Ɩsɑyii 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

¹Tɑcɑɑ yɔɣɔtɑ ntiɣi Icipiti nyǝ́mɑ tɔɔ tɔ. Tɑcɑɑ cɑɣɑnɑ ntɛɣɛ ɩsɔŋmʋntʋ nti tǝ tɔŋ lɔŋlɔŋ tɔɣɔ kpɑɣɑnʋ, nɑ ɩ́ polo Icipiti. Icipiti tɩɩŋ kʋlɑlɑɑŋ seliɣi nɑ yǝlɑɑ ɑpɑlʋtʋ nɑɑ le-wɛ.

²Ḿpʋ́ɣʋ́ Tɑcɑɑ tɔmɑ sɩ: Mɑɑ yele nɑ Icipiti nyǝ́mɑ kʋlɩ tǝmɑ tɔɔ. Yʋlʋ kɑ́ kʋlɩ ɩ lʋlʋɣʋ tʋ tɔɔ, nɑ lɛlʋ kʋlɩ ɩ tɑɑpɑlʋ tɔɔ. Acɑlɛɛ kɑ́ kʋlɩ tǝmɑ tɔɔ, nɑ kɑwulɑsɩ kɛ tǝmɑ tɔɔ.

³Mɑɑ yele nɑ Icipiti nyǝ́mɑ mɛ mǝ lǝmɑɣɑsɛɛ le-mɛ, nɑ mɑ́ liɣiti mǝ lɑɣɑtʋ. Ɩlɛnɑ ɩ́ pǝsǝnɑ mǝ tɩɩŋ tɔɔ nɑ ɩ́ polo mǝ tʋwɑɑ tɛ. Ɩ́ kɑ́ sʋsɩ kɔɣɔnɑŋŋ nɑ ɩ́ pɔɔsɩ pee.

⁴Mɑɑ tʋ Icipiti nyǝ́mɑ kɛ ŋmɑkǝllʋ niŋ tɑɑ. Nmɑkǝllʋ kɑ́ tɔɣɔ mǝ tɔɔ kɛ́ kɑwulɑɣɑ nɑ toŋ. Pǝ tǝnɑ pǝ tʋ Tɑcɑɑ mɑ́ mɑ yɔɣɔtǝnɑ mpʋ.

⁵Nili pɔɣɔ lʋm kɑ́ nyɔɔ, nɑ kɑ́ wʋlɩ tǝkpɑnsɑŋ.

⁶Nili pɔɣɔ sɔsɑɣɑ pusi kʋhɛlɑsɩ lʋm kɑ́ sɔŋ nɑ lɔɔŋ kʋhɛhɛɛŋ lʋm nɑ́ɑ́ nyɔɔ. Mʋlʋɣʋ nɑ sǝsǝncɑɑsɩ kɑ́ lontili,

⁷nɑ pɔɣɔ ɑtɑmɑ lʋm nyɩɩtʋ tǝnɑ. Nɑ pǝ́ kpɛnnɑ pɔɣɔ nɔɣɔ hɑlǝm tǝnɑ, nɑ heelim mɑ-wɩ nɑ pǝ́ wʋlɩ nɑ pǝ́ yele kpɛtɛ.

⁸Tiinɑ kpɑlɑɑ tǝnɑ, pɑɑ kulɑsɩ nyǝtɑɑ, pɑɑ puluŋ tʋlɑɑ, pɑ lɑŋɑ kɑ́ wɑkǝlɩ tǝtɔɣɔtɔɣɔ, nɑ pɑ́ te nyɔɔŋ nɑ pɑ́ wii tǝkpoo.

⁹Mpɑ pɑ mɑkɩ kpoŋkpontu toŋ nyǝntʋ nɑ mpɑ pɑ lʋʋkɩ tǝ pɔɔŋ tɔ, pɑ lɑŋɑ kɑ́ wɑkǝlɩ.

¹⁰Pǝ nɩɩ pɔɔŋ lʋʋlɑɑ. Pɑ tǝnɑ mpɑ pɑ tɔkɑɣɑnɑ tǝmlɛ ntɛ́ tɔ, pɑ ɑpɑlʋtʋ lepɑ.

¹¹Sowɑŋ ɩcɑtɛ ɑwulumpiyɑ kɛ lǝmɑɣɑsɛɛ fɛɩnɑɑ kɛ́. Icipiti wulɑʋ lɑɣɑtʋ tɑsǝlɑɑ tɑsǝɣɩ kʋmɛlǝlɑɣɑtʋ kɛ. Ɩsǝnɑɣɑ mǝ tɑɑ yʋlʋ pǝsǝɣɩ nɑ ɩ́ tɔ Icipiti wulɑʋ sɩ: Mɑɣɑ nyǝntʋ. Pǝyele mɑɣɑ lɔŋtɑɑ ɑwulɑɑ lʋlʋɣʋ tʋ?

¹²Icipiti wulɑʋ, nyɑ́ nyǝntɑɑ mpɛ pɑ wɛ le? Pɑ́ kuli nti Pǝ tǝnɑ pǝ tʋ Tɑcɑɑ mɑɣɑsɑɑ nɑ ɩ́ sɩɩ Icipiti tɔɔ tɔ nɑ pɑ́ hʋlɩ-ŋ ɩlɛ.

¹³Sowɑŋ ɑwulumpiyɑ mǝ kɛ́ kʋmɛlɛmǝŋ, nɑ Mɑmfi nyǝ́mɑ mǝ tʋsǝɣɩ mǝ tɩ. Ɩ́ kɛ́ kpekɑ nyɔɔŋ nyǝ́mɑ mpɑ pɑ tolisiɣi Icipiti tɔɣɔ.

¹⁴Tɑcɑɑ tisɑ ɑcufu kɛ mǝ tɑɑ, nɑ ɩ́ tolisiɣi Icipiti kɛ ɩ kʋlɑpǝtʋ tǝnɑ tɑɑ. Ɩ́ lɑkɩ teitei kɛ́ ɩsɩɩ sʋlʋnyɔɔlʋ tutuɣu ɩ tɔtʋ tɑɑ tɔ.

¹⁵Icipiti tʋ nɔɣɔlʋ ɩ kɑɑ pǝsɩ nɑ ɩ́ lɑ pʋlʋ kʋpɑm. Pɑɑ toŋ tʋ, yɑɑ kʋnyɔntʋ, yɑɑ sɔsɔ, yɑɑ sǝkpelu.

¹⁶Kʋyɑkʋ nɑkʋlɩ, Pǝ tǝnɑ pǝ tʋ Tɑcɑɑ kɑ́ nyɑɑsɩ Icipiti nyǝ́mɑ mɛ nɑ niŋ tʋɣʋ. Sɔɣɔntʋ kɑ́ kpɑ-mɛ nɑ ɩ́ sele ɩsɩɩ ɑlɑɑ.

¹⁷Yutɑ tɛtʋ kɑ́ wɛɛ-mɛɣɛ sɔɣɔntʋ pʋlʋɣʋ. Pɑɑ wɑɑtʋ wei kɛ́ pɑ yɔɣɔtɑ tǝ tɔm, ɩ́ tɔɔsǝɣɩ nti Pǝ tǝnɑ pǝ tʋ Tɑcɑɑ kɑ sɩɩwɑ sɩ ɩ kɑ lɑ-mɛ tɔɣɔ. Ɩlɛnɑ ɩ́ seliɣi.

¹⁸Kʋyɑkʋ nɑkʋlɩ Icipiti ɑcɑlɛɛ kɑkpɑsɩ kɑ́ yɔɣɔtǝɣɩ Hepǝlɑ tɔm. Pɑɑ yɔɣɔtɩ nɑ pɑ́ sɩɩ sɩ: Tǝ kɛ́ Pǝ tǝnɑ pǝ tʋ Tɑcɑɑ nyǝ́mɑ. Acɑlɛɛ ɑnɩ ɑ tɑɑ lɛntɛ hǝtɛ ntɛ́ ilim ɩcɑtɛ.

¹⁹Kʋyɑkʋ nɑkʋlɩ ɩ́ kɑ́ ŋmɑ Tɑcɑɑ kɛ kɔtɑɣɑ tǝlɑtɛ kɛ Icipiti tɛtʋ tɑɑ. Ɩ́ kɑ́ siki-ɩ pǝlɛ kɛ tɛtʋ toŋɑ tɔɔ.

²⁰Ńtɛ́ tɩɩ tɔɔsǝɣǝnɑ Icipiti nyǝ́mɑ mɛ sɩ: Pǝ tǝnɑ pǝ tʋ Tɑcɑɑ wɛ mǝ tɛ. Nɑ wɑɑtʋ wei Icipiti nyǝ́mɑ kɑ yɑɑ Tɑcɑɑ sɩ: Yɑ-tʋɣʋ tɑ ŋmɑkǝllʋ niŋ tɑɑ tɔ. Ɩsɔ kɑ́ tilinɑ-mɛɣɛ wɑɑsʋlʋ nɑ ɩ́lɛ́ ɩ́ hɛtɩ-mɛ.

²¹Wɑɑtʋ ɩnǝɣɩ Tɑcɑɑ kɑ́ hʋlɩ ɩ tǝɣɩ Icipiti nyǝ́mɑ mɛ, nɑ mɩɩ nyɩ Ɩsɔ wɛɛtʋ nɑ ɩ́ sɛɛ-ɩ. Ɩ́ kɑ́ lɑpɩ-ɩ kɔtɑsɩ nɑ ɩ́ hɑ-ɩ kʋcɔɔŋ, nɑ ɩ́ sɩɩ-ɩ nɔɔsɩ nɑ ɩ́ tɔkɩ-sɩ.

²²Tɑcɑɑ kɑ́ hɔ Icipiti nyǝ́mɑ mɛ mǝ ŋkpɑŋŋ. Ɩ kɑ́ wɑɑ-mɛ nɑ mɩɩ mǝlǝnɑ ɩ tɔɔ. Ɩsɔ kɑ́ mʋɣɩ mǝ kʋsǝlǝmʋtʋ nɑ ɩ́ wɑɑ-mɛ.

²³Kʋyɑkʋ nɑkʋlɩ hɑpǝlɛ kɑ́ lɩɩ Icipiti, nɑ tǝ́ puki Asilii. Icipiti nyǝ́mɑ nɑ Asilii nyǝ́mɑ ɩ́ kɑ́ polo tǝmɑtɛ, nɑ ɩ́ kpɛntɩ nɑ ɩ́ sɛɛkɩ Tɑcɑɑ.

²⁴Kʋyɑkʋ ŋkʋ Ɩsɛɣɛlɩ nyɑɑ sɔɔsɩ Asilii nɑ Icipiti pɑ tɔɔ nɑ ɩ́ lɑ tooso. Tɑcɑɑ kɑ́ kooli tɛtʋ tǝnɑɣɑ kʋpɑntʋ kɛ Ɩsɛɣɛlɩ tɔɔ.

²⁵Pǝ tǝnɑ pǝ tʋ Tɑcɑɑ kɑ́ kooli tɛtʋnɑɑ mɛ mǝ tooso kɛ́ kʋpɑntʋ sɩ: Mɑ kooliɣi mɑ yǝlɑɑ Icipiti nyǝ́mɑ kɛ kʋpɑntʋ. Mɑɑ kooli Asilii nyǝ́mɑ mpɑ mɑ lɑpǝnɑ mɑ niŋ tɔɣɔ kʋpɑntʋ. Mɑɑ kooli Ɩsɛɣɛlɩ nyǝ́mɑ mpɑ mɑ lǝsɑɑ tɔɣɔ kʋpɑntʋ.