŋuc jaha sipiricke‐fâreniŋmu.”

⁶Dâŋ i mutararâ Jesuzi kesaic dâŋ moc kecʒiŋuc muwec: “Ŋic moczi jufu‐ticnao hâmeŋ moc sarame sokawec. Eme rune e fârine wasaocte ra basa jujec.

⁷Eku jufu soŋaŋ‐ticne âzâcnerâ muwec: ‘No jâc kecʒirec fârine basahuc juhape jara jahec â moc ekac. Jâc e maŋgâŋ wemocte boc domaocmu, qafaratec qaoc.’

⁸Mume soŋaŋzi ʒiŋuc âzâcnewec: ‘Bomboŋ, go behehaŋ jara ʒi domaoc, ehame noni fuŋne kinoŋzi herâ jawa sânʒâŋ hepe

⁹dameŋ mocte fârine fuaocmu me aricne i honezeperec. Aricne eme ʒâhec mutec hefarazo.’”

¹⁰Jesu e sabata hombaŋ mocte mitificko ferâ miti jazawec.

¹¹Eme mitific ira ŋokac moc ŋewec, e demoŋ moczi ecneme jara 18 ruruhuc jaha ŋeŋe juju ewec, ehuc wemocko moc fâretiŋnezac.

¹²Eme Jesuzi ŋokac e honerâ hefârerâ muwec: “Ŋokac go fâretiŋnecmurâ mukopac.”