1Nayan, pegkenamay, dimateng se ikesempolò teg lima se omay te peglowan i Tiberio kidoen te Roma. Si Poncio Pilato se gobirnador kidoen te Judiya. Limowan si Herod kidoen te Galiliya, aw kedowa din si Felipe se limowan kidoen te Itorya aw Trakoniti. Limowan si Lisanias kidoen te Abilina.
2Si Anas aw si Caifas se ontò pengolo te dakel simbahan te Jerusalem. Dalem te peg-ogpà i Juan batà i Zacarias kidoen te kebigtilan, insogò sikandin te Timanem megtoladà te kagi din.
3Yan se doun te miglegeb sikandin kidoen te kedepagan te wayeg te Jordan. Migtoladà sikandin te kedita te otaw te keilangan megselsel dan te salà aw bonyagan dan amon ipetaga-taga dan te pigwedad den te Timanem se salà dan.
4Pegtoladà din kenyan, tinoman din se pakang tapay insolat kidoen te kagi te Timanem ingkeliwat i Isaias, “Dinegen niyo se otaw doton te kebigtilan, aw dakel se kagi din, ‘Pegpeketagad kaw te pegdateng te Pengolo. Peg-inang kaw te metòlid, so domateng sikandin.’
5Peg-epengen se kedita te baog, aw inangen mepantal se kedita te bontod. Tòliden se dalan belegkong, aw inangen melenas se dalan megeled-geled. Keilangan iling kenyan se pegpeketagad niyo te kenyo pedowan,
6aw komità se kedita te otaw te megpelowà se Timanem te otaw lekat te salà.”
7Nayan, pegdineg te otaw te intoladà i Juan, medita dan se dimoton kandin amon bonyagan din dan. Minikagi si Juan, “Tay law. Iling kaw te memokan egkadas te apoy. Eked kaw pekelowà lekat te pelumun te Timanem te modi aldaw singed aw megselsel kaw.
8Aw migselsel kaw den, petega-tegahi niyo iyan pineokit te eg-inangen niyo. Ikà niyo eg-aneng-aneng te eked kaw pelumuni so bowad-bowad kaw i Abraham. Eneng-enengi niyo se kagi ko seini. Pengkey se menge bato seini te lanto te tanà, mepakay iyan inangen te Timanem menge bowad-bowad i Abraham amon somelilin dan kenyo.
9Iling kaw te kayo agpet pilayen. Aw kenà mèpiya se pongo te kayo, pilayen iyan aw sonogen.”
10Mig-insà se menge otaw, “Aw iling kay kenyan, eden lay se keilangan inangen day?”
11Timaba si Juan, “Seini se inangen niyo. Aw doen dowa saol niyo, begayi niyo se sebad diyà te otaw wedad saol din. Aw doen kànen niyo, ilasi niyo se doma otaw wedad kànen din.”
12Doen heman menge iskribinti dimoton ki Juan amon bonyagan din dan. Minikagi dan, “Sir, eden lay se keilangan inangen day?”
13Timaba si Juan, “Ikà niyo egpengabat te kwarta labi pa dakel diyà te impunù te gobirno.”
14Doen heman menge sondalo mig-insà diyà kandin, “Pengkey sikami, eden lay se keilangan inangen day?” Timaba si Juan, “Ikà niyo egleges te otaw amon mengabat kaw te kwarta dan. Ikà niyo heman egdimanda pineokit te kebolalaw amon begayan kaw te kwarta. Meneng pengkey eden se itandan te gobirno diyà kenyo, yan se keilangan kelubahan niyo.”
15Nayan, pegdineg te menge otaw te intoladà i Juan, egdowa-dowa se aneng-aneng dan aw sikandin se Misiyas pinelimanan dan.
16Meneng minikagi si Juan, “Egpemonyag a pineokit te wayeg. Meneng doen pa domateng labi pa melangkaw diyà kanak. Kenà botong se kelangkaw ko amon megtelaban a kandin pengkey meglebad a te sepatos din, so ontò sikandin melangkaw diyà kanak. Sikandin se memonyag kenyo pineokit te Espiritu Santo aw pineokit te apoy.
17Iling sikandin te otaw egpepalid te trigo eggiyeken din, amon isawol din te buun aw ibingen din doton te balay. Meneng se ohot aw tipig, yan se sonogen din te apoy kenà egkepadeng.”
18Iling kenyan se pegtoladà i Juan te Mèpiya Indan diyà te kedita te otaw, aw minikagi diyà kandan te keilangan tomolò dan te intoladà din.
19Se otaw limowan kidoen te Galiliya, yan si Herod. Sinila sikandin i Juan so medita se ininang din medaet. Nengagaw heman sikandin te nayi din si Herodias. Peg-inang din kenyan, simila si Juan kandin,
20aw labi pa medaet se ininang i Herod, so impekeleboso din si Juan.
21Meneng dalem pa te pegbonyag i Juan te kedita te otaw, migpebonyag heman si Jesus. Penga niyan, dalem te pegtawal-tawal i Jesus, neowang se langit,
22aw kinità dan se Espiritu Santo migpedanà diyà kandin iling te bawa te selepati. Dinineg dan heman se kagi te Timanem lekat te langit, “Sikona se Batà ko. Dakel se pedowan ko kamno, aw ontò a neluba kamno.”
23Pegtebò i Jesus te pegtoladà din, menge ketlowan se omay din. Neeneng-enengan te kedita te otaw te si Jesus se ontò batà i Jose. Si Jose se batà i Heli.
24Si Heli se batà i Matat. Si Matat se batà i Levi. Si Levi se batà i Melki. Si Melki se batà i Jana. Si Jana se batà i Jose.
25Si Jose se batà i Matatias. Si Matatias se batà i Amos. Si Amos se batà i Nahum. Si Nahum se batà i Esli. Si Esli se batà i Nagai.
26Si Nagai se batà i Maat. Si Maat se batà i Matatias. Si Matatias se batà i Semei. Si Semei se batà i Jose. Si Jose se batà i Joda.
27Si Joda se batà i Joana. Si Joana se batà i Resa. Si Resa se batà i Sorobabel. Si Sorobabel se batà i Salatiel. Si Salatiel se batà i Neri.
28Si Neri se batà i Melki. Si Melki se batà i Addi. Si Addi se batà i Cosam. Si Cosam se batà i Elmodam. Si Elmodam se batà i Er.
29Si Er se batà i Josue. Si Josue se batà i Eliezer. Si Eliezer se batà i Jorim. Si Jorim se batà i Matat. Si Matat se batà i Levi.
30Si Levi se batà i Simeon. Si Simeon se batà i Juda. Si Juda se batà i Jose. Si Jose se batà i Jonan. Si Jonan se batà i Eliakim.
31Si Eliakim se batà i Melea. Si Melea se batà i Mainan. Si Mainan se batà i Matata. Si Matata se batà i Natan. Si Natan se batà i David.
32Si David se batà i Isai. Si Isai se batà i Obed. Si Obed se batà i Boos. Si Boos se batà i Salmon. Si Salmon se batà i Naason.
33Si Naason se batà i Aminadab. Si Aminadab se batà i Aram. Si Aram se batà i Arni. Si Arni se batà i Esrom. Si Esrom se batà i Fares. Si Fares se batà i Juda.
34Si Juda se batà i Jacob. Si Jacob se batà i Isaac. Si Isaac se batà i Abraham. Si Abraham se batà i Tare. Si Tare se batà i Nakor.
35Si Nakor se batà i Serug. Si Serug se batà i Ragaw. Si Ragaw se batà i Peleg. Si Peleg se batà i Eber. Si Eber se batà i Sala.
36Si Sala se batà i Cainan. Si Cainan se batà i Arfaksad. Si Arfaksad se batà i Sem. Si Sem se batà i Noe. Si Noe se batà i Lamek.
37Si Lamek se batà i Matusalen. Si Matusalen se batà i Enok. Si Enok se batà i Jared. Si Jared se batà i Mahalaleel. Si Mahalaleel se batà i Cainan.
38Si Cainan se batà i Enos. Si Enos se batà i Set. Si Set se batà i Adam. Si Adam se batà te Timanem.
