Luuk 13:1-12

¹Kambaŋ iikanondeeŋ tosianoŋ kouma Jiisas sundu kokaeŋ ijogi moro, “Galili ejemba tosianoŋ Jerusalem jigonoŋ siimoloŋ oogi gawana Pailotnoŋ jero kawali galeŋurutanoŋ kanoŋ uma uŋuŋ komugi sagia kamaaŋ lama bulmakao sagiawo melokanjiŋ ero.”

²Kaeŋ jegi meleema kokaeŋ iŋijoro, “Oŋo iikawaajoŋ kokaeŋ romoŋgowubo: Galili ejemba yoŋonoŋ Galili ejemba tosaaŋa kuuya uŋuuguŋ siŋgisoŋgo ama laligogitiwaajoŋ siimbobolo ii mogi.

³Kaeŋ qaagoto, niinoŋ kokaeŋ iŋijowe mobu: Oŋo uugia mende meleembuti eeŋ, oŋo kuuyanoŋ mono kaaŋagadeeŋ tiwilaadaborowu.

⁴Me gomaŋ qata Siloam kanoŋ miri koriga moŋnoŋ kamaaŋ koma ejemba 18 turuŋ oŋono komugiti, oŋo iyoŋoojoŋ kokaeŋ romoŋgowubo: Yoŋonoŋ Jerusalem kanageso tosaaŋa kuuya uŋuuguŋ siŋgisoŋgo ama qaagiawo laligogi.

⁵Qaagoto, niinoŋ kokaeŋ iŋijowe mobu: Oŋo uugia mende meleembuti eeŋ, oŋo kuuyanoŋ mono kaaŋagadeeŋ tiwilaadaborowuya.” Kiaŋ.

⁶Jiisasnoŋ sareqaa moŋ kokaeŋ jero, “Eja moŋnoŋ muli gere komoro gawoŋanoŋ kouma nano kawaa hoŋa moŋgamambaajoŋ kenoto, moŋ mende mokolooro.

⁷Mende mokolooŋ gawoŋ galeŋaajoŋ jero, ‘Moba, niinoŋ muli gere kokawaa hoŋa gbani karoombaa so kaŋ moŋgambeto, moŋ mende mokoloowe. Kawaajoŋ ii mono naambaajoŋ toroqeŋ namowaa kelega eeŋ horowabo. Kawaajoŋ ii mono koma gilina kemba.’

⁸Toyanoŋ kaeŋ jeroto, galenoŋ meleema ijoro moro, ‘Oo eja poŋna, ii saanoŋ mesaona gbani koi mombo namba. Niinoŋ kambaŋ biiwianoŋ kokaamba kanoŋ kinoŋnoŋ namo osoŋ qidigoŋ isombasoŋ ama liligowe kelegawo koloowaa.

⁹Niinoŋ kaeŋ ambe gbani gematanoŋ iikawaa hoŋa saanoŋ koloonaga. Ii mende koloowaati eeŋ, ii saanoŋ komba.’” Kiaŋ.

¹⁰Jiisasnoŋ Sabat kendonoŋ qamakooli miri moŋnoŋ uma Buŋa qaa kuma oŋono.

¹¹Kanoŋ emba moŋ raro. Omenoŋ gbani 18 kawaa so meŋ looriŋ muro gemata miligoro qetetereemambaajoŋ amamaaŋ rama laligoro.

¹²Jiisasnoŋ emba ii iima oono karo kokaeŋ ijoro, “Emba, isinabisina jiganoŋ mono gomesaoro awaa koloojaŋ.”