Luka 13:1-12

¹Yesu iwetewete pang di a imot, motong la di tooltool pattu yo titar talngadi ye betanga ki nga, ngan tigasa panga ye Pailot yo iwanga di tooltool ki ke patokongo la tiraumata di tooltool ke Galili pattu nga. Ngan ye kene tani in be tiparoro so pang Maro lapau. Ngan nen le rara kidi imati a idu igaua pa ye rara kidi asara tina yo be tiyei paroranga ye pang Maro nga.

²Motong la Yesu iraua betanga kidi nen, “Lomim belei ye di tooltool ke Galili tina yo tiraumata di a timmata nga, ngan di tooltool dook tiap ke yeingi noonoo le tillos di tooltool kapala yo ke Galili, ngan la tiyei dada nen pang di nga, too?

³Tiap! Bong awete pobe pang nen, kumata be kaportak lomim mulu pang Maro tiap nga, ngan ole Maro igarungang gaongo leu dawa ben di tooltool ke Galili tina yo tiraumatamata di nga.

⁴Inbe lomim belei ye di tooltool sangaul inbe balana limi be tol ke Yerusalem yo rumu mooloo ke Siloam iduku du ikaltoo di a timmata nga? Ngan lomim tar be di ngan tooltool dook tiap ke noonoo le tillos di tooltool kapala yo tiyepe Yerusalem nga, too?

⁵Tiap! Bong awete pobe pang nen, kumata be kaportak lomim mulu pang Maro tiap nga, ngan ole Maro igarungang gaongo leu dawa ben di tooltool ke Yerusalem tina yo rumu iduku du irau di nga.”

⁶Motong la Yesu ikatte betanga atu mulu pang di nen, “Tool atu in ipe kai yo ene pik in ye kumu ki ke ooroo yo ene wain i. Motong ye kene atu ngan ila be la matan sarai kai pik tani in kanono, bong ila ngan ikamata touo kanono siap.

⁷Motong la iwete pang tool ki yo itaru be matan kala kumu ki i. Iyei ne, ‘Ai, ye rai tol ngan aman be man matak so kai pik kanono, bong ipu tiap, le taukan kanono. Le ke be ikodo nen a ikap sokorai tana gorengana tiap. Le kutara a idu tana.’

⁸“Motong la tool tani yo matan kala kumu ki i, in iyei ne, ‘Tool mai, ngan dook mata, bong au i lok be ikodo kasin ye rai atu mulu ngan, inbe akel tana ke punu ngo a atar asara tedi sa ilo punu, inbe takamata toua ngan.

⁹Kumata be talo ye rai san pang dama i, le be ipu a itar kanono nga, ngan o dook mata. Bong kumata be ipu tiap nga, lo ngan be kuwete a atara du tana.’ ”

¹⁰Lal kidi Yuda ke sungunu in pombe, le nga Yesu ilo rumu kidi Yuda ke gaongo in lono a lo ipatomonai di tooltool yo tigaua ye sungunu nga.

¹¹Ngan garup atu yo iyepe ye gaongo lapau i, in so sadi iyeii le matamatenge mai ikauu ye rai sangaul inbe balana limi be tol. Le udud turana ki ikoi le ke be ipa tot tiap.

¹²Le nga Yesu ikamata, motong la koonoo panga a iman pang ye, man iwete panga nen, “Garup, matamatenge kiong in ole akaratong ye, ngan ole tinim dook mata mulu.”