1A-ibagangine, Filisteaʼmar Israel-dulemargi bila-ononamalaga na e-sordamar-oatosmalad. Degidgine, Rey-Aquis Davidʼga sogded: —David, be wisguega an bega sogdo, be, degi, be-sordaganmala anba bila-ononamaloed.
2David abin-sogded: —Dummad, degirdi nabirdo. An ibi sunna imake be an-dakodibe. Rey-Aquis sogdebalid: —Ar deyobile, emi-onodedgi mer dule-an-oakalogegala, angi-nakulegega an be-nug-imakdo.
3Deunni, Samuel bato burgwisad. Bela Israel-dulemar ega bosgusmalad, geb e-neggwebur-Ramáʼgi digsa gusmalad. Saúlʼdi Israel-yargi nergan-onis gusad, degi, dule-burgwarmaladse-idakmalad-onis gusbalid.
4Filisteaʼmar na e-sordamar-oatosmargu, Sunemʼgi ambikunonimalad. Geb degine, Saúl, Israel-sordamar-oatosmogad. Geb Gilboaʼgi ambikudapmarmogad.
5Ar Saúl, Filistea-sordamar-dakdegua, dobguded, geb bela-bela nig-argwated.
6A-ulale, Saúl, Bab-Jehováʼse idaksad. Degi-inigwele, Bab-Jehováʼdi gabdakedba Saúl-abin-imaksasulid. Degi, Urimʼba gwen-abin-imaksasurbalid. Deginbali, Bab-Dummad-gayaburba-barsogmaladba, gwen abin-imaksasurbalid.
7A-ulale, Saúl na e-sordamar-idudimaladga igar-ukded: —Ner-bundor-dule-burgwarmaladse-idaked be anga aminamala, adi, an ese idaknaegar. Abin-sogdemalad: —Endorʼgi ner-bundor-wargwen maid.
8Saúl, na dule-baidyob-imakega mor-yogasaled-yosa, mutikidba ner-bundor-daknaded. Geb sorda-warbo eba naded. Geb Saúl ner-bundorse-modapgu, ega sogded: —Dule-burgwisad-e-burbase be anga gorbi an be-abedo. An bega dule-nug-bioed-e-burba be anga oyoged imake.
9Ner-bundor abin-sogded: —¿Saúl-ibmar-imaksad be wissursi? Ar we-yargine, Saúl, nergan-onis gusad, degi, dule-burgwarmaladse-idakmalad-onis gusbalid. ¿Ar ibiga be an-oburgwega be an-yardakdaniki?
10Saúl abin-sogded: —¡Bab-Jehová-nuggi ise-sogar an bega soged, ar we-ibmar-ulale, dule bipisaar gwen akar be-imakosulid!
11Ner-bundor Saúlʼga sogded: —¿Ar doa bega oyobi be an-abesunna? Saúl abin-sogded: —Anga be Samuelʼse gole.
12Ner-bundor, Samuel-dakargua, binnasur-gote, sogded: —¡Ar be Saúl! ¿Ibiga be an-yardaksa?
13Rey-Saúl ega-sogded: —Mer be dobgue. Ibmar be daksad be anga soge. Ner-bundor abin-sogded: —Sergan napa-urba-ainidaniki an daked.
14Saúl abin-sogded: —¿Igi daklege? Ner-bundor ega sogded: —Dule-sered mor-dummadgi-bipirmakar nodanikid. Ar Saúl magar-itosgu, we, Samuel-gued, na dulluu napase imaksad.
15Samuel, Saúlʼga sogded: —¿Ar ibiga wese-dagega be anse gole? Saúl abin-sogded: —An bela-bela bukib-itoged. Ar Filisteaʼmar angi bila-ononaid. Bab-Dummaddi angi aibachad. E-gayaburba-barsogmaladba, gabdakedba bar an-abin-imaksulid. A-ulale, an bese gochad, anga be sogega ibu an imakoe.
16Samuel abin-sogded: —Ar Bab-Jehová begi aibachale, degi, be-isdaradga gunonibalile, degite, ¿ibiga be anse idaksunna?
17Ar igi an ibmar-sogsagusa, deyobi Bab-Jehová na ibmar-imaksad. Bab-Jehová reyga-maid be-obelosad, be-sorda-David, be-anale, reyga nug-imaksad.
18Bab-Jehováʼba be ibmar-imaksasulid, ar Amalec-dulemar bela be ogilogoye bega-soglesadba gwen be imaksasulid. A-ulale, Bab-Jehová emi weyob be-imaksad.
19Bab-Jehová Filisteaʼmarga be-urmakoed, degi, Israel-dulemar-urmakbaloed. Banedse, be, degi, be-mimmigan, burgwemaloed. Geb an-walik be megnonimaloed. Deginbali, Bab-Jehová Filisteaʼmarga Israel-dulemar-danar-bukwad-urmakbaloed.
20Ar Saúl, Samuel-ega-ibmar-sogsadba, bela-bela dobe-itosad. Degisoggu, Saúl ukiagwar aimukusunnad. Ar a-ibagine, Saúl, mas-guchasuli mutikguded, degisoggu, ukudbali burgwebibalid.
21Ner-bundor Saúl-bela-bela-dobe-ito-dakgu, ese naded, geb ega sogded: —Dummad, an beba ibsasad. Ar be-sogedba an ibmar-imaksad-ulale, burgwed-naga an gusad.
22Emigindi, an bega sogdo, anba be ibsae. An mas bega imakoed be gunno, adi, be gangudoed. Agi geb be naoed.
23Ar Saúlʼdi mas abesulid. Degi-inigwele, e-sordamar-idudimaladdi ner-bundor ibmar-sogsadyob egi alamaknai guarmalad. Degisoggu, Saúl eba ibsassunnad. Saúl napagi-meremaidgi gwisgusad, geb gangi sigisad.
24Ner-bundor moli-bebe-nikad-wardadagwad-senigwad e-neggi-maid gwae oburgwisad. Deginbali, madubur omukusbalid, geb madu ina-sate yosad.
25Mas akwigusgua, ner-bundor, Saúlʼga, degi, e-sordamar-idudimaladga mas uksad. Saúl, e-sordaganmala, mas-guchad-sorba, a-mutikidbali, bela duurmakdemalad.
