Ɩsɑyii 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

¹Tɑcɑɑ yɔɣɔtɑ ntiɣi wʋlɑɣɑ tɛtʋ nti tǝ wɛ teŋku nɔɣɔ tɔ tǝ tɔɔ tɔ. Kolontu lɩɩnɑ wʋlɑɣɑ tɛtʋ sɔɣɔntʋ nyǝntʋ tɑɑ. Ɩsɩɩ kɑcuculɑɣɑ fɑkʋɣʋnɑ Nekɛfɩ tɛtʋ tɑɑ tɔ.

²Pǝ kulɑ tɔm sɔɣɔntʋ nyǝntʋ tɔɔ nɑ pǝ́ hʋlɩ-m. Nmɑkǝllʋ, ŋmɑkǝlɩ. Wɑkǝllʋ, nɑ́ɑ́ wɑkǝlɩ. Ɩlɑm nyǝ́mɑ, ɩ́ tii pɑ tɔɔ. Mɛtɩ nyǝ́mɑ, mɩɩ tɑ ɩcɑtɛ. Tɑcɑɑ kɑ́ sɩɩ tǝnɑɣɑ kɛ kʋnyɔmǝŋ wei Pɑpiloni tʋwɑ piitimnɑɑ tɔ.

³Pǝ tɔɔ kɛ́ mɑ lɑŋlɛ wɑkǝlǝɣɩ. Pǝ wɩɩkɩ-m kɛ́ ɩsɩɩ lʋlʋɣʋ wʋsɑsɩ tɑkʋɣʋ ɑlʋllʋ tɔ. Wʋsɑsɩ toŋ nyǝnsɩ lɑkɩ nɑ mɑ́ nyɑŋ, pɩɩ sɑŋ sɩ mɑ́ nɩɩ. Mɑ seliɣi, pɩɩ sɑŋ sɩ mɑ́ nɑ́.

⁴Mɑ lɑŋlɛ pǝsɑɑ, nɑ sɔɣɔntʋ sɔsɔɔntʋ kpɑ-m. Ahoo nnɑ mɑɑ nyɩɩlɑɑ tɔ ɑ pǝsɑ sɔɣɔntʋ nyǝnɑ.

⁵Pɑ pɔwɑ ɑtɛ pɔɔŋ nɑ pɑ́ sɩɩ tɔɣɔnɑɣɑ, nɑ pɑ́ tɔkɩ nɑ pɑ́ nyɔɔkɩ. Tǝnɑɣɑlɛ pɑ yɑɣɑ kɑpukɑ kɛ kpɑkpɑɑ sɩ: Yoolɑɑ sɔsɑɑ mɛ, ɩ́ tɑɣɑnɩ mǝ kʋkentiŋ.

⁶Ntɛnɑ Tɑcɑɑ heeli-m sɩ: Polo ń sɩɩ tɑŋlʋ, ye ɩ nɑ mpi ɩ yɔɣɔtɩ.

⁷Ye ɩ loosɑ yoou kɛɛkɛnɑɑ nɑ kpɑɣɑnǝŋ hɔŋ, yɑɑ kpɑŋɑsɩ yɑɑ yooyoonɑɑ cɑŋɑ. Ɩlɛ ɩ pɑɑsǝnɑ nɑ ɩ́ yɔɣɔtɩ nɑ pɑ́ nyɩ.

⁸Tǝnɑɣɑlɛ tɑŋlʋ yɑɣɑ kɑpukɑ ɩsɩɩ tɔɣɔlɑɣɑ sɩ: Tɑcɑɑ mɑ sǝŋɑ mɑ tǝtɑŋlɛ kɛ ilim nɑ ɑhoo kɛ́, nɑ mɑ́ feŋiɣi.

⁹Pɑ kɔŋnɑ ntɛ́ nɑ tǝnɑ tɔɔ, nɑ pɑ́ cɑɣɑ yoou kɛɛkɛnɑɑ nɑ kpɑɣɑnǝŋ hɔŋ. Ntɛnɑ nɔɣɔlʋ mɑ kɑpukɑ sɩ: Pɑpiloni ɩ́lɛ́ ɩ hotɑɑ, ɩ hotɑɑ. Ɩ tɩɩŋ kʋlɑlɑɑŋ lɛɛsǝŋ yɔkɑ ɑtɛɣɛ ɩ tǝnɑ tǝpʋtʋpʋtʋ.

¹⁰Mɑ yǝlɑɑ mpɑ mɛ pɑ mɑpɑ ɩsɩɩ mǝlɑ kɛ kɑtɑɣɑ tɑɑ tɔ. Nti Ɩsɛɣɛlɩ Ɩsɔ Tɑcɑɑ, Pǝ tǝnɑ pǝ tʋ heelɑ-m tɔɣɔlɛ, nɑ mɑ́ɑ́ tɛlǝsǝɣɩ-mɛ.

¹¹Tɑcɑɑ yɔɣɔtɑ ntiɣi Tumɑ tɔɔ tɔ. Nɔɣɔlʋ yɔɣɔtǝnɑ-m nɑ nɔɣɔ sɔsɑɣɑ nɑ Seyii tɛtʋ tɑɑ sɩ: Tɑŋlʋ, wɑɑtʋnɑɑ ɩsǝnɑɣɑ pǝ kɑɑsɑ ɑhoo, pǝlee kɛ́ ɑ tɛŋ?

¹²Ɩlɛnɑ tɑŋlʋ cɔ sɩ: Pɩɩ nyɑɑlɩ yɑ́ɑ́. Amɑ pǝ tɑ nyɑɑlǝtɑ. Ye mǝ luɣu wɛ kʋcɔcɔtʋ, ɩlɛ ɩ́ tɑsɑ mǝlʋɣʋ kɛ wulee.

¹³Tɑcɑɑ yɔɣɔtɑ ntiɣi Alɑpʋ tɔɔ tɔ. Ketɑɑ nyǝ́mɑ mɛ, mǝ nɑ mǝ yooyoonɑɑ cɑɑsɩ. Ɩ́ polo nɑ ɩ́ sʋʋ nyɩɩtʋ tɑɑ kɛ́ ɑhoo, nɑ ɩ́ ŋmɛlɩ tiikɑsɩ tɑɑ.

¹⁴Temɑ nyǝ́mɑ mɛ, ɩ́ sǝŋnɑ lʋm kɛ selɑɑ mpɑ lʋkɔtʋ kʋɣɩ tɔ. Ɩ́ ponɑ-wɛɣɛ tɔɣɔnɑɣɑ.

¹⁵Pǝ tɑɣɑ pʋlʋ, yoou toŋ nɑ lɑɣɑlɛɛ tʋʋlʋɣʋ, nɑ tɔ́ɔ́ŋ pɑm tɔɣɔnǝnɑ-wɛ.

¹⁶Pǝ tɑɣɑ pʋlʋ, pǝ kɑɑsɑ pǝnɑɣɑ kɛ teitei, ɩlɛnɑ Ketɑɑ nyǝ́mɑ teeli sɩɩ tǝnɑɣɑ.

¹⁷Yǝlɑɑ pǝciiu tike kɛ pɩɩ kɑɑsɩ ɩ yoolɑɑ tɑɑ yoolɑɑ tɔtɔlɑɑ tɑɑ. Nti Tɑcɑɑ Ɩsɛɣɛlɩ Ɩsɔ yɔɣɔtɑɑ tɔɣɔlɛ.