Luk 13:1-12

¹Na di du atù, nun dad to tmulen ku Dyisas gablà di mgimò di dademe dad to mdà di Galili. Ta fafati Pilato ale lamla damsù di Dwata. Na i litèla masbool di litè i dad agaf dsùla.

²Na man Dyisas di dale, “Du mati ale bnanò, keng man nawayu na i dad to ayé, too blat fa i dale salà di salà i dademe dad to mdà di Galili.

³Bay ise glut fandamyu. Na ku là msal gamu, lê gamu mati gambet dale.

⁴Na di munan, nun sfalò walu mati matkan i too mdatah gumnè di banwe Silom. Fandamyu ale kun. Too ti blat fa i dale salà kè di salà i dademe dad to di Dyérusalém?

⁵Là sa. Bay ku là msal gamu, lê gamu mati gambet dale.”

⁶Na kafnge ayé, lê tulen Dyisas satu fléd, manan, “Nun satu to, nun kayun fig di tanàan, na kanto mngabal benge, landè teenan.

⁷Na mdà ayé, manan di to gal mifat i dad felen, ‘Ta tlu fali i klogu mngabal benge di kayu ani, na landè teen-gu bengen. Nbekam nan du lon ti falmo i tanà.’

⁸Bay tmimel i snaligan ani, manan, ‘Sér, fatanta sfali gdè, du funagu lanbud na nkahgu bunu.

⁹Na ku menge glam di sfali ani, too fye, bay ku là, fakayta nbek.’ ”

¹⁰Di satu Du Kaftud i dad Dyu, tamdò Dyisas di satu gumnè galla gustifun.

¹¹Na nun déé satu libun ta sfalò walu fali klon bkug mdà di busaw.

¹²Na kanto teen Dyisas i libun ayé, tlon kenen, na manan dun, “Ta mgulê ge nan di tdukam.”