1Minikagi si Jesus diyà te menge tinoledaan din, “Doen gayed mekebaet te pegpemenal te kedita te otaw, meneng mekelelayò se otaw eg-inang kenyan, so ontò sikandin ipelumun.
2Labi pa mèpiya aw iketan se lieg din te dakel bato aw idagdag doton te lawod, amon eked din kebàti se pegpemenal te mengisù migpesakop diyà kanak, pengkey sebad.
3Keilangan megpekeimanday kaw. “Na, aw doen otaw meg-inang te salà diyà kenyo, ikagi kaw diyà kandin tepad te salà ininang din. Aw megselsel sikandin, pegwedadi niyo se salà ininang din.
4Pengkey mekepito sikandin peg-inang te medaet diyà kenyo dalem te sebad olò se aldaw, kelikit te pegselsel din kenyan, keilangan pegwedaden niyo se kedita te salà din.”
5Minikagi se menge sogounun i Cristo, “Lobosi se pegsalig day diyà kamno.”
6Minikagi se Pengolo, “Mikagi a den diyà kenyo te pengkey deitek pa se pegsalig niyo diyà kanak iling te kedeitek te benì te mostasa, mekebatog kaw mikagi diyà te dakel kayo te pispisen din se lawa din aw malin doton te dagat, aw tomolò iyan kenyo.”
7“Simpana doen sineligan egdaro aw egtonggò te karniro te amo din. Aw mepenga se pegterbaho din doton te pawà, aw domoton te balay, eked kepakay aw sikandin se monà ipekaen te eked pa kaen se amo din.
8Meneng onà megpunù se amo te keilangan meg-inang se sineligan te kànen aw meglamak kenyan. Penga te pegkaen te amo, yan mepakay aw komaen se sineligan.
9Mepakay heman aw eked pesiontongi te amo se sineligan timolò te punù din, so yan se terbaho din.
10Iling kaw heman te sineligan sìyan, so penga te pegtolò niyo te kedita te punù te Timanem diyà kenyo, eked kaw pesiontongi, meneng keilangan mikagi kaw diyà kandin, ‘Eked kay nikaw duyuni, so olò day ininang se keilangan toloen day.’”
11Pegpesalo i Jesus doton te Jerusalem, minokit sikandin diyà te pigkitaan te probinsya te Samarya aw Galiliya.
12Pegdateng din doton te sebad baryo, nesongonan sikandin te sempolò otaw tompigun. Pengkey mediyò dan pa,
13meneng timawal dan, “Jesus, Pengolo, keidowi kay bag.”
14Pegkità din kandan, minikagi sikandin, “Doton kaw te menge pengolo te simbahan aw pegpekità kaw diyà kandan te lawa niyo.” Pegdoton dan, negolian se kedita dan te wedà dan pa dateng.
15Doen sebad otaw kidoen kandan, pegkità din te negolian den, dimuyun sikandin te Timanem te dakel se kagi din, aw limikò sebad din diyà ki Jesus.
16Limongken diyà ki Jesus, aw migpesiontong heman sikandin. Tege Samarya se otaw sìyan.
17Penga niyan, minikagi si Jesus, “Pengkey sempolò se kedita dan pinegolian ko, meneng sidebok se otaw limikò amon domuyun te Timanem, aw kenà sikandin Judiyo. Nepela a, so wedà heman likò se siyam Judiyo doma din.”
19Minikagi heman si Jesus diyà te otaw sìyan negolian den, “Tindeg ka den, aw mepakay ka den mesayo. Negolian ka so simalig ka diyà kanak.”
20Doen menge Parisiyo mig-insà ki Jesus aw kano pegtebò se Timanem lomowan. Timaba sikandin, “Aw megtebò se Timanem lomowan, wedad pengilala ipekità din diyà kenyo.
21Wedad otaw mekeikagi, ‘Dini den se peglowan din.’ Wedad heman otaw mekeikagi, ‘Kidoen se peglowan din.’ Eneng-enengi niyo ini. Eglowan den se Timanem dini kenyo.”
22Penga niyan, minikagi si Jesus diyà te menge tinoledaan din, “Doen aldaw domateng aw meibeg kaw peden te megtebò a lomowan Timanem Migpekeotaw, meneng keilangan megtagad kaw pa kenyan.
23Doen kwani otaw mikagi, ‘Kidoen se Misiyas.’ Doen heman doma otaw mikagi, ‘Dini den sikandin.’ Meneng peg-ogpà kaw. Ikà niyo egtaking kandan,
24so ontò metaen se peglikò ko iling te kilem ontò somiblat doton te kebelad te langit aw kitaen te kedita te otaw. Iling heman kenyan se pegdateng ko Timanem Migpekeotaw.
25Meneng eked a likò singed aw ontò a elegen, aw onà a kuluwan te menge otaw te aldaw seini.
26Aw lomikò a Timanem Migpekeotaw, medita se otaw eked peketagad te pegdateng ko, iling te otaw gebii wedà penenalan ki Noe.
27Gayed dan egpengaen, aw eg-inem dan, aw egpepengognanay dan, lamig te aldaw te pegsakay i Noe aw pamilya din diyà te arka. Meneng negelà se menge doma otaw so nesàban dan te pegkelinep te tanà te wayeg, aw nelemes se kedita dan.
28Wedà heman peketagad se otaw gebii dalem te peg-ogpà i Lot doton te Sodoma. Gayed dan heman egpengaen, aw eg-inem dan, aw egbayad dan, aw egpemeligyà dan, aw egpenanem dan, aw eg-inang dan te balay.
29Meneng aldaw te pegkesayo i Lot lekat te Sodoma, negelà se kedita te doma tege Sodoma, so nematay dan te apoy aw esopri nedagdag lekat te langit.
30Kesàban heman iling kenyan se otaw kenà egpeketagad te aldaw aw ipekità a Timanem Migpekeotaw.
31“Aw domateng se aldaw sìyan, eked awop diyà te balay din se otaw doton te lowà amon ebaten din se kedònan, meneng keilangan tenanan din se kedita. Eked heman olì se otaw egterbaho doton te pawà, meneng keilangan komadas.
32Eneng-enengi niyo te nebaloy asin se esawa i Lot te peglingì din diyà te lonsod tinenanan dan.
33Pengkey ibeg te otaw megkelayat se omol din, meneng kunù din gayed matay. Meneng aw mepakay diyà te otaw pengkey imetayan sikandin, begayan sikandin te kaling pedowan wedad temanan.
34Penenalan kaw te kagi ko. Aw domateng se aldaw sìyan, pengkey tomedogi se dowa otaw kidoen te sebad ikam, meneng ipetaking se sebad, aw tenanan se sebad.
35Pengkey meglegiling se dowa bayi, meneng ipetaking se sebad, aw tenanan se sebad.
36Pengkey megterbaho se dowa meama doton te pawà, meneng ipetaking se sebad, aw tenanan se sebad.”
37Mig-insà se menge tinoledaan din, kagi dan, “Pengolo, kenan lay iyan keinang?” Minikagi si Jesus, “Pengkey kenan se lawa te nematay, yan se ketiponan te menge manok egpengaen te lawa te nematay.”
