LUKA 13:1-12

¹Una negana ai haida ese Galilea taudia haida sivaraidia Iesu e hamaorolaia, Pilato ese idia raradia na edia boubou ḡaudia raradia ida e bulo hebou.

²Bena Iesu ese e haere henidia, eto, Umui na o tomamu unu Galilea taudia hahidaosi edia dika na Galilea taudia oredia edia dika e hereaia, taunabunai unu e mase toma a?

³Na hamaoromuimu, lasi; to umui na basio helalo kerehai, iboumui ai unu ba mase toma.

⁴Eiava, Siloam kohorona ese e kohudia tao bona e hamasedia taudia gwautataurahaniosi; umui na o tomamu edia dika na Ierusalem taudia oredia edia dika e hereaia a?

⁵Na hamaoromuimu, lasi; to umui na basio helalo kerehai, iboumui ai unu ba mase toma.

⁶Ina sivarai heḡereḡerena e henidia, eto, Tau ta ena vine imeana lalonai suke auna ta e hadoa; gabeai huahuana itahuna ela, to se davaria.

⁷Bena ia ese imea ireḡuna tauna e hamaoroa, eto, Laḡani ihatoina binai ina suke huahuana name tahua, to asina davaria; ba utua, ia na tano e lahea taomu.

⁸A ia e haere, eto, Biagugu e, hari ina laḡani tamona mo do baine mia; tano na baina ruaia, baina haseriseria;

⁹bena huahuana baine dobi be baine namo, a bema lasi boma utua.

¹⁰Dina Helaḡa ta ai, ia ese dubu lalonai e hahediba.

¹¹Unuseni ai hahine ta lauma dikana ese vada e boloa, laḡani gwauta-taurahani, bona doruna vada e laoho, asi gini tore dibana.

¹²Iesu ese e itaia, bena e hamaoroa, eto, Hahine e, emu doru laoho vada eme maoro.