Lucas 13:1-12

¹Ne leeka thib re wiza, ngwa chop tson zha nzhab lo Jesús, lee Pilat mbeth chop tson zha yezlyu Galilea, ne mchuuxnit Pilat ren re zhaʼa kon ren re maa kuu mndaa re zhaʼa lo Diox.

²Tsa nzhab Jesús lo re zha: ―¿Kwan ntsow goo xgab? ¿Chu ntsow goo xgab tata mzhaak re zhaʼa, tak masraa falt ndab zha nake tedib net re zha yezlyu Galilea?

³Per lee na ni lo goo, nagte tata; ne os lee goo laat goo re mod went kuu nak goo, ne yelaazt goo Diox, noga goo tath goo.

⁴Ne, ¿kwan ntsow goo xgab? Leettsa mla thib yuu naro dits re tsiinbtson zha, thib ta le Siloé ne nguth re zha, ¿chu ntsow goo xgab masraa ndab re zhaʼa falt nake re zha yez Jerusalén?

⁵Bren ganin lo goo, nagte tata; os lee goo laat goo re mod went kuu nak goo, ne yelaazt goo Diox, noga goo gath.

⁶Tsa lee Jesús nzhab tedib kwent nanzee lo re zha, ne nzhab Jesús: ―Thib mbyi mkeno thib xann ya ig lo yu zha ta nzhann zha luts ub. Ne ngwa zha ngwakwaan zha ig lo ya, per neeka thib ig mzalt lo zha.

⁷Tsa nzhab zha lo zha kuu nkenap yu zha: “Wii, ndaʼa tson liin thibka nyalʼn nyaadkwaan na xle lo ya ree, per neeka thib welt nzaltʼn xle lo ya. Bgay tak ntetsaay yu da.”

⁸Per lee zha kuu nke tsiin lo zha, nzhab: “Zha Nabee, btaane tedib liin, nal teleen yu xanne ne gon bewgwe,

⁹ne os leey taay xle ya wene, per os leey taate xle tsa ga nay”.

¹⁰Jesús mloo lo re men ta nkaltaa zha nteed zha xkiiz Diox wiz kuu ndroxkwan zha.

¹¹Ne tya ndo thib ngot kuu ndaʼa tsiinbtson liin ndakti lo thib mbi went, kuu ndaat diiz li dits ngot.

¹²Ne leettsa mwii Jesús zha, tsa mrez Jesús zha, ne nzhab Jesús lo zha: ―Mgweʼa lu lo yiz went kuu mzhaaka.