Luk 13:1-12

¹Ya eme lau rayah are hawe oro na len doh mene tiye i ta Jises ta nyala ndraye iri lau rayah badu Galili badeh, Pailat ndrasolowei ndrala hawe katin haka ta asun ta salom tiri.

²Eme Jises anya, “Ado abudon i buku sah handru? Ado anya oro lau badu Galili adai oro doh badeh, lomondra ndra-in ma karei toro sakalawi karei ma lomondra ndra-in tiri Galili mari deh bwe? Tasah, oro amak i buku doh?

³Jo katiye tado kamwenen: Bwe! Arile, i buku none ado batubuni ndrine ado bwe, idah kameh, ado amak i le buku aliy.

⁴Ya ado kanone kabudon oro lau ma ronoh ndru la-uh (18) mene asiu boko bek lawe tihisi oro ado Silowam se? Ado badeh, abudon anya oro doh badeh, ndra-in labai ja, sakalawi oro lau are Jerusalem dan ai?

⁵Bwe! Jo katiye tado kamwenen. Arile, i buku none ado batubuni ndrine ado bwe le, badeh kameh ado amak i le buku aliy.”

⁶Ano Jises asehek sahou sokek nyala ndramak ari anya: “Ndramak ari mene badeh, tahi kei pik udu bolo bilin tan. Ano iy anya kili katou kei doh, ndrato-ou salin deh bwe. Eme iy ili tandrana tandrana, arile iy banyolom ari bwe.

⁷Eme iy tiye i ta ndramak ta atondrok anya, ‘Jaha taloh ai, jo eme anya katou kei pik dah, ta salin ya eme, jo se batou ari salin bwe. Kei pik kede-eh a-un gwa ta munyak laleyah, ya eme kamwetehei ki-iu!’

⁸“Arile, ndramak ta atondrok bilin anya, ‘Ndri-iy, kudu gwek jaha ari dan op, ya jo kanone kawudi na lek ya jo kakeh sisoh ki mwe-en.

⁹Ki buku none ato-ou salin na jaha eme eh, mwasin ai, ya i buku none bwe eh, badeh, baramwetehei bara-au ai.’”

¹⁰Na len ta amunyau ari, Jises leheya iri lau udu asiu ta atukum tiri Juwis.

¹¹Eme badih ari udu aliy badeh, malawin ndra-in ndramesekei konan ndrahun, andrei jaha ronoh ndru la-uh (18) ai. Eme iy winiyan bales bwe, iy akor le.

¹²Eme Jises anyolom iy ma iy luhi iy eme mwena. Ano iy atehei minen i badan, ma tiye i tan anya, “Badih den, ndrokonam ndramwenen!” Eme konan ales ja ma iy atudun Kindrei.