Luk 13:1-12

¹Tɛm tatɔkɔ kɔ afum alɔma ŋander ŋalɔmər Yesu tɔkɔ Pilat ɛnadifət aKalile alɔma ntɛ ŋaŋc-loŋnɛ Kanu mɔ. Itɔ tatɔkɔ Pilat ɛnanɔŋkəl mecir ma afum kəloŋnɛ kəŋan.

²Kɔ Yesu oloku ŋa: «Nəŋcɛm-cɛmnɛ a k’anadifət aKalile akakɔ tatɔkɔ-ɛ, a tementər oŋ a ŋananaŋkanɛ kəciya ŋatas aKalile aləpəs akɔ anatɔ-dif mɔ ba?

³Ala! Ic-lok’un: Mba kɔ nəntɔsəkpər mera nəcəmɛ pəlompu darəŋ-ɛ, tatɔkɔ tɔ nəndeləsərnɛ fəp pəmɔ akakɔ.

⁴Kɔ pəyɔnɛ fɛ ti-ɛ, afum aŋɛ wəco kɔ camət-maas aŋɛ kəlɔ ka Siloye kənawɛkərnɛ kədif mɔ, nəŋcɛm-cɛmnɛ a ŋa ŋananaŋkanɛ kəciya ŋatas aka Yerusalɛm aləpəs aŋɛ ba?

⁵Ala, ic-lok’un, mba kɔ nəntɔsəkpər mera nəcəmɛ pəlompu darəŋ-ɛ, nəna sɔ fəp nəŋfi pəmɔ ŋa!»

⁶Kɔ Yesu oloku sɔ capafɔ ncɛ: «Fum wəlɔma ɛnabɔf kətɔk ka tumbunyi dalɛ dɔn dacɔ. K’ender kətɛn yokom ya ki, mba k’ɛmbəp kətɔk ka tumbunyi nkɛ ta kəŋkom-ɛ.

⁷Awa, k’oloku wəbəc kɔn wəkɔ oŋc-bumɛ kɔ dalɛ mɔ: ‹Meren maas mɔ mamɛ ntɛ inder kəpim yokom ya kətɔk kaŋkɛ mɔ, mba ifɔsɔtɔ. Awa məcɛp ki! Ta ake tɔ kəndecəmɛnɛ, kəbaŋ antɔf gbəcərəm-ɛ?›

⁸Kɔ wəbum ka dalɛ oloku kɔ: ‹Wəbɛ, məsak kətɔk kəkom kaŋkɛ kəren nkɛ gbəcərəm pamɔmən sɔ; indekay haŋ inɔŋkər, ibɛr ma sɔ ŋcɛk-cɛk-a.

⁹Kɔ tatɔkɔ teyi-ɛ, tɔlɔma kəŋkom dok, kɔ pəyi fɛ ti-ɛ, məcɛp ki.›»

¹⁰Kətəksɛ kɔ Yesu ɛŋc-ndɛ dəkəcəpəs dɔlɔma, simiti, dɔsɔk da kəŋesəm.

¹¹Wəran wəlɔma ɛnayi dənda nwɛ ŋɔŋk ŋɛlɛc ŋɛnasɔŋɛ kətɔ-kɔt kəyɛfɛ meren wəco kɔ camət-maas mɔ; ɛnanutnɛ, ta ɛntam kətɛŋcɛ-ɛ.

¹²Ntɛ Yesu ɛnəŋk wəran nwɛ mɔ, k’ewe kɔ, k’oloku kɔ: «Wəran, docu dam dɛsak’əm.»