San Lucas 13:1-12

¹Ha hora vëhë ni ne, cafehe xu ngujo xuta hiscan tacun Jesús. Hane cachja xu me cojo Jesús tsëhë ngujo xuta tsëhë distritu Galilea xi cavitexa Pilatu xi cueya hya xi titsiquehen xuta xi cuacun vë chu rë me xi sua me cjuatjo cojo Nina.

²Ngajan xi Jesús ne, cuitjin xu cachja me cojo xuta xi cachja cojo rë me jan: ―‍Hane tsëhë xi cuatjin cahme ngujo xuta Galilea xi cuacun vë ne, ¿há vëhë xi má nuju xi hitsë sa tsehen me xi cuma rë yëjë sa me xi yahnga?

³Jéya, hacuiin cuatjin. Peru sá xi ngayun nindeyuun cjuatacun nuju ne, ngayujun ni ne, hacuaha cuatjin cueyun.

⁴O há tsajin ne, xuta xi tyjuhunjyan xi cahme hya xi caticjane rë torre tsëhë Siloé jan ne, ¿há má nuju xi hitsë sa tsehen me xi cuma rë yëjë sa xuta xi caviyuju ngajan Jerusalén?

⁵Jéya, hacuiin cuatjin. Peru sá xi ngayun nindeyuun cjuatacun nuju ne, ngayujun ni ne, hacuaha cuatjin cueyun. ―‍Cuatjin xu cachja Jesús.

⁶Sehe ngajan xi Jesús ne, cachja sa xu me ngu ejemplu cojo xuta jan, cojo sa xi sua me cumachaya rë xuta xi jemu chúva camá nixtin xi cuma tsindeya xuta cjuatacun rë me. Cuitjin cachja me: ―‍Cuejñaa ne xi ngu ya túhaxi jan ne, secun xcun nangui rë ngu cha jan. Hane xi canduva cha xi tsëhë jan, vanguise cha tú rë ne, casacuiin rë cha.

⁷Sehe ngajan xi cachja cha cojo cha mosu rë cha cuitjin: “Ha tjin rë jyan nu xi vinduva vanguësë tú rë ya vi ne, sacuiin ná. Tiche. ¿Mé má tu cuenda cuisecun tsinguetsun rë nangui?” Cuatjin cachja cha xi tsëhë jan.

⁸Ngajan xi cha mosu jan ne, cuitjin cafayangui cha: “Tatá. Tuhun rë cahndë́ catisecun ndastu ngu nu sa, hane cuacján nangui rë, hacuaha cuíncha rë abono.

⁹Xi cuatjin ne, ¿há suaain tú rë nduva nga ngu nu? Hane sá xi hacuaha ni suaain tú rë ne, sehe cuichan.” Cuatjin cafayangui mosu jan. Cuatjin xu fi ejemplu xi cachja Jesús.

¹⁰Ngu nixtin xi chjahájenda rë, hya xi tivicuya xu Jesús cahntsua ngu yungun jan ne,

¹¹ngajan tacun ngu chjuun xi ha cjui tyjuhunjyan nu xi camaticua na hane ha quihndë maji xu ma quixi nínda ngaxtun na.

¹²Xi cavëë Jesús na ne, cajindaya xu me na, sehe cachja me cojo na cuitjin: ―‍Ngayun tsan ne, ha camandaya ngayun tsëhë xi cuatjin jyihi ngayun vë. ―‍Cuatjin xu cachja Jesús.