Luk 13:1-12

¹Ana pukakiar ning, dingla na tarai la atai e Iesu ana dingla na tarai Galili ning e Pailat i umkol la, ning kaning ot la tun artabar tetek e God.

²E Iesu i keles la mang, “Mangmangasa, mulo nuki mang la laulau tana tarai Galili rop, anasa la hirua manglarne?

³Bel! Ika a atai mulo, ning bel mulo lingir a nuknukim mulo kusun anumulo na toltol laulaula, mulo otleng mulor hirua rop.

⁴“Pa asaning mulo nuki ana ning a bonot pa siwal a tarai saot e Jerusalem ning a rumai leklek ting na pukna Siloam i taroh pa i umkol arop la? Mangmangasa, la laulau tanla ning la kes saot e Jerusalem rop?

⁵Bel! Ika a atai mulo, ning bel mulo lingir a nuknukim mulo kusun anumulo na toltol laulaula, mulo otleng mulor hirua.”

⁶Lamur e Iesu i atong a warwara larlar ne tetek la, “Ning a barsan anuna rakai a fig i tur potor ting na barim a wain anunai. I han pa i tai sur ta wana, ika bel i pastetek tik.

⁷Lamur i atai a tena tai alar ana barim, ‘Ana natol a rau ne a tol panai sur ta wan a rakai a fig ne. Ting seni! Anasa i tur alalar.’

⁸Ika a tena tai alar i kelesi mang, ‘Leklek, ur noreni ning a rau kale ne, sur ar tol talapori, pa ar kel pori.

⁹Ning ir wai ana rau ning lamur, ir wakak. Ning bel, ur ting seni.’”

¹⁰Ana ning a Pukakiar Sabat e Iesu i asaer a taraila ting na ning a rumai lotu.

¹¹Ning a hane i kes tingia, a mot kaning onoi. A intauruna i talugun ning a bonot pa siwal a rau, pa bel i tur tostos lar pas.

¹²Ning e Iesu i oroi, i atongi mang, “Lak, u ka langolango kusun a numa tinsaman.”