Yoobu 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Yerɑ Elifɑsi, Temɑɡii u Yoobu wisɑ u nɛɛ,

²tɔnu u ko n ɑrufɑɑni mɔ Gusunɔn mi? Aɑwo! Tɔnu ù n sɑ̃ɑ dee dee, win tiin ɑrufɑɑniwɑ.

³A tɑmɑɑ yèn sɔ̃ ɑ sɑ̃ɑ ɡemɡii, Gusunɔ u yen ɑre wɑɑmɔ? À n sĩimɔ dee dee ɑrufɑɑni yerɑ̀ u wɑɑmɔ.

⁴A tɑmɑɑ yèn sɔ̃ ɑ nùn mɛm nɔɔwɑmmɛ, yen sɔ̃nɑ u nun sɛɛyɑsiɑmɔ? A tɑmɑɑ yèn sɔ̃ ɑ nùn nɑsie, yen sɔ̃nɑ u nun sirimɔ?

⁵Aɑwo. Wunɛn torɑ dɑbinun sɔ̃nɑ u nun sɛɛyɑsiɑmɔ. Wunɛn kɔ̃sɑ yɑ mɑɑ kpɑ̃.

⁶Domi ɑ wunɛn berusebun yɑ̃nu tɔrubɑ mwɑ, mɑ ɑ bu deri tereru.

⁷A ǹ wi nim nɔru ɡɑ mɔ̀ nim kɑ̃ u nɔ. Mɛyɑ ɑ ǹ mɑɑ wi ɡɔ̃ɔrɑ mɔ̀ dĩɑnu kɑ̃ u di.

⁸A rɑɑ sɑ̃ɑwɑ dɑmɡii kɑ bɛɛrɛɡii, mɑ ɑ tem mɛ kpuro mɔ.

⁹A ɡɔminibu ɡirɑwɑ bɑ doonɑ nɔm dirɑ, ɑ ǹ bu somi. Mɑ ɑ ɡobekubɑn dɑm buɑ.

¹⁰Yen sɔ̃nɑ yɛ̃ri nun wɑ̃ɑsi beri berikɑ, mɑ bɛrum nun mwɑ subɑru sɔɔ.

¹¹Mɑ yɑm wɔ̃kurɑ nun wukiri nɡe nim bwee bɑkɑru, ɑ ǹ mɑɑ yɑm wɑɑmɔ.

¹²Sɑ yɛ̃ mɑ Gusunɔ u wɑ̃ɑ wɔllɔ. A mɛɛrio ɑ wɑ sere mi kperi wɑ̃ɑ.

¹³Kɑ mɛ, ɑ ɡerumɔ ɑ mɔ̀, mbɑ Gusunɔ u yɛ̃. U ǹ kpɛ̃ u tɔnu siri ɡuru wiru sɔɔ.

¹⁴Guru wiru tɑ sinum mɔ, u ǹ kpɛ̃ u ɡɑ̃ɑnu wɑ min di. U sirenɛwɑ wɔllu mi tɔnɑ.

¹⁵Yoobu, ɑ yɔ̃rɑriwɑ ɑ kɔ̃sɑn kowobun yirɑ ye swĩi?

¹⁶A ǹ yɛ̃ mɑ bɑ bu ɡo ben ɡɔɔn sɑɑ yu sere turi? Bɑ doonɑ nɡe ɡɑnɑ ye yɑ nim diirɑ.

¹⁷Tɔn ben bweseru bɑ rɑ rɑɑ Gusunɔ sɔ̃wɑ bu nɛɛ, u bu derio sɛ̃ɛ. Mbɑ wi Dɑm kpuroɡii u koo kpĩ u bu kuɑ.

¹⁸N deemɑ Gusunɔ wiyɑ u rɑɑ ben yɛnun dukiɑ kuurɑsiɑ. Adɑmɑ bɑ ǹ nùn sɑɑwɑrɑ kue, ye bɑ ben himbɑ yiimɔ.

¹⁹Be bɑ ɡem swĩi bɑ koo yɛ̃ɛri, bɑ̀ n tɔn kɔ̃so wɑ u kɑm kuɑ. Be bɑ ǹ tɑɑrɛ mɔ, bɑ koo yɛ̃ɛwɑ bu nɛɛ,

²⁰wee, bɛsɛn yibɛrɛ u kɑm kuɑ, win dukiɑ ye u mɔ kpuro, yɑ dɔ̃ɔ mwɑɑrɑ.

²¹Yoobu, ɑ kɑ Gusunɔ doro, kpɑ ye kpuro yu nun sɑnɔ kuɑ. À n kuɑ mɛ, wunɛn nuku dobu koo wurɑmɑ.

²²A win sɔ̃ɔsiru swɑɑ dɑkio kpɑ ɑ tu nɛnɛ ɡɔ̃ruɔ.

²³À n kɑ kɔ̃sɑ tondɑ mɑ ɑ wurɑmɑ, Dɑm kpuroɡii koo nun wunɛn yellun wɑ̃ɑru wesiɑ.

²⁴A wunɛn wurɑ ye ɑ mɔ kɔ̃ɔwɔ temɔ. Kpɑ ɑ wunɛn kpee ɡobiɡiru deri dɑɑrun torɑɔ,

²⁵kpɑ Dɑm kpuroɡii u ko wunɛn wurɑ kɑ wunɛn sii ɡeesu.

²⁶Sɑɑ yerɑ kɑɑ n nuku dobu mɔ Gusunɔ Dɑm kpuroɡiin mi. Kpɑ ɑ nùn nɑɑnɛ ko, ɑ nùn wunɛn wuswɑɑ sɔ̃ɔsi.

²⁷À n nùn kɑnɑ u koo nun wisi, kpɑ ɑ wunɛn nɔɔ mwɛɛnu yibiɑ.

²⁸Ye ɑ niɑ kuɑ kpuro, yɑ koo koorɑwɑ. Wunɛn swɛɛ yi ɑ swĩi kpuro, yi ko n dɛɛrewɑ.

²⁹À n wɑ̃ɑ nɔni swɑ̃ɑru sɔɔ, kɑɑ tii kɑwɑ ɑ nɛɛ, tii suɑbɑ bu nun tu kpɛ̃ɛ. Kpɑ Gusunɔ u nun wɔlle suɑ.

³⁰U koo mɑm tɑɑrɛɡii yɑrɑ kɔ̃sɑn di, wunɛn dɛɛrɑrun sɔ̃.