Luuka 13:1-12

¹Wakathi aya opule, atthu aariivo khumuuza Yinsa yoori Pilaatu awoola atthu akina a Kalileya wakathi aari orettaavo twaha zaya.

²Yinsa khuwaajipu yoori: “Mweeyo mwinoona yoori akalileya apo aari anatwampi zayita atthu akina, mwaasa woohoowa toowo?

³Miiyo kiniwuuzani yoori: wala! Apho amana na-mweyo mwihithupwiyi twampi zenu, mooshi mwintta opwetheya nkhama yo.

⁴Ama mweeyo mwinaakanyera yoori apale khumi na wanaane yaawaakweliyeeyo korofwa ya Siloowe aari anapaathuli zayita apale aniikhalaaye Yeruzaleemu?

⁵Wala! Kiniwuuzani theenya yoori amana mwihithupwiyi twampi zenu mooshi mwintta opwetheya nkhama etthiipo na-yo apwetheyiyeezo.”

⁶Aphano Yinsa khulupa nlikaniso opu onraaye: “Mwinyi mmote aarina mfikeera awe aazaliyeeyo mmashapa mwawe. Khulankha olawa oshuma mishumo zaya, hatha mmote khuhisikanimo.

⁷Aphano khumuuza namalimela nshapa ntthile yoori: ‘Kina nyaakha mittatthu kitaaka oshuma, kihisikanakamo hatha etthu. Okakatte! Mwaasa wa etthu-ni ottiyelelaka puuro ya mahala?’

⁸Ila karumeyaawe otule khunjipu araka: ‘Mbwana, kinuuvekelani yoori mwilikhe mfikeera opu wiiye nttumphu mpakha mwaakhani; miiyo kintta othipa nshini mwaya kisala kiitthela vitutu.

⁹Mwaakha nkina amana wiima mishumo ti yooshapweya; amana ohiimi okakatte.’”

¹⁰Siikhu ya saapatu, Yinsa eetta osomisa nnyupa moote yoosifwiwamo Nnyizinku.

¹¹Nttumphule aarimo muukha aari ohoochiwaaye ti sheethwani khwa nyaakha khumi na minaane, aari wookhutupuwa ahaari owahaaye wookowa.

¹²Wakathi Yinsa amooniyeevo khunkhuwela khumuuza yoori: “Maama mwavona orati enu.”