SAN LUCAS 13:1-12

¹Daaní, tiempu yucán nì cachitnùhu nèhivì xì‑yá nansa nì cuu xi nècuàchì ladu Galilea, nì dàndàcú Pilatu, te nì sahnì soldadu‑nè na meru sáhatahvì‑né quisì nduú promesa xi‑ne nùù Dios; meru xíhì quisì mà, te nì sahnì‑ténê.

²Dandu nì naxiconihí‑yá nùù nècuàchì nì nacani ma, te dohó nì cachi‑yà: ―Nècuàchì Galilea mà, ¿a tuxí ini‑nsià ñà‑chicá nì sanduu‑ne nèhivì cuáchi nùù nsidaa nècuàchì ñuu‑nè, te sàhámà nì xìhì‑nè ducán?

³Còó, cachíˋ, vàchi divi ducání ndañuhu stná mii‑nsiá nú màsà cúú‑nsiá arrepentir sàhà cuàchi‑nsia.

⁴Te ináhá stná‑nsià nansa nì cuu yatni Siloé yucán na ní ndua iin torre, te nì chàhmà sàhùn ùnì nèhivì. Pues ¿a tuxí ini‑nsià chicá nìsa ìa cuàchi nècuàchìmà nùù nsidaa gá nèhivì ñuu‑nè Jerusalén?

⁵Còó, cachíˋ; vàchi dècuèndè mii stná‑nsià, divi ducání icúmí stná‑nsià ndañuhu‑nsiá nú màsà náxícócuîìn inì‑nsia sàhà cuàchi‑nsia.

⁶Dandu nì nacani‑ya ejemplu yohó: ―Nìsa ìa iin tiàa icúmí xí iin ñuhù iá ñà‑tàtá, te yucán iín stná iin nù‑higu. Te nì sàà tiàa ma iin xichi yucán, cuàhàn‑nè cuida‑ne fruta‑nu ni cuí, doco còò ni‑iin sìhigu‑nu ni ndácùhun‑ne.

⁷Ñàyùcàndùá, nì cachi‑nè xì tèndiàá xì yutnù tatá mà: “Cunaha‑ní, sàcuàhàn ùnì cuìà quixí indéhí, áma níhìˊ sìhigu yutnù yohó cahín, doco còò‑sí. Ni táhndè‑nu chicá vàha; có‑cùníˋ cuiin uun gà‑nu yohó”.

⁸Doco peón mà, nì cachì‑te: “Senór, nacoo gà‑nínu dècuèndè inga cuìà, vàchi cuníˋ dadayíˋ ñuhù sàhà‑nú, te daquéi majada,

⁹áma cuáha‑nùsí; te nú coó, dandísá, tàhndè‑nu”, nì cachi peón mà.

¹⁰Daaní, iin quìvì sábado iá‑yà iin veheñùhu dacuahá‑yá nèhivì.

¹¹Te yucán nì quìhvi stná iin nècuàchì ñahà, sàhùn ùnì cuìà dandohó iin ñà‑malu‑nè, nì cuìtá yaa‑ne quidá‑si, ñàyùcàndùá xicá todo‑ne, mà cùì nácuììn ndàà‑nè.

¹²Doco na ní xini Jesús‑nè, nì cana‑yanè ñà‑tnàtuu‑ne. Dandu ní cachi‑yà xì‑né: ―Mii‑ní nècuàchì ñahà jaàn, sànì quee cuèhè malu quidá quini xi‑ní.