1Wedà kenamay, miglegeb si Jesus aw timeped te menge lonsod aw doma ogpeanan. Migtoladà sikandin te menge otaw te Mèpiya Indan tepad te peglowan te Timanem. Timaking heman kandin se sempolò teg dowa tinoledaan pinemallì din.
2Timaking heman kandin se menge bayi tapay pinegolian din aw pinelowaan din te bosaw. Sikandan si Maria tege Magdala pinelowaan te pito se bosaw,
3aw si Juana sìyan esawa i Cusa sebad opisyal i Herod, aw si Susana, aw medita heman se doma. Se menge bayi sìyan, yan se migtabang ki Jesus aw menge doma din.
4Gayed dimoton ki Jesus se menge otaw lekat te kedita te lonsod. Pegketipon te ontò medita otaw, mig-indan si Jesus te tegdeyanan, kagi din,
5“Doen otaw dimoton te pawà amon menabog te benì, so yan se ketanem te pegpenanem din. Pegsabog din, doen benì nesabog diyà te dalan, aw negìtan iyan te otaw aw kinaen te menge manok te kebenesan.
6Doen heman benì nesabog diyà te tanà kebeto-betowan. Pegtobò niyan, nelanes aw nematay te wedà kenamay so nepangkag se tanà.
7Doen heman benì nesabog diyà te pinonoan te sagbet doen tigis. Timilles heman se sagbet doen tigis aw kinelep se menge tobò aw nematay.
8Meneng doen benì nesabog diyà te melambò tanà. Yan se timilles aw minongo te ginatos.” Penga niyan, minikagi si Jesus te dakel se kagi din, “Keilangan menenalan se kedita niyo doen telinga.”
9Nayan, mig-insà se menge tinoledaan i Jesus aw eden se kedegdagan te tegdeyanan sìyan.
10Minikagi si Jesus, “Sikiyo se pinetega-tegahan te Timanem te kebenalan tepad te peglowan din. Meneng olò pineokit te tegdeyanan se pegtoladà ko te menge doma otaw amon pengkey tomengteng dan, meneng eked dan kità te kedegdagan niyan. Pengkey domineg dan, meneng eked dan ketaga-taga te kebenalan.”
11“Seini se kedegdagan te tegdeyanan sìyan. Se benì insabog, yan se kagi te Timanem.
12Na, se benì nesabog diyà te dalan, yan se iling te menge otaw domineg te kagi te Timanem intoladà. Penga niyan, doen inangen i Satanas amon kelibelan dan se kagi te Timanem dinineg dan, so ibeg i Satanas, eked dan pemenal aw eked dan heman pekelowà lekat te salà.
13Nayan, se benì nesabog diyà te tanà kebeto-betowan, yan se iling te otaw domineg te kagi te Timanem, aw meluba dan, aw tomolò dan kenyan te eked kenamay. Meneng aw meboyo dan, tenanan dan se pinemenalan dan, so iling dan te tinanem wedad nael dalid.
14Nayan, se benì nesabog diyà te pinonoan te sagbet doen tigis, yan se iling te otaw ontò domineg te kagi te Timanem intoladà. Meneng penga niyan, wedad ontong dan, so dàgen dan te ibeg dan megkeyaman, aw ibeg dan te keluba te keneyonan, aw doma ibeg te pedowan dan.
15Meneng se benì nesabog diyà te melambò tanà, yan se iling te otaw ontò melobos se pedowan dan. Aw domineg dan te kagi te Timanem, ontò dan iyan egtoloen. Egtayod dan te kelimahan lamig doen ontong dan.”
16“Aw menemtem se otaw te solò, eked din iyan sengkobi. Eked din heman elesi doton te siyong te katri. Meneng mèpiya aw isawol din iyan diyà te kelengkawan amon keenyagan se didalem te balay.
17Iling heman kenyan, wedad in-eles songkani eked kitai te modi aldaw. Wedad heman imbolon songkani eked keindan te modi aldaw.
18“Nayan, keilangan toloen niyo se dinineg niyo. Se otaw kominawà te kebenalan, yan se dogangan te kebenalan. Meneng se otaw eked kinawà te kebenalan, yan se pegwedadan te kebenalan.”
19Nayan, pegtoladà i Jesus, dimateng se inay din aw menge kedowa din. Meneng wedà dan pekedapag diyà kandin, so ontò medita se otaw netipon kidoen kandin.
20Doen otaw minikagi diyà kandin, “Doton te lowà se inay no aw menge kedowa nikaw. Meibeg dan ekon megkità kamno.”
21Timaba si Jesus, “Se menge otaw domineg te kagi te Timanem aw tomolò kenyan, yan se meinang inay ko aw menge kedowa ko.”
22Nayan, doen sebad aldaw minikagi si Jesus diyà te menge tinoledaan din, “Mèpiya aw matas kidon doton dipag te lanaw.” Penga niyan, simakay dan te belangay.
23Pegpesalo dan doton, neketedogi si Jesus. Wedà kenamay, dinetengan dan te kelamag ontò mebandes. Dakel se wayeg nekeawop te belangay, aw agpet dan neteled.
24Penga niyan, linoka dan si Jesus, kagi dan, “Pengolo, melemes kidon den.” Neloka si Jesus aw sinagda din se kelamag aw dakel balud. Timunung se kelamag aw migkelinaw se lanaw.
25Penga niyan, minikagi si Jesus, “Wedà pa kedì kelobos se pegsalig niyo kanak.” Meneng nelemitan dan. Nepela dan aw migpebelaw-belaway dan, kagi dan, “Ontò sikandin metolos, so pengkey kelamag aw balud timolò kandin.”
26Penga niyan, dimeleg dan doton medapag te Gerasa dipag te probinsya te Galiliya.
27Pegtenà i Jesus, kinità din se tege Gerasa simongon kandin. Dinetengan sikandin te bosaw, aw nenamay den migpetabeg-tabeg. Kenà eg-ogpà diyà te balay, meneng eg-ogpà doton te menge lebenganan.
28Pegkità din ki Jesus, mig-olangag sikandin, aw limongken diyà ki Jesus, aw minikagi te dakel se kagi din, “Jesus, Batà te Timanem ontò melangkaw, ikà egsamok kanak. Memoyò a den diyà kamno, ikà bag egpeeleg kanak.”
29Yan se inikagi te bosaw, so pinunuan i Jesus se bosaw amon lomowà diyà te otaw. Melikit egdetengan te bosaw se otaw sìyan, aw yan eggeposen sikandin te doma otaw te sengkalì, aw egpentongan dan sikandin, aw gayed dan egbentayan. Meneng egkebogtò se ipeggapos kandin aw eg-ibingen sikandin te bosaw doton te kebigtilan.
30Na, mig-insà si Jesus, “Sinu lay se ngadan nikaw?” Timaba sikandin, “Minelalan.” Yan se intaba din so ontò medita se bosaw egdateng kandin.
31Gayed dan egpemoyò diyà ki Jesus te eked din dan peibingi doton te kilot aw ipelumun.
32Ontò medita se osa nenowal doton te bontod medapag. Nemoyò se menge bosaw diyà ki Jesus aw mepakay diyà kandin malin dan doton te menge osa sìyan. Yan impealin din dan.
33Yan limowà se menge bosaw lekat te otaw aw minalin dan doton te osa. Penga niyan, kimagnan se kedita te osa pesalo te keba, aw kimahang dan doton te lanaw, aw nelemes dan.
34Pegkità te menge telediyaga te osa kenyan, kimadas dan aw mig-indan dan tepad kenyan doton te lonsod aw kedepagan niyan.
35Penga niyan, dimoton se menge otaw inindanan dan amon komità dan kenyan. Pegdateng dan doton ki Jesus, kinità dan se otaw pinelowaan te bosaw. Nenenoo sikandin kidoen te dapag i Jesus, aw nenelowal den, aw migkèpiya den sikandin. Pegkità dan kenyan, nelemitan dan.
36Inindanan dan heman te menge otaw kimità te pegpelowà i Jesus te bosaw lekat kandin.
37Penga niyan, nemoyò se kedita te tege Gerasa te mesayo si Jesus lekat kidoen, so ontò dan nelemitan. Penga niyan, simakay si Jesus te belangay amon molì doton dipag.
38Meneng nemoyò se otaw pinelowaan te bosaw aw mepakay sikandin tomaking. Meneng wedà din petekingi, so inikegiyan i Jesus,
39“Olì ka den aw peg-indan ka diyà te menge kedomaan no tepad te mèpiya ininang te Timanem diyà kamno.” Penga niyan, nesayo sikandin aw mig-indan diyà te kedita te otaw te lonsod tepad te mèpiya ininang i Jesus diyà kandin.
40Peg-olì i Jesus doton dipag te lanaw, medita se otaw simongon kandin, so tapay dan migtagad kandin.
41Penga niyan, dimoton ki Jesus se sebad obanen te simbahan te Judiyo, ngadan din si Jairo. Limongken sikandin diyà ki Jesus aw nemoyò te domoton si Jesus te balay din,
42so ontò netigdaan se batà din bayi. Yan se temisa batà din, aw menge sempolò teg dowa se omay din. Penga niyan, timaking si Jesus kandin. Medita se otaw timaking ki Jesus aw migpesegsegay dan kidoen te dalan.
43Nayan, doen sebad bayi timaking kandin pigdipenogan te sempolò teg dowa se omay, aw migkewedad se kedakel te kedònan din imbayad te menge doktor, meneng wedad otaw nekebolong kandin.
44Pegtaking din ki Jesus, migpedapag diyà te getan din aw nemaed olò te toktok te saol din. Pegketà, negolì se mesakit din.
45Penga niyan, mig-insà si Jesus, “Sinu lay se nemaed kanak?” Meneng wedad otaw mig-indan. Minikagi si Pedro, “Pengolo, ikà eg-insà aw sinu se nemaed kamno, so pigdenganan ka te medita otaw.”
46Meneng minikagi si Jesus, “Doen gina otaw nemaed kanak, so mig-imanman a te doen tolos limowà lekat kanak amon megpegolì te otaw.”
47Nayan, pegketaga-taga te bayi te eked keeles se ininang din, migpedapag sikandin diyà ki Jesus aw tinegangtang tandà te lamit din. Limongken sikandin diyà ki Jesus aw mig-indan aw eden se tod din. Dimineg heman se kedita te otaw te kagi din te negolì den se mesakit din te lekat te pegpemaed din ki Jesus.
48Minikagi si Jesus, “Atà, simalig ka diyà kanak, aw yan se doun te negolian ka. Olì ka den. Ibeg ko doen kelinaw te pedowan nikaw.”
49Telobo pa minikagi si Jesus diyà te bayi, dimateng se otaw lekat te balay te obanen te simbahan, aw minikagi diyà ki Jairo, “Nematay den se batà nikaw. Wedad den kekemowan te pegpedeleg no te Menenoladà doton te balay nikaw.”
50Meneng pegdineg i Jesus kenyan, minikagi sikandin, “Ikà egkepuluk, meneng salig ka diyà kanak, so meantay pa sikandin.”
51Pegdateng dan doton te balay i Jairo, wedad doma otaw impetaking i Jesus doton didalem, meneng olò si Pedro, si Juan, si Santiago, aw amay aw inay te batà.
52Pengkey migkelag aw migmatay se kedita te doma otaw, meneng minikagi si Jesus, “Ikà egkelag, so wedà kematay se batà. Olò sikandin timedogi.”
53Meneng nebebeyatan dan si Jesus, so tapay dan netegahan te ontò den nematay se batà.
54Meneng pinemàdan din se belad te batà, aw minikagi te dakel se kagi din, “Atà, enaw ka.”
55Penga niyan, neantay sikandin aw minenaw. Penga niyan, migpunù si Jesus te ipekaen dan sikandin.
56Nepela se amay aw inay din te neantay sikandin. Meneng migpunù si Jesus te wedad palos otaw mepakay indanan dan tepad te peg-antay din te batà sìyan.
