Ɩsɑyii 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

¹Tɑcɑɑ heelɑ tɔm ntiɣi Amɔtɩ pǝyɑlʋ Ɩsɑyii tɔɣɔlɔ. Toosee tɑɑ kɛ́ ɩ heelɑ-ɩ Yutɑ nɑ Yosɑlɛm pɑ tɔm.

²Tɑcɑɑ tǝyɑɣɑ wɛ pʋɣʋ tɔɔ kɛ́. Kʋyɑkʋ nɑkʋlɩ pʋɣʋ ŋkʋ kɩɩ kʋlɩ nɑ kʋ́ cɑɣɑ pɔɔŋ nyɔɔŋ tɑɑ nɑ kʋ tɛɛ pulɑsɩ. Piitimnɑɑ tǝnɑ kɑ́ polo kʋ tɔɔ.

³Yǝlɑɑ pɑɣɑlɛ kɑ́ polo nɑ pɑ́ tɔ sɩ: Ɩ́ kɔɔ nɑ tǝ́ kpɑ Tɑcɑɑ pʋɣʋ tɔɔ kɛ́ Yɑkɔpʋ Ɩsɔ tǝyɑɣɑ. Nɑ ɩ́ hʋlɩ-tʋɣʋ ɩ mpɑɑŋ nɑ tǝ́ tǝŋ ɩ ɩkpɑtɛ. Mpi tɔ, Siyɔŋ ɩcɑtɛ Yosɑlɛm tɑɑ kɛ́ Tɑcɑɑ kiiu nɑ ɩ tɔm kɑ́ lɩɩnɑ.

⁴Ɩ kɑ hʋʋnɑ piitimnɑɑ nɑ ɩ́ loli yǝlɑɑ pɑɣɑlɛ. Ɩlɛnɑ pɑ́ lu pɑ lɑɣɑlɛɛ kɛ ɑkuŋ, nɑ pɑ ŋmɑntɑɑsɩ kɛ lemsenɑɑ. Piitim nɑpǝlɩ pǝ kɑɑ kʋlɩ lɛmpɩ tɔɔ. Pǝ́cɔ́ nɔɣɔlʋ kɑɑ tɑsɑ yoou kpɛlǝmʋɣʋ.

⁵Yɑkɔpʋ lʋlʋɣʋ nyǝ́mɑ mɛ ɩ́ kɔɔ nɑ tǝ́ tɔ́ Tɑcɑɑ nyɑɑlǝm tɑɑ.

⁶Tɑcɑɑ lɔwɑ ɩ yǝlɑɑ Yɑkɔpʋ lʋlʋɣʋ nyǝ́mɑ. Mpi tɔ, ilim tǝlɩɩlɛ tɔɔ nyǝ́mɑ kʋlɑpʋtʋ sunɑ pɑ hɛkʋ. Pɑ lɑkɩ topotopo ɩsɩɩ Filiisi nyǝ́mɑ. Pǝyele pɑ́ nɑ kpɑɩ nyǝ́mɑ pɑ kpɛntǝɣɩ nɔɔsɩ.

⁷Wʋlɑ nɑ liɣitee su pɑ tɛtʋ tɑɑ, pɑ wɛnɑʋ fɛɩ tǝnɑɣɑ. Kpɑɣɑnǝŋ su pɑ tɛtʋ tɑɑ, yoou kɛɛkɛnɑɑ fɛɩ kɑlʋɣʋ.

⁸Tɩɩŋ kʋlɑlɑɑŋ su pɑ tɛtʋ tɑɑ kɛ́, pɑ́ luŋiɣi mpi pɑ lɑpǝnɑ pɑ niŋ tɔ.

⁹Pǝ tisɑ yʋlʋ kɛ́ nɑ pǝ́ lumsi-ɩ. Tɑcɑɑ tɑɑ wii-wɛ.

¹⁰Ɩ́ sʋʋ kʋkpɑmǝŋ tɛɛ nɑ ɩ́ ŋmɛlɩ tɛtʋ tɛɛ. Ɩ́ hɑtǝlǝnɑ Tɑcɑɑ sɔɣɔntʋ sɔsɔɔntʋ nɑ ɩ teu sɔsɔɔm.

¹¹Kɑlɑmpɑɑnɩ nyǝ́mɑ kɑ́ kɑ nyɔɔŋ, nɑ pǝ́ tisi ɩsǝcɑʋtʋnɑɑ. Tɑcɑɑ tike ntɛ́ sɔsɔ kɛ kʋyɑkʋ ŋkʋ.

¹²Mpi tɔ, Pǝ tǝnɑ pǝ tʋ Tɑcɑɑ sɩɩ kʋyɑkʋ nɑkʋlɩ. Kʋ tɑɑ kɛ́ ɩ kɑ́ hʋʋnɑ kɑlɑmpɑɑnɩ nyǝ́mɑ, nɑ ɩsǝcɑʋtʋnɑɑ, nɑ mpɑ pɑ hɔŋ pɑ tɩ tɔ nɑ ɩ́ tisi-wɛ.

¹³Ɩ kɑ wɑkǝlɩ Lipɑŋ nɑ Pɑsɑŋ pǝ tɩɩŋ kʋkʋlǝŋ tǝnɑ.

¹⁴Nɑ pɔɔŋ kʋkʋlǝŋ nɑ pulɑsɩ kʋkʋlɑsɩ tǝnɑ.

¹⁵Nɑ ɑtɛ nɑ ɩsɔ kutuluŋ sɔsɔɔŋ tǝnɑ, nɑ koloosi sɔsɔɔŋsɩ ɑcɑlɛɛ tǝnɑ.

¹⁶Nɑ kpɩɩlǝŋ sɔsɔɔŋ wei ɩ puki Tɑɑsisi tɔ ɩ tǝnɑ, nɑ wontu nti tǝ tǝnɑ pɑ nyɩɩlǝɣɩ tɔ.

¹⁷Pɩɩ tisi yǝlɑɑ kɑlɑmpɑɑnɩ kɛ́ nɑ pɑ ɩsǝcɑʋ, Tɑcɑɑ tike ntɛ́ sɔsɔ kɛ kʋyɑkʋ ŋkʋ.

¹⁸Tɩɩŋ kʋlɑlɑɑŋ tǝnɑ kɑ́ sɑɑlɩ yem.

¹⁹Yǝlɑɑ kɑ́ sʋʋ kʋkpɑmǝŋ tɛɛ, nɑ tɛtʋ tɛɛ sɩ, pɑ́ hɑtǝlǝnɑ Tɑcɑɑ toŋ sɔsɔɔŋ nɑ ɩ pɑ́ɑ́nɑ́, kɛ wɑɑtʋ wei ɩ kɑ́ kɔɔ sɩ ɩ nyɑɑsǝɣɩ tɛtʋ tɔ.

²⁰Kʋyɑkʋ ŋkʋ kʋ wule yǝlɑɑ kɑ́ tʋ́ pɑ tɩɩŋ wei pɑ lupǝnɑ wʋlɑ nɑ liɣitee nyǝɣǝtʋ tɔɣɔ sɛmǝŋ nɑ yuuŋ sɩ ɩ́ wɑkǝlɩ-ɩ.

²¹Kʋkpɑmǝŋ lonɑ nɑ ɩ pɔɣɔlɛɛ tɑɑ kɛ́ pɑɑ sʋʋ nɑ pɑ́ ŋmɛlɩ Tɑcɑɑ sɔɣɔntʋ sɔsɔɔntʋ nɑ ɩ teu sɔsɔɔm, kɛ wɑɑtʋ wei ɩ kɑ́ kɔɔ nɑ ɩ́ nyɑɑsɩ tɛtʋ tɔ.

²²Ɩ́ tɑɑ hɑ mǝ tǝɣɩ yʋlʋ. Heelim tike kɛ pǝ tʋ ɩ mɩɩnɑ tɛɛ. Mpʋ tɔ, ɩ tɑ kɛ pʋlʋpʋ.