San Lucas 13:1-12

¹Ti pjere meheñequinagã masa Jesure ohõ saha ni yahue tiahye: —‍Galilea cjẽna wahiquirore wejẽ ʉjʉ̃a mʉo Cohãcjʉ̃re tiquina ño peori watoa Pilato pehe tiquinare wejẽahye. Tiquiro sa wejẽgʉ̃ wahiquiro dii mehna masa dii moreahye, ni, yahuahye tiquina Jesure.

²Tiquina yahu tuhasagʉ̃ Jesu yʉhtiahye: —‍¿Galilea cjẽna Pilato tiquiro wejẽgʉ̃ wejõriquina mʉnare dʉhse ni tʉhotuajari mʉsa? ¿Tiquina sa yariagʉ̃ apequina Galilea cjẽna yʉhdʉoro ñañequina tiquina ijiri buhiri sa yeyari Cohãcjʉ̃ tiquinare, mʉsa tʉhotugʉ̃?

³Ijierare. Mʉsare niita niaja. Mʉsa pehe mʉsa ñañene bʉjʉa witierana, quehnoañe pehere camesaerana, mʉsa gʉ̃hʉ yariana pecapʉ wahanata.

⁴Sa ye sohõ ijiriquina diez y ocho masa Siloé wame tiri wʉhʉ ʉhmʉari wʉhʉ tiquina bui wihnoa dijiaro, tiquinare wejẽ pehoahye. ¿Sa waha yariaye, apequina Jerusalẽ cjẽna yʉhdʉoro ñañequina ijiyari tiquina, mʉsa tʉhotugʉ̃?

⁵Ijierare. Mʉsare niita niaja. Mʉsa ñañene bʉjʉa witierana quehnoañe pehere camesaerana, mʉsa gʉ̃hʉ yarianata. Sa yena pecapʉ wahanata, niahye Jesu tiquinare.

⁶Sa ni tuhasa apeye queoye mehna piti dahre yahuahye tiquinare: —‍Wese upʉro tiquiro wesepʉ higueragʉre cʉoahye. Sa yero tiquiro tʉ dʉcare macano wahamahye. Bocaerahye.

⁷Bocaeraro tiquiro wese dahrariquirore yahuahye. “Tʉhoya yʉhʉre. Ihtia cʉhma waro higueragʉ dʉcare macamaja. Dʉca mariedare. Tʉ dʉca mariedagʉ̃ tʉre quẽ cohã cãhña. Tʉ ya wesepʉ ijigʉ̃ apedʉre otero basioerare. Apedʉ tʉ ihyaborire ihyaboaga tʉ dʉca mariedʉ pehe”, niahye wese upʉro tiquirore dahra cohteriquirore.

⁸Tiquiro sa nigʉ̃ tʉhoro dahra cohteriquiro ohõ saha niahye: “Pʉhto, ahdʉ ihcã cʉhma waro ducurĩahdo. Tʉ nʉhcoripʉ yʉhʉ sehegʉtja. Tuhasa, wahiquiro cʉhta mehna ti copere yaʉtja.

⁹Yʉhʉ sa yeri bato tʉ ape cʉhma dʉca tiro dʉca tiboaga. Tʉ dʉca mariedagʉ̃ mʉhʉ quẽ cohã dutigʉta”, niahye dahra cohteriquiro wese upʉrore, ni, yahuahye Jesu.

¹⁰Ti pjere saurú deco ijigʉ̃ Jesu judio masa buheri wʉhʉpʉ buhero niahye.

¹¹Topʉ watĩno cʉoricoro ijiahye. Watĩno pehe diez y ocho cʉhmari waro dohatigʉ̃ yeahye ticorore. Sa yero pari tjũ ducuricoro ijiro, poto ducu masiedahye.

¹²Ticoro sa ijigʉ̃ ihñano Jesu ticorore ihña, pisuahye: —‍Numio, mʉhʉ dohatiye pihtia wahare, ni, pisuahye Jesu.