Luku 13:1-12

¹Koto natena꞉ta꞉ koto pa꞉ta꞉ haemeke mandane haliwekima꞉ Yesu pa꞉ta꞉ a꞉pa mo Pailedima꞉ Ka꞉lili mandane haliwekita꞉ ika꞉ hotekemanu lia Koda꞉ pa꞉ta꞉ halolo haena꞉ kone lieke ekina꞉ pi la halemekeme.

²Koto ekina꞉ Yesuma꞉ ika꞉ pi hombo peaaso alota꞉ Mo Ka꞉lili haliweki paeyaota꞉ hoke hau pu halemepate ika꞉ honema꞉ta꞉ mo hande limiki haliwekima꞉ hoke hau ota꞉ haka꞉ta꞉pao pimiki yeke handa liekeme hone witelemepe.

³Ota꞉ dia꞉me. I̱ma꞉ iki pa꞉ta꞉ ota꞉ loa꞉me. Iki make ika꞉ piteleme hoke haumanu na kiaemeka꞉na꞉ta꞉ kota꞉ iki make mo hande Ka꞉lili haliweki homemeke tupa꞉ kone homilimikie.

⁴Kutupa make mo hande Sailoa꞉me da pa꞉ta꞉ haliao a꞉emeke da hokulu tieke lombolo hata꞉ lu sesape pieke 18 wanda꞉hali pa꞉ta꞉ta꞉ eki hone witelemepe. Mo hande dama꞉ lieke ekina꞉ta꞉ ika꞉ hoke hauta꞉ mo Diutuseleme haleme wanda꞉hali paeyaona꞉ pimiki hoke hau ota꞉ lombei peake tupa꞉ pimikieki peneme yaasa꞉pe.

⁵Ota꞉ dia꞉me. I̱ma꞉ iki pa꞉ta꞉ ota꞉ loa꞉me. Iki make ika꞉ piteleme hoke haumanu na kiaemeka꞉na꞉ta꞉ kota꞉ koto tapake homemeke tupa꞉ kone homilimikie leekeme.

⁶Kutupa Yesuma꞉ iki pa꞉ta꞉ onkoluma꞉ pi ma꞉nda꞉ dupa leekeme. Amba꞉ hali ma꞉nda꞉ma꞉ ipika꞉ e tukikina꞉ta꞉ nose ti ma꞉nda꞉ nokopeekeeki hayekeme. Mo halima꞉ta꞉ mo nose kiliki a꞉ela꞉ patema꞉ handolo endi pu hayekepate homeke a꞉nda꞉ na a꞉eyekeme.

⁷Koto ekina꞉ta꞉ mo halima꞉ ipika꞉ e pokao hayeke hali pa꞉ta꞉ alota꞉ Handa꞉e. Bapi tepo tukiki pa꞉ta꞉ta꞉ do nose tina꞉ kiliki a꞉ela꞉pe laa handolo endi pu halopate homeke a꞉nda꞉ ota꞉ na a꞉ela꞉me. Koto pa꞉la꞉ ekina꞉ta꞉ do hoke tima꞉ mo epeke kenke pa hameke naata꞉ paama꞉na꞉ poko bae leekeme.

⁸Koto leekepate mo e pokaeyeke halima꞉ alota꞉ Yaka tiekeo. Bapi homekena꞉ pa haena꞉ lae. I̱ma꞉ do ti teke hopa꞉liao yu lia kao imanu lekeluekema꞉ loa꞉me.

⁹Yaka honema꞉ta꞉ mone mo bapina꞉ kiliki a꞉eya꞉ka꞉na꞉ta꞉ ota꞉ epolo pa꞉la꞉pate na a꞉eya꞉ka꞉na꞉ta꞉ kota꞉ pao poko baena꞉ lolena꞉e laa leekeme.

¹⁰Mo hoto pila꞉ nate ma꞉nda꞉na꞉ Yesuta꞉ mo pi hotu haemeke da ma꞉nda꞉ pa꞉ta꞉ pi walo hayekeme.

¹¹Koto pa꞉ta꞉ta꞉ hoke temoko pitieke wanda꞉ ma꞉nda꞉ pitiekeme. Kutu pieke ekima꞉ kone mo wanda꞉ta꞉ 18 bapina꞉ yeni mea hao hayeke ekima꞉ mo wanda꞉na꞉ hoki hoi peaota꞉ tindipapeke na yeekeme.

¹²Yesuma꞉ mo wanda꞉ hando hao wi la꞉moneaso alota꞉ Wanda꞉o. Neketa꞉ naka꞉ yeni ta paetolo hata꞉ neketa꞉ walekena꞉ ta hale handa꞉e.