Lucas 13:1-12

¹Nii orapacha tsjii kjaz̈ z̈oñinacaqui quintu zjijcchic̈ha, Jesusiz̈quiz mazñi. Tuz̈ cjican quint'ichic̈ha. Pilato cjita jiliriqui tsjii Galilea wajtchiz z̈oñinaca conkatchic̈ha. Nii conta z̈oñinacz̈ ljocqui animal ljocnacz̈tan t'ajzic̈ha. Tuquiqui animala contkalc̈ha, Yoozquin ofrenda tjaazjapa.

²Jalla nuz̈ nonz̈cu Jesusaqui cjichic̈ha: —¿Kjaz̈tiquiztan Galilea wajtchiz z̈oñinacz̈quiz nuz̈ anawali watchitajo? ¿Parti Galilea wajtchiz z̈oñinacz̈quiztan juc'ant ujchiz ninacajo? ¿Jalla niz̈tazaz̈ anc̈huc pinsiya?

³Anc̈hucqui anac̈ha niz̈ta pinsa. Anc̈hucqui Yoozquin kuzzizpan cjee. Ana niz̈ta cjisnaquiz̈ niiqui, anc̈hucaquiz juc'ant anawaliz̈ watasac̈ha.

⁴Jesusaqui quint'ichizakazza, tuz̈ cjican: —Tsjii tunca quinsakalcuni z̈oñinacaqui ticzic̈ha Siloé cjita wajt campanturi jalla ninacz̈ juntuñ pajlz̈tiquiztan. ¿Kjaz̈tiquiztan niz̈ta watchitajo? ¿Parti Jerusalén wajtchiz z̈oñinacz̈quiztan juc'ant ujchiz ninacajo? ¿Jalla niz̈tazaz̈ anc̈huc pinsiya?

⁵Anc̈hucqui anac̈ha niz̈ta pinsa. Anc̈hucqui Yoozquin kuzzizpan cjee. Ana niz̈ta cjisnaquiz̈ niiqui, anc̈hucaquiz juc'ant anawaliz̈ watasac̈ha.

⁶Jalla nekztanaqui Jesusaqui tsjii quintu zakaz quint'ichic̈ha, tuz̈ cjican: —Tsjii z̈oñiqui niiz̈ yokquiz jiws muntinaca c̈hjacchic̈ha. Tsjii nooj ojkchic̈ha “jiwsa pookchiz̈caa” cjican, ojkchic̈ha. Irantiz̈cu, muntinacquiz ana c̈hjul jiws frutanaca watchic̈ha.

⁷Jalla niz̈tiquiztan nii yoka cwitiñi z̈oñz̈quiz cjichic̈ha: “Chera, c̈hjep wata jiws frutanaca kjuri tjonchinc̈ha. Ana jiws frutanaca pookchikalc̈ha. Jaziqui tii muntinaca k'atzna. Inapanikaz z̈ejlc̈ha.”

⁸Jalla nekztanaqui nii yoka cwitiñi z̈oñiqui patrunz̈quiz cjichic̈ha: “Wejt patruna, tii watcamakaz z̈ela cjee. Wejrqui yokal zumpacha kjullznac̈ha, niz̈aza wanz̈tan wanit'ac̈ha.

⁹Jalla niz̈tiquiztanaqui jiws frutanaca pookz atc̈hani. Anapan pookaquiz̈ niiqui, nekztanaqui k'atz̈taz̈ cjequic̈ha”. —Jalla nuz̈ quint'ichic̈ha Jesusaqui.

¹⁰Tsjii jeejz tjuñquiziqui, Jesusaqui ajcz kjuyquiz tjaajnatc̈ha.

¹¹Jalla nekz z̈elatc̈ha tsjaa laa maatak z̈on. Tunca quinsakalcun watanaca laatac̈ha. Tsjii zajraqui naa z̈on taj chutu paatkalc̈ha. Niz̈tiquiztanaqui anawira ts'iru tsijtsniñtac̈ha, ana c̈hjulu paazjapami.

¹²Jesusaqui naa z̈on cherz̈cu, kjawzic̈ha, nekztan tuz̈ cjichic̈ha: —Cullacalla, am laaquiztan liwriita cjequic̈ha.