Luk 13:1-12

¹Afta na sambala pipul deya bin dalim Jisas blanga sambala kantrimen blanga im brom Gelali. Wen detlot kantrimen blanga im bin abum sekrifais serramoni blanga God, det gabman bos neim Pailat bin kilim olabat ded.

²Wal Jisas bin dalim detlot pipul, “Wanim yumob reken? Detlot pipul hubin dai bin brabli nogudbala pipul en ola najalot pipul hu nomo bin dai bin gudbala pipul?

³Nomo. Ai dalim yumob. If yumob nomo tenim miselp brom yumob nogudbalawei, wal yumob garra ol dai jis laik olabat bin dai.

⁴“En wanim yumob reken blanga detlot 18 pipul hubin dai wen det haibala haus wansaid langa det krik gulum Sailowam bin buldan en kilim olabat ded? Yumob reken olabat bin brabli nogudbala pipul en ola najalot pipul deya langa Jerusalem bin gudbala pipul?

⁵Nomo. Ai dalim yumob. If yumob nomo tenim miselp brom yumob nogudbalawei, wal yumob garra ol dai jis laik olabat bin dai.”

⁶Afta na Jisas bin dalim olabat dijan stori blanga meigim olabat jinggabat weya God gibit olabat taim. Imbin tok, “Wantaim wan men bin abum wan tri langa im gadin, en imbin go en lukabat det daga langa det tri. Bat im nomo bin faindim enijing.

⁷En imbin dalim im wekinmen, ‘Yu luk det tri deya. Fo 3 yiya aibin kaman en lukinat det tri if im garram daga. Bat ai nomo bin faindim. Wal yu kadimdan det tri na. Im nogud det tri yusumbat ola gudwan graun fo najing.’

⁸Bat det wekinmen bin tok, ‘Bos, yu libum det tri wanmo yiya, en yu larram mi grajim det graun en miksimap garram minyuwa.

⁹En if det tri abum daga neksyiya, wal gud. Bat if najing, wal yu gin kadimdan im.’” Lagijat na Jisas bin tok blanga meigim olabat jinggabat.

¹⁰Afta na wan Sebathdei Jisas bin titjimbat ola pipul insaid langa det Juwish Miting Pleis blanga olabat,

¹¹en wan gel bin deya hubin abum nogudbala spirit, en det spirit bin meigim det gel sikwan. Det gel bin abum nogudwan bekboun, en im kaan jandap streitbala. Fo 18 yiya imbin lagijat.

¹²En wen Jisas bin luk det gel, imbin jingat langa im, “Gel, yu fri brom det siknis.”