Luke 13:1-12

¹Jesus arrpenhe nhenhe areyeke angketyame, kenhe arrpenhe areye apmere Jerusalem-engentyele ikwere-werne apetyewarrekenge ayeye-akerte. Itne ikwere angketyete-alheke, “Tyerrtye Jew arrpenhe areye apmere Galilee-arenye areye itne Ilthe Akngerre Ngkarte-kenhele anerrirremele, yepe-yepe-arlke nanikute-arlke arrpenheme atwerrirremele itemele tyawerrelyele Ngkarte ikwere. Kenhe artwe alartetye apmere Rome-arenye re thultye ikwerenhe areyeke ileke Jew itnenhene yanhe areye atwerrirretyeke. Kenhe kele itne imerte irrtyarte-akerte alherlte-iwemele itnenhene atwerrirretyeke Ilthe Akngerre yanhe ikwere-werne.”

²Kenhe Jesus akenhe itneke angkirtneke, “Nthakenhe-ame arrantherre itirrewarreme? Arrantherre-ame itirrewarreme nhenhe Galilee-arenye areye-arle arrpenhe ingkirrekeke-athene arrpenhe apmere Galilee-arenye areyenge akurne ulkere areyeke-athene? Itne anyente-ame-anyente aneme. Alakenhenge apeke-arle arrantherre-ame itirrewarreme itne-arle itnenhene atwerrirreke, apmere Ngkarte-kenhenge akwele?

³Yanhe rarle arratye anetyakenhe! Ayenge awerrirraye! Arrantherre akenhe Ngkarte ikwere-werne utepe-arle-irrerirretyeke! Akurne mpwarewarretyale! Kenhe arrantherre apeke akurne akwete mpwarewarremele, arrantherre anteme ilwerre-arle-irreme tyerrtye Galilee-arenye yanhe areye-arteke.

⁴Kenhe ayenge akenhe arrekantherre itirreme, the arrenhantherrenhe apayuthnetyeke. Arrantherre-ame itelarerrirreme tyerrtye 18 pele apmere Siloam-arenye? Warle arlpentye akngerre rarle itneke-arleke atakelheke, itnenhene ingkirreke atwemele ultheke. Nthakenhe-ame arrantherre itirrewarreme? Nthakenhe-ame itne anerrirretyarte? Arrantherre-ame itirrewarreme nhenhe Siloam-arenye areye-arle arrpenhe Jerusalem-arenye areyenge akurne ulkere. Alakenhenge apeke akwele itne ingkirrenyeke ilwerrirreke? Arrangkwe-arle, yanhe arratye anetyakenhe.

⁵Ayenge awerrirraye! Arrantherre akenhe Ngkarte ikwere-werne utepe-arle-irrerirretyeke! Arne akurne alakenhe areye mpwarewarretyale! Arrantherre apeke akurne alakenhe akwete mpwarewarremele, arrantherre anteme ilwerre-arle-irreme tyerrtye Siloam-arenye yanhe areye-arteke.”

⁶Jesus-ele ayeye akweke-arle nhenhe ileke itnenhene akaltyele-anthetyeke Ngkarte-kenhe iwerreke. Kele imerte re alakenhe angkemele, “Arrule anthurre artwe anyente anetyarte. Re kartene arntarnte-aretyarte. Kenhe kartene ikwerele arne utyerrke lyapeke. Kenhe arlte arrpenhele, artwe re arne yanhe ikwere-werne alhemele merne utyerrkeke aretyeke, re uye areme.

⁷Kele yanhe ikwerenge-ntyele, re urrkapentye akngerre ikwerenheke angkeke, ‘Year urrpetyenge ayenge arne nhenhe-werne apetyetyarte akwetethe merne utyerrke-arle arne nhenhele anemeke aretyeke. Kenhe merneke arrangkwe akwete! Arne yanhe tyerraye arrpenhe lyapelhe-iletyenhenge.’

⁸“Kenhe urrkapentye akngerre ikwere angkirtneke, ‘Akngerrepataye, akarelhaye! Year arrpenhe anyenteke renhe impaye. The renhe itepe arrpe-anenhe tnyemele pweleke atne arrpenheme arrernetyenhenge. Yanhe ikwerenge-ntyele apeke, merne utyerrke areye lyapewarretyenhenge.

⁹Kenhe kele year arrpenhenge apeke, merne utyerrke yanhe apeke merne lyapewarrerlenge, kele mwerre-arle. Kenhe itne apeke lyapetyakenhe, the renhe akemele, tyerremele iweme-arle. The-ame renhe atnyenetyenhe?’ Kenhe alartetye re akenhe angkerlenge, ‘Yewe, kele.’” Kenhe alakenhe ayeye renhe ware Jesus-ele itneke ileke.

¹⁰Arlte apurrke arrpenhele, Jesus tyerrtye Jew areye-kenhe tyatye akweke-werne alheke, itneke Ngkarte ikwere-akerte iletyeke.

¹¹Kenhe yanhe ikwerele akenhe arelhe anyente arrentye-arle ikwerele-arlenge aneme-akerte. Arelhe yanhe inwerre alakenhe akwete-arle aneke, arrule anthurre-ngentyele, kenhe arrentye yanhe re ikwerele-arlenge aneke year 18-peleke-atwetye. Kenhe arelhe re uyarne arratye tnetyeke-irreke re anteme artepe akurne-akerte unthetyarte.

¹²Kenhe Jesus-ele akenhe arelhe renhe aremele ileke, “Arelhe akunye-apenhe, the arrentye renhe ngkwenge-ntyele aywepetyenhe lyete!”