LUCAS 13:1-12

¹Cheguin ke wa tebëd mén lo Jesus, wuu men diiz ne wket Pilato tebëd men-Galilea. Lex wgoots Pilato xren men yra we xren maa ne wseleedx yra mén guin por Dëdyuzh.

²Lex re Jesus lo men: ―¿Pe nuu lextoo de ne por ne ntozdee zeeb mén guin dol ke lo yra men-Galilea, neguin wzak men zenga?

³Yna noo lo de yra de ne let zengadeto. Belne laa de ne ysaandet de xgyelmal de, laake zenga ke sak de.

⁴¿U nuu lextoo de ne chene wet chimtson men-Jerusalén ne watxee torre ne zob ledne la Siloé led, ntozdee zeeb men dol ke lo yra men ne nuu Jerusalén?

⁵Yna noo lo de yra de ne let zengadeto. Belne laa de ne ysaandet de xgyelmal de, laake zenga ke sak de.

⁶Lex wuu Jesus zegnak te kwent lo men, re Ne: ―Rap te mgyeey tebzhaan yag-ig lo xelyu men ledne rap men blag ub, lex wa men wii gan pe ka ig lo we, per bet ig wzëldet.

⁷Lex re men lo men ne rapkwent lyu guin: “Gukwii gante, che wyon iz zëëd noo zëdye noo ig lo yagree, per bet ig rzëldet lo we. Gutxuugo, porke noze rlanxii we lo lyu.”

⁸Wke mén guin ne rapkwent lyu guin, re men: “Dechey, zeguezobleso ste izree, ne yseyul noo yu zhiino, lex guu noo beebo.

⁹Pazer skaa nex lo we. Belne ykaadet nex lo we, lex ytxuug bo.”

¹⁰Te dxe ne rne men-Israel, kaneluu Jesus mén leen te ydoo.

¹¹Nga zob te wnaa ne che wzaa chimtson iz rzhuun. Laa te menzab nak ne wsanmëg men, axtegue rakdetlel gaknli men.

¹²Chene wii Jesus men, wbëz Ne men, lex re Ne lo men: ―Wnaae, che wbëz gyelgyiz gwa ne rzak de.