Luka 13:1-12

¹Tegani nesave manuša phende e Isusese so o Pilat, o upravniko e rimesoro, naredinđa nesave Galilejci te oven mudarde. I on inele mudarde sar anena ine žrtve ano Hram e jerusalimesoro.

²A o Isus phenđa lenđe: “Tumen li mislinena da adala Galilejci, adalese so ađahar mudardile, inele po grešna sa avere Galilejconendar?

³Na! Ali te na obratinđen tumen taro tumare greja, sarijen tumen ka adžićeri propast!

⁴Ili okola dešofto upro kolende peli i kula ano Siloam hem mudarđa len, tumen li mislinena da on inele po bare grešnici sa e manušendar kola živinena ano Jerusalim?

⁵Na! Ali te na obratinđen tumen taro tumare greja, sarijen tumen ka adžićeri propast!”

⁶Tegani o Isus vaćerđa lenđe akaja paramiz: “Inele nesave manuše smokva sadime pese ano vinograd. I alo te rodel o bijandipe lakoro, ali na arakhlja.

⁷Tegani phenđa e manušese so ćerela buti lese ano vinograd: 'Ače, trin berš sar avava te rodav bijandipe upri akaja smokva, ali na arakhava le. Čhin la! Sose te šućari i phuv?'

⁸A ov phenđa: 'Gospodarona, ačhav la pana akava berš. Ka xanav la hem ka frdav laće đubrivo,

⁹i šaj ka bijani. A te na bijanđa, ka čhine la.'”

¹⁰I jekh savato sar o Isus sikaj ine ani jekh sinagoga,

¹¹adari inele nesavi đuvli kola o bišukar duho ćerela ine te ovel banđardi dumeja. Oj inele banđardi dešofto berš hem nisar našti ine te ispravini pe.

¹²Ked o Isus dikhlja la, vičinđa la kora peste hem phenđa laće: “Đuvlije, oslobodimi injan taro to nambormipe!”