Ɩsɑyii 16

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

¹Ɩ́ hɑ tɛtʋ nyʋɣʋ tʋ kɛ ɩwɑɑʋ nɑ ɩ́ tilinɑ-ɩ. Pǝ́ lɩɩnɑ Selɑ ɩcɑtɛ nɑ pǝ́ tǝŋnɑ wʋlɑɣɑ tɛtʋ tɑɑ, nɑ pǝ́ polo Siyɔŋ pʋɣʋ tɑɑ.

²Mowɑpʋ ɑlɑɑ kpɑɑkɩ Alǝnɔŋ lɔɔʋ kuteŋ tɔɔ nɑ pɑ́ tiiki, ɩsɩɩ pɑ tɔɣɔnʋɣʋ sumɑɣɑ kɛ kɑ tɑntɛ tɑɑ tɔ.

³Ḿpʋ́ɣʋ́ Mowɑpʋ nyǝ́mɑ sǝlǝmɑ Yosɑlɛm nyǝ́mɑ sɩ: Ɩ́ tɑsɑ-tʋɣʋ lɑɣɑtʋ nɑ ɩ́ hʋlɩ-tʋɣʋ tɑ́ kʋlɑpǝlɛ. Ɩ́ kenti tɑ́ tɔɔ kɛ́ ilim hɛkɑ tɑɑ, ɩsɩɩ ɑhoo sǝkpɛtʋɣʋ. Ɩ́ ŋmɛsɩ tɑ yǝlɑɑ mpɑ pɑ tʋ kpʋlʋɣʋ tɔ, ɩ́ tɑɑ kuli tɑ́ selɑɑ wɑɑlɩ.

⁴Ɩ́ mʋ Mowɑpʋ yǝlɑɑ kɛ mǝ tɛ. Ɩ́ hɑ-wɛɣɛ timpi pɑɑ cɔɔsɩ nɑ wɑkǝllʋ ɩ́ tɑɑ hiki-wɛ tɔ. Nmɑkǝlʋɣʋ nɑ wɑkǝlʋɣʋ nɑ tɛtʋ yǝlɑɑ nɔɔhɛɛ fɛlʋɣʋ kɑ́ sɩɩ tǝnɑɣɑ kɛ kʋyɑkʋ nɑkʋlɩ.

⁵Wɑɑtʋ ɩnǝɣɩ pɑ lʋlʋɣʋ tʋ Tɑfiiti kɑ́ wɛɛnɑ kɑwulɑɣɑ kumte. Tɩɩ wɛɛ sɔsɔɔlɛ tɑm tɔɔ nyǝntɛ kɛ Ɩsɔ pɛɛlɛɛ tɔɔ. Ɩ kɑ́ tǝŋǝɣɩ tɑmpɑnɑ nɑ siɣisuɣu nɑ ɩ́ hʋʋkǝnɑ.

⁶Ḿpʋ́ɣʋ́ Yutɑ nyǝ́mɑ tɔmɑ sɩ: Tǝ nɩɩwɑ pɑ yɔɣɔtǝɣɩ Mowɑpʋ nyǝ́mɑ kɑlɑmpɑɑnɩ tɔm. Pɑ yɔɣɔtǝɣɩ tɔtɔɣɔ pɑ tɩ hɔm sɔsɔɔm tɔm nɑ pɑ ɩsǝcɑʋ tɔm. Nɑ ɩsǝnɑ pɑɑ sɩɩkɩ pɑ tǝɣɩ pǝ cɔlɔ tɔ. Pǝ́cɔ́ pɑ yɔɣɔtǝɣɩ nɑ pǝ́ fɛɩnɑ hʋwɛɛ.

⁷Pǝ tɔɔ kɛ́ Mowɑpʋ nyǝ́mɑ huɣutiɣi lotu kɛ pɑ tɩ tɔm nɑ pɑ́ wiiki lɛsɛŋ kɑkɑlɑsɩ nsi pɑ lɑkɑɣɑ Kii-Helɛsɩ tɔ. Pǝ pɩɩ-wɛɣɛ kɑtɑtǝlɑɣɑ, ɩlɛnɑ pɑ́ mɔlǝɣɩ.

⁸Hɛsǝpɔŋ nyǝ́mɑ tɑwɑ wɑkǝlɑɑ. Sipǝmɑ lɛsɛŋnɑɑ wʋlǝɣɩ. Mpɛ pɑ lʋlɑɣɑnɑ sʋlʋm kʋpɑm, nɑ pǝ́ kʋɣɩ piitimnɑɑ ɑwulɑɑ. Lɛsɛŋ tɑwɑ ɑnɩ ɑ tɔɔwɑɣɑ hɑlǝnɑ Yɑsɛɛ tɛtʋ. Lɛsɛŋnɑɑ piliŋɑsɩ kɑ hɛlɑɑ kɛ́ nɑ sɩ tɛɛ teŋku kʋsǝpʋ wɑɑlɩ.

⁹Pǝ tɔɔ kɛ́ mɑ nɑ Yɑsɛɛ nyǝ́mɑ tǝ wiiki Sipǝmɑ lɛsɛŋnɑɑ tɔɔ. Nɑ mɑ lukiɣi ɩsǝlʋm kɛ Hɛsǝpɔŋ nɑ Ɩlɑle pɑ tɔɔ. Pɑ yɑɣɑ yoou kɑkiisɑɣɑ kɛ mǝ kʋmtʋnɑɑ tɔɔ.

¹⁰Lɑŋhʋlʋmlɛ nɑ ɑyɔɔlɑ tɛmɑ mǝ tɑwɑ tɑɑ. Pǝyele nɔɣɔlʋ ɩɩ tɑsǝɣɩ yontu yɑɑ ɑŋmɑɑlɑ kɛ lɛsɛŋ tɩɩŋ tɑwɑ tɑɑ. Lɛsɛŋ koollɑɑ ɩɩ tɑsǝɣɩ pǝ lʋm nyɑɑsʋɣʋ kɛ tiiŋ tɑɑ. Mɑ yelɑɑ nɑ lɑŋhʋlʋmlɛ kɑkiisɑsɩ sɩɩ tǝnɑɣɑ.

¹¹Pǝ tɔɔ kɛ́ mɑ lɑŋlɛ wɑkǝlɑ hɑtoo mɑ tɑɑ kɛ́ Mowɑpʋ, nɑ mɑ́ seliɣi ɩsɩɩ cǝmʋɣʋ wulɑ. Nɑ mɑ́ huɣutiɣi lotu kɛ Kii-Helɛsɩ pɑ tɔɔ.

¹²Mowɑpʋ nyǝ́mɑ kɑ́ kɑnɑ pɑ tǝfɛɛnlɛ kɛ pote, pɑɑ wiikinɑ pɑ tɩɩŋ. Amɑ pɑ kɑɑ wɑɑ pʋlʋ.

¹³Nti Tɑcɑɑ kɑ yɔɣɔtɑ hɑtoo lɔŋ kɛ Mowɑpʋ tɔɔ tɔɣɔlɛ.

¹⁴Tɑcɑɑ yɔɣɔtǝɣɩ tǝfoo kɛ́ pǝnɛntɛ sɩ: Pǝ kɑɑsɑ pɩɩsɩ tooso kɛ́ teitei. Ɩlɛnɑ Mowɑpʋ nyǝ́mɑ teeli sɩ. Pɑɑ nɑ pɑ pɑɣɑlɛ ntɛ́ tɔ, yǝlɑɑ pǝciimɑɣɑ tike kɛ pɩɩ kɑɑsɩ-wɛ, pɑ kɑɑ nii ɩsǝlɛ.