Luka 13:1-12

¹Gêdêŋ ŋasawa tonaŋ lau ŋagêdô sêmoa, taŋ sêjac miŋ gêdêŋ Jesu kêpi lau Galilaiaŋa ŋagêdô, taŋ Pilata gêjac êsêac êndu gêdêŋ taŋ sêkêŋ da gêdêŋ Anôtô.

²Tec Jesu gêjô êsêac aweŋ gebe “Amac abe Galilaia tonaŋ lau sec sêlêlêc lau Galilaiaŋa ŋagêdô samob su, tec sêôc gêŋwapac amboac tônê me.

³Aê jasôm êndêŋ amac gebe Masigoc. Maiao amac embe anam taôm ôkwi atom, oc anaŋa samob amboac tônêgeŋ.

⁴Me abe lau 18, taŋ andu toŋatêpôê baliŋ aŋga Siloamŋa kêku sa jagêjac êsêac êndu naŋ, lau geo sêlêlêc lau ŋagêdô samob, taŋ sêŋgôŋ Jerusalem naŋ su me.

⁵Aê jasôm êndêŋ amac gebe Masigoc. Mago amac embe anam taôm ôkwi atom, oc anaŋa samob amboac tônêgeŋ.”

⁶Go Jesu kêsôm biŋgôliŋ tonec gebe “Ŋac teŋ kêsê nê aiŋ teŋ kêsêp nê kôm moŋa ma gêja gesom ŋanô e kêtap sa atom.

⁷Tec kêsôm gêdêŋ ŋac-gejobkômwaga gebe ‘Gôlicgac me, aê gamêŋ kêtôm jala têlêac gasom aiŋ tonec ŋanô, mago katap sa atom. Amboac tonaŋ ôsap su, êkô nom auc êtu ageŋŋa.’

⁸Tec gejobwaga gêjô eŋ awa gebe ‘Apômtau, ondec, êkô jala tecenec êwiŋ, ma jasap nom to jaôc bôckêpêc êpi ŋamôkê.

⁹Moae oc ênam ŋanô. Embe masi, go ôsap su.’”

¹⁰Gêdêŋ sabat teŋ Jesu kêdôŋ lau gêmoa lôm teŋ.

¹¹Ma awê teŋ gêmoa tonaŋ ŋalau gêmacŋa teŋ gêgôm eŋ kêtôm jala 18. Eŋ gêmoa gewec-gewecgeŋ ma kêtôm gebe êsa sa atom samucgeŋ.

¹²Jesu gêlic eŋ tec gêmôêc eŋ ma kêsôm gêdêŋ eŋ gebe “Awê, aê kêgaboac aôm su aŋga nêm gêmacgac.”