Lucas 13:1-12

¹Na, penga niyan, doen otaw kidoen mig-indan diyà ki Jesus te doen menge sakop te probinsya te Galiliya impeimatay i Pilato dalem pa te pegsonog dan te ayam-ayam imbegay dan diyà te Timanem kidoen te dakel simbahan doton te Jerusalem.

²Minikagi si Jesus diyà kandan, “Ikà niyo eg-aneng-aneng te inimetayan dan so labi pa medaet se salà dan diyà te menge doma dan menge sakop te probinsya te Galiliya.

³Penenalan kaw te kagi ko kenyo. Aw eked kaw pegselsel te salà niyo, matay se kedita niyo iling kandan.

⁴Eneng-enengi niyo se sempolò teg walo otaw netonganan te melangkaw kotà kidoen te Siloam. Pengkey negelà dan, meneng ikà niyo eg-aneng-aneng te labi pa medaet se salà dan diyà te kedita te tege Jerusalem.

⁵Penenalan kaw te kagi ko kenyo. Aw eked kaw pegselsel te salà niyo, matay se kedita niyo iling kandan.”

⁶Nayan, mig-indan si Jesus te tegdeyanan seini. “Doen kayo igira kidoen te tanà te sebad otaw. Dimoton sikandin amon mengabat te pongo niyan, meneng wedad palos kinità din.

⁷Penga niyan, minikagi sikandin diyà te otaw impetonggò te tanà din, ‘Na, telo pa se omay gayed a migpeliman te doen pongo te kayo seini, meneng wedad palos. Pilayi iyan, amon doen ontong ko te tanà seini.’

⁸Meneng timaba se teletonggò, ‘Sir, pebeyai pa iyan te sebad mendad se omay, so ebwaban ko pa aw solan ko te tai te baka.

⁹Mèpiya peden aw mongo iyan te modi omay. Meneng aw eked pongo, mepakay diyà kanak aw pilayen nikaw.’”

¹⁰Nayan, migtoladà si Jesus kidoen te simbahan te Judiyo te Sebado aldaw te peg-etod dan.

¹¹Doen heman bayi kidoen impeeleg te bosaw te sempolò teg walo se omay, so nebongkog sikandin.

¹²Pegkità i Jesus kandin, timawal sikandin, kagi din, “Tiyà, kegolian ka den.”