Hiop 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Mürin, Elifas ewe re Teman a pälüeni Hiop,

²“Ifa usun, eman aramas a tongeni lomot ngeni Kot? Ellet, ätewe mi tipachem a chök lomot ngeni püsin i.

³Ifa usun, epwe lomot ngeni Ewe mi Unusen Manaman are ka föri mine a pwüng? Ifa usun, epwe feiöch ren om föför mi unusöch?

⁴Ifa usun, Kot a amirituk ika a atookolong lon kapwüng pokiten om niuokusiti i?

⁵Apwi, a fokun watte om föföringau. Esap wor müchün om kewe tipis.

⁶Pun ka echimwa pwiüm kewe pwe repwe ngonuk asisilen ar pwonen liwinimang, nge esap wor popun, ka pwal angei seniir üfer pwe ra selela.

⁷Kosap ngeni ekewe chon malülü ünümer koluk, kosap pwal amongöü chokewe mi echik.

⁸En ka aea manom pwe kopwe fanüeni ewe fanü, nge ren om iteföüla ka nonom lon.

⁹Ka tinala ekewe fefin mi mä pwülüer fän ar asöülapö o angei seni ekewe mi mäsen mine a wor rer.

¹⁰Iei mine ekewe sär ra nom pwelin ünükum, nge eniweniw a müttir aniuokusuk.

¹¹Om saram a rochopwakala pwe kosap tongeni küna mwom, nge koluk mi pumong a pwölükela.

¹²Ifa usun, Kot esap nom lon ewe leni tekia lon läng? Nengeni usun tekian ekewe fü mi fokun toau.

¹³Nge en ka apasa, ‘Met Kot a tongeni silei usi? Ifa usun an epwe tongeni föri kapwüng won mine a nom fän rochokichin rochopwak?

¹⁴Ekewe kuchu mi kirochoroch ra pwölüela mesan pwe esap tongeni künakich, lupwen a fetalfeil lon läng.’

¹⁵Ifa usun, kopwe chök fetal won ewe alen lom ekewe aramas mi föföringau ra fen fetal won?

¹⁶Eman a müttir angerela me mwen ar fansoun, ar longolong a tala ren koluk.

¹⁷Ra üreni Kot, ‘Kopwe feila senikem,’ ra pwal apasa, ‘Met Ewe mi Unusen Manaman epwe tongeni föri ngenikem?’

¹⁸Iei mwo nge Kot a fen amasoua imwer ren mettoch mi mürina. Nge ngang üa atoauala seniei än ekewe aramasangau öüröür.

¹⁹Ekewe chon pwüng ra pwapwa, nge chokewe esap wor ar tipis ra takirin ämängaua ekewe aramasangau, lupwen ra küna ar feiengau.

²⁰Ra apasa, ‘Ellet, ekewe chon oputakem ra kärila, nge mine ra likitala seni wöür, ekkei a kenala.’

²¹Kopwe tipeeu ngeni Kot o kinamwe ngeni. Ren ei, feiöch epwe toruk.

²²Kopwe angei öüröürom seni o iseis an kewe kapas lon lelukom.

²³Are kopwe liwinsefäl ngeni Ewe mi Unusen Manaman o püsin atekisonok, are kopwe aükätiu pwüngingau mi fis lon imwom,

²⁴are kopwe pöütala om kolt lepwül, nge om kolt seni Ofair kopwe pöütala lein ekewe föün lon öüwö,

²⁵mürin Ewe mi Unusen Manaman epwe om kolt pwal om silifer mi aüchea.

²⁶Iwe, mürin kopwe pwapwa ren Ewe mi Unusen Manaman o anetäi mesom ngeni Kot.

²⁷Kopwe iotek ngeni, nge i epwe aüselingok, kopwe pwal föri pwüngün om kewe pwon.

²⁸Meinisin mine ka ekiekietä epwe fisitä, nge saram epwe tittin won alom kewe.

²⁹Pun Kot a atekisona ekewe chon lamalamtekia, Nge a amanaua chokewe mi tekison.

³⁰Epwe pwal amanauok inamwo ika ka tipis, epwe angasokola, are kopwe föri mine a pwüng.”