Luka 13:1-12

¹Dameng iwahac ngic gocne yengi Yesu siduc yanguc edocnoibong, “Galili ngic gocne yengi depecnginengte sic lobelu Wapong hasoc holecnolu gaibong. Gabong Pailat yedi mime ngicfocine yengi hikelu Galili ngic wehomacebalu sacngineng yogo depecnginengte sic sacineholec kpatulebong atang aiwec.”

²Mibong Yesudi yanguc uwayelewec, “Ngic homaibong, yengele bikicti Galili ngic-ngigac sasawa, yengele bikic ewaligac inguc fikeyelegac, ngenge inguc ngagesigaing, me?

³Yogo miyacbenang! Aime yanguc edocngebabe, ngengebac kwelengineng mi hefaliyedaingte, ngenge sasawadi yenge homaibong, ingucnehac homayackedaingte.

⁴Nga Siloam mac-daledi heliyelu ngic-ngigac 18 feinginang walu wehomacebawec. Ilec ngenge wenuc ngagegaing, yengele bikicte umacti Yerusalem ngic-ngigac sasawa gagaing, yengele ewaligac, me?

⁵Yogo miyacbenang! Aime yanguc edocngebabe, ngenge kwelengineng mi hefaliyedaingtewa, ngenge sasawadi yenge homaibong, ingucnehac homayackedaingte.”

⁶Aime Yesudi nangeng yowa monic yanguc edocebawec, “Ngic monic ye fik yoc monic waing bole kwelina duweme domawec. Aime ye hikecgu noine basackelu

⁷waing bolele damong edolu yanguc miwec, ‘Yoc yogolec noine basackelu gabe hifa habackang biyac aigac. Ailu ye omale moc domalu himong helocine nowackegac? Ilec ga yoc yogo welockelu wickedamec!’

⁸“Mime waing bolele damongti miwec, ‘Sugucnene, hegileng hifa yago inguchac domaemewa fungina heuckelu himong gocne helockolec lodacte.

⁹Inguc aibebac lobewa noine madicne aidaicte mecne. Nga noine mi aidaictewabac, ga nalic helockelu wickedamec!’ ”

¹⁰Aime Sabat dameng monicka Yesu ye kpakpaduc mac monicka felu wewedu bole bawec.

¹¹Hei, ngigac monic iwahac ngiyewec, ye hucte aleng monicti lobeina bakatackeme ye lobe-ngosoc gacgume hifaine 18 biyac aiwec. Aime lobeine nalic mi bame dondongkedaicte.

¹²Aime Yesudi ye nganilu wackeme yela weleme yanguc miwec, “Ngigac, ngagegic, hucgone baickebe miyac aigac.”