SAN LUCAS 13:1-12

¹Mismo cʉ pa cʉ́, bi cjöx car Jesús, bi tsjifi, i̱mbijʉ: ―Xí bböhti cʉ dda mi̱ngu̱ Galilea. øde, car Pilato bi mandado bi bböhti‑cʉ́, cja̱ quí cji cʉ cja̱hni ya, bi hua̱nihui quí cji cʉ zu̱we̱ cʉ már ña̱htibijʉ ca Ocja̱.―

²Bi da̱h car Jesús, bbʉ́, bi hñi̱mbijʉ: ―Ntoja guí ma̱nguɛjʉ, mí ndo ndu̱jpite cʉ cja̱hni‑cʉ́, más mí ndo ndu̱jpite ni digue cʉ pé dda mi̱ngu̱ Galilea, eso xí jiɛh ca Ocja̱ xí bböhti.

³Nugö, dí xihquijʉ jí̱na̱. Dí xihquijʉ guehquitjoguɛjʉ, parejo guí ndu̱jpitejʉ co cʉ ddaa cʉ xí bböhti. Cja̱ pé dí xihquijʉ, bbʉ jin gui repentijʉ, xquí hna tu̱jʉ ncjapʉ hne̱je̱.

⁴Xí cʉ dieciocho hñøjø cʉ mí mi̱ngu̱ Jerusalén, nu cʉ bi zɛhmi car ntorre pʉ Siloé bbʉ mí yøte, ¿cja guí ma̱nguɛjʉ, más mí ndo ndu̱jpite‑cʉ́ ni digue cʉ pé dda mi̱ngu̱ Jerusalén?

⁵Ji̱na̱ hne̱je̱. Dí xihquijʉ, bbʉ jin gui repentijʉ, da ncjadipʉ drí zʉhqui quer castigojʉ hne̱je̱, ncja ngu̱ gá nzʉh cár castigo guegue‑cʉ́.― Bi ma̱ ncjapʉ car Jesús.

⁶Diguebbʉ ya car Jesús bi xih cʉ cja̱hni hnar bbede gá comparación, i̱na̱: ―Hnar hñøjø bi mandado bi hñi̱ti hnar za gá higo jár jardín. Cja̱ bbʉ ya xquí cja tengu̱ cjeya, car jmu̱ bi ma pʉ jár jardin, bú cca̱hti car za gá higo, pe jin te mí tu̱. Bi segue bi dyøti ncjapʉ tengu̱ vez.

⁷Diguebbʉ ya, car jmu̱ bi xih car jardinero, bbʉ́, i̱mbi: “Nu̱u̱, ya xí nzʉ jñu̱ cjeya, dé dá e̱je̱ dí cca̱hti nʉr za gá higo, hni̱, jin te i tu̱. ¿Te i pɛjcua jabʉ i jø? Mejor gu tzɛjqui.”

⁸Bi da̱h car jardinero, i̱na̱: “Nuquɛ, Tzi Jmu̱, tøhmijma̱ nʉr cjeya‑yá, gu føhmi nʉr jöy, cja̱ gu jøhti lama.

⁹Diguebbʉ ya, ʉr cjeya, bbʉ da du̱u̱ cʉ higo, rá zö bbʉ́. Cja̱ bbʉ jin te xcá ndu̱ car cjeya‑cá̱, nubbʉ́, xtá tzɛjqui bbʉ guí netjo.” Ncjapʉ gá nda̱h car jardinero.―

¹⁰Ca hnar nsabado, car Jesús már bbʉh pʉ jár templo cʉ judio, már u̱jti cʉ cja̱hni cár palabra ca Ocja̱.

¹¹Cja̱ bi cca̱hti, már bbʉh pʉ hnar bbɛjña̱, xquí ntjɛhui cár nda̱ji̱ ca Jin Gui Jo, eso, mí jñi̱ni. Mí ántjo nguá hño, cja̱ jí̱ mí tzö di hmöy derecho.

¹²Bbʉ mí cca̱hti car bbɛjña̱‑ca̱ car Jesús, bi nzofo, bi xifi: ―Nuquɛ, na̱na̱, ya xí wen quer jñi̱ni ya.― Bi hñi̱mbi ncjapʉ.