Ɩsɑyii 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

¹Tɑcɑɑ yɔɣɔtɑ ntiɣi toosee tɛtɛkǝlɛ tɔɔ tɔ. Yosɑlɛm, pepe lɑpɑ nɑ nyɑ́ yǝlɑɑ kpɑɑkɩ lɔpʋtʋ tɔɔ?

²Ɩcɑtɛ kʋcʋkǝlɛ, nɑ kɔkɔtɛ nyǝntɛ, nɑ lɑŋhʋlʋmlɛ nyǝntɛ nyɑ́, nyɑ́ sǝtɑɑ tɑ sǝnɑ lɑɣɑtɛ, pɑ kɑɑ sɩ tǝyoole.

³Nyɑ́ yoolɑɑ nyɔɔŋ nyǝ́mɑ tǝnɑ sewɑ, tɔtɔlɑɑ kpɑ-wɛɣɛ sɑlǝkɑ. Pɑ kuu nyɑ́ yǝlɑɑ tǝnɑ nɑ pɑ́ kpɛnnɑ mpɑ pɑɑ sewɑ nɑ pɑ́ hɑtǝlɩ tɔ.

⁴Pǝ tɔɔ kɛ́ mɑ sɩ ɩ́ yele-m nɑ mɑ́ wii wɑhɑlɑ wei ɩ mɑɣɑnɑ mɑ yǝlɑɑ tɔ ɩ tɔɔ. Ɩ́ tɑɑ mɑɣɑsɩ sɩ ɩ́ puɣusiɣi-m.

⁵Mpi tɔ, sɑŋɑ kɛ Ɩsɔ pǝ tǝnɑ pǝ tʋ Tɑcɑɑ tisɑ tɑ tɑɑ kɛ́ ɑcufu nɑ tǝ́ kpisi nɑ pǝ́ liɣiti-tʋ. Lɑŋwɑkǝllɛ wulɑ sɔsɔɔnɑ nɩɩkɩ toosee tɛtɛkǝlɛ tɑɑ. Kɑkiisɑsɩ kpɑɑkɩ tontoŋɑ tɔɔ.

⁶Ɩlɑm yoolɑɑ tɔkɑ tɔɔŋ nɑ nyǝmɑ́. Apɑlɑɑ cɑɣɑ yoou kɛɛkɛnɑɑ tɑɑ, kpɑɣɑnǝŋ wɛɛ. Kii nyǝ́mɑ yoolɑɑ lɛɛkɩ pɑ kpɑlǝŋ.

⁷Yosɑlɛm, nyɑ́ tɛtɛkɑ kʋpɑmpɑnɑ tɑɑ suwɑ yoou kɛɛkɛnɑɑ nɑ pǝ kpɑɣɑnǝŋ. Pɑ pɩɩlǝɣɩ nyɑ́ nɔnɔɔsɩ sɩ pɑ yooki.

⁸Yutɑ fɛɩ kʋkentim tɔtɔ. Kʋyɑkʋ ŋkʋ ɩ́ kɛɛsɩ mǝ ɩsɛ nɑ ɩ́ nyǝnǝɣɩ yoou wontu. Nti pɑ pɩɩlɑ kutuluɣu ŋku pɑ yɑɑ sɩ Lipɑŋ hɔtʋɣʋ tɔ kʋ tɑɑ tɔ.

⁹Ɩ́ nɑwɑ Tɑfiiti ɩcɑtɛ koluŋɑ pɔɣɔlɛɛ tǝnɑ. Ɩ́ hɔmɑ lʋm kɛ pǝ tɛɛ lɩɩlɛ tɑɑ.

¹⁰Ɩ́ kɑlɑ Yosɑlɛm tɛɛsɩ. Ɩ́ yɔkɑ sɩ tɑɑ lɛŋsǝnɑɑ sɩ pǝ sɔɔsɩ koluŋɑ kɛ toŋ.

¹¹Ɩ́ hulɑ lɩɩlɛ kɛ koloosi nɑɑlɛ hɛkʋ. Ɩ́ hɔmɑ lɩɩlɛ kʋpǝntɛ tɑɑ lʋm. Amɑ ɩ́ tɑ́ kɛɛsɩ mǝ ɩsɛ nɑ Ɩsɔ wei ɩ tɑɣɑnɑ wɑhɑlɑnɑɑ mpɛɣɛ too lɔŋ, nɑ ɩ́ kɔnɑ-mɛ tɔ ɩ tɔɔ.

¹²Kʋyɑkʋ ŋkʋɣʋ Ɩsɔ Tɑcɑɑ, Pǝ tǝnɑ pǝ tʋ yɑɑ-mɛ sɩ ɩ́ wii nɑ ɩ́ huɣuti lotu nɑ ɩ́ looli mǝ nyɔɔŋ, nɑ ɩ́ suu lǝyɑɣɑ wontu.

¹³Amɑ mɛ ɩlɛ, pǝ pǝsɑ-mɛɣɛ lɑŋhʋlʋmlɛ sɔsɔɔlɛ kɛ́. Ɩ́ kʋɣɩ nɑɑŋ nɑ heeŋ nɑ ɩ́ liki nɑntʋ nɑ sʋlʋm nɑ ɩ́ hɑkɩ teu. Hɑlǝnɑ ɩ́ tɔ sɩ: Tǝ́ tɔɣɔ nɑ tǝ́ nyɔɔ tɑ kpɑkpɑɑ. Mpi tɔ, cele tɩɩ sɩ.

¹⁴Ḿpʋ́ɣʋ́ Pǝ tǝnɑ pǝ tʋ Tɑcɑɑ yɔɣɔtɑɑ nɑ mɑ́ nɩɩ sɩ: Mɑ yɔɣɔtǝɣǝnɑ tuunɑʋ sɩ pǝ kɑɑ hɩɩsɩ mǝ ɩsɑɣɑtʋ tǝnɛ, ɩsɩɩ ɩ́ sǝpɑ. Nti Pǝ tǝnɑ pǝ tʋ Ɩsɔ yɔɣɔtɑɑ tɔɣɔlɛ.

¹⁵Ḿpʋ́ɣʋ́ Pǝ tǝnɑ pǝ tʋ Tɑcɑɑ Ɩsɔ heelɑ Ɩsɑyii mɑ́ sɩ mɑ́ polo nɑ mɑ́ nɑ́ kɑwulɑɣɑ tǝyɑɣɑ nyʋɣʋ tʋ Sepǝnɑ. Mɑ́ heeli-ɩ sɩ:

¹⁶N fɛɩnɑ pʋlʋɣʋ cǝnɛ, n nyǝnǝɣɩ nyɑ́ tǝɣɩ we nɑ hɑlɩ ń huli nyɑ́ tǝɣɩ pǝlɑɑʋ kɛ ɩsɔtɑɑ kʋkpɑmʋɣʋ tɑɑ?

¹⁷N nyǝnǝɣɩ nyɑ́ tǝɣɩ pʋlʋ sɔsɔɔm kɛ́. Amɑ Tɑcɑɑ kɑ́ kpɑɣɑ-ŋ nɑ ɩ́ lɔɣɔ-ŋ pooluŋ.

¹⁸Ɩ kɑ́ pilimi-ŋ ɩsɩɩ pʋlʋ kʋkulutum kɛ tɛtʋ kʋwɑlǝtʋ nɑtǝlɩ tǝ tɑɑ. Tǝnɑɣɑ n kɑ́ sɩ nɑ nyɑ́ yoou kɛɛkɛnɑɑ kʋpɑmɑ sɑɑlɩ. Nyɑ́ kɛnɑ nyɑ́ cɑɑ tǝyɑɣɑ fɛɛlɛ.

¹⁹Mɑɑ lǝsǝ-ŋ nyɑ́ tǝmlɛ tɑɑ. Mɑɑ tɔɣɔnɩ-ŋ nyɑ́ tǝcɑɣɑlɛ.

²⁰Kʋyɑkʋ ŋkʋɣʋ mɑɑ yɑɑ mɑ tǝmlɛ tʋ Hilikiyɑ pǝyɑlʋ Ɩliyɑkim.

²¹Mɑɑ suu-ɩ nyɑ́ cɑpɑ, mɑɑ lǝlɩ-ɩ nyɑ́ tɑmpɑlɑ, nɑ mɑ́ tʋ nyɑ́ pǝsʋɣʋ kɛ ɩ niŋ tɑɑ, nɑ ɩ́ pǝsɩ Yutɑ nɑ Yosɑlɛm nyǝ́mɑ pɑ cɑɑ.

²²Nɑ mɑ́ cɛlɛ-ɩ wulɑʋ Tɑfiiti lʋlʋɣʋ nyǝ́mɑ kɑwulɑɣɑ tǝyɑɣɑ nɔnɔɣɔ nyǝmlɛ. Ɩ́ tʋlɑɑ, nɔɣɔlʋ ɩɩ tǝkǝɣɩ. Pǝ́cɔ́ ɩ́ tǝkɑɑ nɔɣɔlʋ ɩɩ tʋlǝɣɩ.

²³Ɩsɔ kɑ́ yelinɑ nɑ ɩ́ nyɔɔ toŋ ɩsɩɩ nyǝmlɛ kɛ lonte nɑɑni nyǝntɛ tɑɑ, nɑ ɩ́ pǝsɩ ɩ cɑɑ tǝyɑɣɑ nyǝ́mɑ teeli tǝhikile.

²⁴Ɩ tǝyɑɣɑ nyǝ́mɑ kɑ́ nyɔkǝlǝnɑ-ɩ kɛ́ nɑ pɑ yuŋ tǝnɑ. Tiisi sɔsɔɔnsɩ nɑ tiipee kɑ nyɔkǝlǝnɑ-ɩ kɛ́ ɩsɩɩ kewee nɑ kɔpʋnɑɑ.

²⁵Ḿpʋ́ɣʋ́ Pǝ tǝnɑ pǝ tʋ Tɑcɑɑ tɔmɑ sɩ kʋyɑkʋ ŋkʋɣʋ kɑŋkɑnɑɣɑ ŋkɑ pɑɑ kɑmɑ lonte nɑɑni nyǝntɛ tɑɑ tɔ kɑɑ kpɛsɩ. Pɑɑ mɑ-kɛ nɑ kɑ́ kpɛɛ. Ɩlɛnɑ sǝɣǝlɑ wenɑ ɑ tǝnɑ ɑ kɑ wɛ kɑ tɔɔ tɔ ɑ́ wɑkǝlɩ. Mpi tɔ, Tɑcɑɑ mɑ́ mɑ yɔɣɔtǝnɑ.