LUKU 13:1-12

¹Gↄrↄ birea gbɛ̃kenↄ sù ò Galili gbɛ̃ kũ Pilati ń dɛdɛ à ń aru yã̀katɛ kũ ń sa'obↄ aruonↄ yã ò Yesunɛ.

²Akũ Yesu pìńnɛ: Kũ Galili gbɛ̃ pìnↄ ga de lɛ, átɛn da ń durunna de Galili gbɛ̃ kparanↄ pↄ́lan yá?

³Oi! Matɛn oárɛ, tó ádi nɛ̀sɛ litɛro, á pínki ni ga lán ń bàmɛ.

⁴Gbɛ̃nↄn baro plansari kũ Siloamu kpɛ́didikↄ̃anaa gbòro à sìḿma ò gàganↄ sↄ̃, átɛn da ń taari de gbɛ̃ kpara kũ ò kú Yurusalɛmunↄ pↄ́lan yá?

⁵Oi! Matɛn oárɛ, tó ádi nɛ̀sɛ litɛro, á pínki áni ga lán ń bàmɛ.

⁶Akũ à yã dí lɛ̀kↄ̃ańnɛ à pì: Gbɛ̃ke mɛ́ à kaka lí bà a swadakoo gũn, akũ à gɛ̀ɛ a nɛ́ wɛtɛ adi ero.

⁷Akũ à pì a zĩkɛriinɛ: Ǹ gwa, a wɛ̃̀ aakↄ̃den dí, kũ madì su nɛ́ wɛtɛ kaka lí pìia mádi ero. Ǹ a zↄ̃, óni tó à gu sí pãn yá?

⁸Akũ zĩkɛrii pìi pìnɛ: Baa, ǹ tó ari ziki dↄ. Mani gu bi mà likai mà taaki kánɛ.

⁹Ani gí nɛ́ i zikiro. Tó adi nɛ́ iro sà, mani a zↄ̃ mà nɛ.

¹⁰Kámmabogↄrↄ zĩ Yesu tɛn yã dańnɛ aduakɛkpɛn.

¹¹Nↄgbɛ̃ ke kú gwe, tãna a kↄ̃̀nↄ kù à kà wɛ̃̀ baro plansari. Àdigↄ̃ kokonamɛ, àdi fↄ̃ à a zĩda poro bee fítiro.

¹²Kũ Yesu a è, akũ à a sìsi à pì: Nↄgbɛ̃, n kↄ̃̀nↄkɛ gòmma.