Luka 13:1-12

¹Eꞌe madaḡano vaze nuꞌe Iesu vaḡe aradu niro, raenaꞌa, “Galilea azaḡa nuꞌe Badiꞌa dibuo hau radiuꞌeteꞌe zamaḡano Pilato, Roma gavana vazeḡa, aniꞌa uti azaḡa nu tuḡuzadu ze zemeha.”

²Iesuꞌa naenaeziro, raenaꞌa, “Zaꞌa zamareꞌetene, ze sauꞌaꞌe Galilea azaḡa nu omo sauꞌa roꞌanoga ꞌahine, ꞌouge rudaneha rae raꞌohe?

³Mene! Eḡeꞌa ziꞌohe, zaꞌe zae sauꞌanonoꞌo mene ḡihurine, zae zuni zeḡe teige ꞌouge rudaꞌuma.

⁴Ebu za edeḡa, Siloami habaꞌano ne hitaganiꞌa fahanadu vaze 18 rudaro. Zaꞌa zamaretene, ze sauꞌaꞌe Ierusalema azaḡa niduꞌa sauꞌa roꞌanoga rae raꞌohe?

⁵Mene! Eḡeꞌa ziꞌohe, zaꞌe zae sauꞌanonoꞌo mene ḡihurine, zae zuni ꞌouge rudaꞌuma.”

⁶Ebu Iesuꞌa hari ꞌahoga idaniro. “Vaze ꞌahoganiꞌa vaini nebaḡano figi ireḡa ḡoraro. Eꞌe enogano, aniꞌa huga nu reꞌoga veize onairo, rehano hugaꞌe oꞌoꞌa.

⁷Eꞌanoꞌo neba ḡianeꞌeteꞌe vazeḡa niro, raenaꞌa, 'E muri uḡidu zamaḡano huga reꞌoga veize ona rehano, huga ni ꞌahoga mene horoneha. Eꞌanoꞌo udi higonoꞌi, mazaḡa haba irivaꞌone taugeꞌohe!'

⁸Ebu neba ḡianeꞌeteꞌe vazeḡaniꞌa naenaeninaꞌa, “Eḡe zuhiꞌa, ge muri tiba modoꞌi! Eḡeꞌa mazaḡano busi mumuḡa teadu ḡianiꞌuma.

⁹ꞌOugadu muri tiba zamaḡano hudaune manoḡa, u mene hudanoꞌidene, udi higonoꞌi!'”

¹⁰Bana Madaḡa ꞌahogano Iesuꞌe nuꞌonuꞌo neḡano Badiꞌa ḡoere ihoze radiunu.

¹¹Eꞌea roḡae ꞌahoganiꞌa radiunu. Vine sauꞌaꞌa ani ragano radu ḡaruga mae beonadu muri 18 mene edau faraunu.

¹²Iesuꞌa ani horonirotene, hunadu Iesu vaḡe onairo. Ebu Iesu niro, raenaꞌa, “Roḡae, ḡa ugi ꞌai manoreha.”