Jesaja 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Amozire ŋokâ Jesaja e Juda mâreŋte â Jerusalem haere dâŋ wiac hone manac ewec ʒi.

²Ʒâhec dameŋko wiac ʒiŋuc fuaocmu: Wofuŋte ufuŋ irec tikizi qiŋ herâ ŋehuc tiki sasawa jaŋere micne eocmu; ehuc mâreŋ facne qâhuc‐jopa‐fâreocmu; eme ŋicne ŋicne jaŋe ira heâckerâ fisiniŋmu.

³Eme ŋicguru bocjahazi fisirâ muniŋmu: “Warepie Wofuŋte tikio fenaŋ, Jakobore Anutu ere ufuŋko. Eme eki hata‐ticne nâzâ nâwotuc eme gâŋticnao âtehuc junʒepeneŋ.” Zioŋkonec sâcmutâc râwiŋneocmu, â Jerusalemkonec Wofuŋte dâŋ haŋ baocmu hâcne.

⁴Eki ŋicne ŋicne ŋondeŋ‐jeŋicko mumutiŋ gie baocmu, ehuc ŋicguru bocjaha dâŋ mutiŋne‐jareocmu. Eme jaŋe ʒika‐jeŋic bâtikiepie kinoŋ fuaocmu â damu‐jeŋiczi gie sâqe eocmu; guru moczi guru moctao râsi moc mi fisiocmu â ʒikare ʒaʒawie gie i omaeocmu.

⁵Ajoc, Jakobore kikefuŋ warepie Wofuŋte tatamacko junaŋ.

⁶Go ine ŋicfâcge, Jakobore kikefuŋ, ʒiŋucte qikiŋ‐jopameŋ: Jaŋe ʒoaŋ wewefunaonec qaŋgec mâsi amecke jueŋgopieŋ, â Filisa ŋic iŋucne faŋfaŋzi fusec‐jopaekac, â ŋic jabane jaŋehec meo roroc eeŋgopieŋ.

⁷Mâreŋ‐jeŋic siliwa â golzi fusucmawec, boreŋ‐jeŋic oomaene tâmiric; mâreŋ‐jeŋic becâsiczi fusucmawec, ʒika keretac‐jeŋic oomaene tâmiric.

⁸Mâreŋ‐jeŋic nemuɋâŋzi fusucmawec eme meqâreŋ‐jeŋic dapecneeŋgopieŋ, mejeŋiczi wiac ba akic embiŋ i hâcne sâseeŋgopieŋ.

⁹Iŋuc ehuc ŋiczi wawahane erâ qoro tutucne embiŋ; eme go irec kiŋ mi behe‐jarecmu.

¹⁰Go qânâuŋko raʒi tâmirec, â rufemaŋko soŋke sanaŋkec; go Wofuŋte tâpiri wânʒâŋ wisecnec, ehuc tatamac ɋuŋɋasaŋ‐ticnaonec râriec.

¹¹Ŋicte penaroŋ ʒâŋe bawahazo, â ŋic jaŋere maŋfefe bâuruŋkezo; eme ʒoaŋ ira Wofuŋ e buc fahare hâŋ domaocmu.

¹²Anutu Tâpiri Ɋuŋɋasaŋ Wofuŋ e dameŋ bawec fokac, ira pepec penaroŋhec sasawa dâŋgie jareocmu â wiac faharerâ doma rakac i bawaha‐fâreocmu.

¹³Lebanoŋte jâmâzâc sasawa ʒoricne ʒora â Basaŋte boriŋjâc bâuruŋ‐jopa‐fâreocmu.

¹⁴Erâ wâc tiki ʒora sasawa râsi ejareocmu â mâreŋ facne ferâ ŋerakac i iŋuc jaha.

¹⁵Erâ wâc fic hâŋʒora sasawa râsi ejareocmu, â qânâsac basanaŋkekicne i iŋuc jaha.

¹⁶Erâ wâc Tarasisi woke sasawa râsi ejareocmu, â wiac basarickekicne sasawa i iŋuc jaha.

¹⁷Eme ŋicte pepec sisiric badapezo â ŋic jaŋere penaroŋ bawahazo, ehame ʒoaŋ ira Wofuŋ e buc fahare hâŋ domaocmu.

¹⁸Eme nemuɋâŋ jaŋe omae‐fâreniŋmu.

¹⁹Â ŋiczi qânâuŋko â mâreŋ hawecko raʒihuc Wofuŋ tâpiri wânʒâŋ‐ticne wisecneniŋmu â tatamac ɋuŋɋasaŋ‐ticne fuame rârieniŋmu. Eki dameŋ ira mâreŋ hâhâwic hecneocte fahareocmu.

²⁰Dameŋ ira ŋiczi nemuɋâŋfâc‐jeŋic dape‐jareniŋte siliwa â golzi bambiŋ i hâcne ʒuc â mindi mindi behe‐jareniŋmu.

²¹I qânâuŋko â haroŋaŋ hawecko raʒihuc Wofuŋ tâpiri wânʒâŋ‐ticne wisecneniŋte â tatamac ɋuŋɋasaŋ‐ticne fuame rârieniŋte iŋuc eniŋmu. Eki dameŋ ira mâreŋ hâhâwic hecneocte fahareocmu.

²²Ŋic e sâke‐nâŋecko nokafe fokac irec sâc, irec e râpeckeniŋ me! Ere wemo wiac fârine muzo.