Ɩsɑyii 23

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

¹Tɑcɑɑ yɔɣɔtɑ ntiɣi Tiii tɛtʋ tɔɔ tɔ. Tɑɑsisi ɩcɑtɛ kpɩɩlǝŋ sɔsɔɔŋ mɛ ɩ́ wii. Mpi tɔ, ɩcɑtɛ wɑkǝlɑɑ, tǝyɑɣɑ fɛɩ, tǝsʋʋlɛ fɛɩ. Hɑtoo Kitim tɛtʋ tɑɑ kɛ́ tɔm ntɩ tǝ lɩɩnɑɑ.

²Sitɔŋ pɑɣɑtǝlɑɑ mpɑ mɛ ɩ́ wɛ teŋku nɔɣɔ tɔ. Sɔɣɔntʋ ɩ́ kpɑ-mɛ nɑ pǝ́ lɑ-mɛɣɛ hɑ. Mǝ tillɑɑ tɛsǝɣǝnɑ teŋku.

³Mpi pɑ tuukɑɣɑ nɑ pɑ́ tǝŋǝɣɩ lʋm sɔsɔɔm tɔ, Sitɔŋ nyǝ́mɑ kʋŋɑɣɑnɑ-wɩ. Mpɛ pɑ tɔkɑɣɑnɑ piitimnɑɑ kɑsǝyɑɣɑ.

⁴Fɛɛlɛ ɩ́ kpɑ Sitɔŋ ɩcɑtɛ. Mpi tɔ, teŋku nɑ ɩ holɑ sɔsɔɔnɑ sɩ: Lʋlʋɣʋ wʋsɑsɩ tɑ kpɑtɑ-m. Pǝ́cɔ́ mɑ tɑ tɩɩ lʋlǝtɑ. Pǝyele mɑ tɑ tɔɔtɑ ɩfepiyɑ, mɑ tɑ pɩɩsǝtɑ pɛɛlɑɑ.

⁵Wɑɑtʋ wei Icipiti nyǝ́mɑ kɑ́ nɩɩ tɔm ntɩ tɔ, pɑɑ selinɑ mpi pɩɩ mɑɣɑnɑ Tiii nyǝ́mɑ tɔ.

⁶Teŋku nɔɣɔ nyǝ́mɑ mɛ ɩ́ wii. Ɩ́ tɛsɩ teŋku nɑ ɩ́ polo Tɑɑsisi.

⁷Wɑɩyo! Tiii kɔlɔ? Ɩcɑtɛ ńtɛ́ tǝ leelɑɑ kɛ́. Yǝlɑɑ kɑ suwɑ tǝ tɑɑ kɛ́ hɑtoo lɔŋ kɛ́. Ntɛ́ tǝ ŋmɑkǝlɑɣɑnɑ tɛtʋ pooluŋ nyǝntʋ.

⁸Tiii tɑlɑɣɑ ɑwulɑɑ nteniŋ kɛ́. Tǝ tɑɑtǝlɑɑ kɑ wɛ kɛ́ ɩsɩɩ ɑwulumpiyɑ. Pɑ nyǝnǝɣɩ-wɛɣɛ yǝlɑɑ mpɑ pɑ nyɔɔŋ kǝlɑ kʋlʋɣʋ kɛ ɑntulinyɑ tɑɑ tɔ. Awe wɑkǝlɑ ɩcɑtɛ ntɛɣɛ mpʋ?

⁹Pǝ tǝnɑ pǝ tʋ Tɑcɑɑ tʋnɑ ḿpʋ́ɣʋ́ ɩ tɑɑ sɩ ɩ wɑkǝlǝɣɩ ɩsǝcɑʋtʋnɑɑ mpɑ pɑ sɔɔlɑ teeli tɔ. Nɑ ɩ́ tisi mpɑ yǝlɑɑ tʋɣʋnɑ tɔ.

¹⁰Tiii nyǝ́mɑ mɛ ɩ́ hɑlɑ mǝ tɛtʋ. Mpi tɔ, kpɩɩlǝŋ sɔsɔɔŋ wei ɩ tɔŋ teŋku sɔsɔ tɑɑ tɔ ɩ fɛɩ tɔtɔ.

¹¹Tɑcɑɑ nyɑɑsɑ teŋku. Ɩ selisɑ kɑwulɑsɩ nɑ ɩ́ tɔ sɩ: Pɑ́ wɑkǝlɩ Kɑnɑɑŋ koloosi ɑcɑlɛɛ.

¹²Ɩ tɔmɑ sɩ: Sitɔŋ wɛɛ kɛ́ ɩsɩɩ pɛɛlɔ wei pɑ kpipɑ nɑ pɑ́ wɑkǝlɩ tɔ. Nyɑ́ ɑcimɑ tɛmɑ. Polo Sipili tɛtʋ nti lʋm cɔɔnɑɑ tɔ. Amɑ n kɑɑ hɛɛsɩ tǝnɑɣɑ.

¹³Nyǝnnɑ Pɑpiloni tɛtʋ nyǝ́mɑ, pɑ fɛɩ tɔtɔ. Asilii nyǝ́mɑ ŋmɑ tǝ tɑɑ kɛ́ yoolɑɑ kutuluŋ sɔsɔɔŋ. Pɑ yoonɑ-tɩ, nɑ pɑ́ yɔkɩ tǝ kɑwulɑɣɑ tɛɛsɩ nɑ tǝ́ pǝsɩ ncɑɑlɛ. Tɑɑlɛ wontu tɔɣɔ pɑ tɛtʋ.

¹⁴Kpɩɩlǝŋ sɔsɔɔŋ ɩ́ wii. Mpi tɔ, pɑ wɑkǝlɑ mǝ tǝcɔɔsǝlɛ.

¹⁵Ɩlɛnɑ pɑ́ sɔɔ Tiii tɔɔ kɛ́ pɩɩsɩ nɩɩtoso nɑ nɑɑnʋwɑ, ɩsɩɩ wulɑʋ kɑwulɑɣɑ pɩɩsɩ. Pǝlɛ pǝ wɑɑlɩ kɛ́ pɑɑ lɑpɩ-ɩ ɩsɩɩ pɑ kɛɛsʋɣʋ yontu tɑɑ kɛ́ wɑsɑŋkɑlɩ tɔm tɔ sɩ:

¹⁶Wɑsɑŋkɑlɩ, nyɑ́ wei pɑ sɔɔ nyɑ́ tɔɔ tɔ. Kpɑɣɑ nyɑ́ cǝmʋɣʋ. Mɑkɩ-kʋ nɑ ń cɔɔkɩ ɩcɑtɛ. Yooki yontu nɑ ń lɛlǝɣɩ-tɩ. Yǝlɑɑ ɩ́ tɔɔsɩ nyɑ́ tɔm.

¹⁷Pɩɩsɩ nɩɩtoso nɑ nɑɑnʋwɑ tɛɛkɩ, ɩlɛnɑ Tɑcɑɑ yele nɑ Tiii nyǝ́mɑ lɑ wɑsɑŋkɑlǝtʋ nɑ ɑntulinyɑ ɑwulɑɑ tǝnɑ, nɑ pɑ́ hikiɣi pǝ liɣitee.

¹⁸Amɑ pɑ kʋhikim nɑ pɑ kɑsǝyɑɣɑ tǝnɑ, kɑ́ pǝsɩ Tɑcɑɑ nyǝm kɛ́. Pɑ kɑɑ kɑɑ-yɛɣɛ huɣule, yɑɑ pɑ́ sɩɩ-yɛ nɑ ɑ mpɑɑ. Amɑ Ɩsɔ tǝyɑɣɑ nyǝ́mɑ kɑ́ tɔɣɔnɑ-yɛ nɑ pɑ́ hɑɣɑ. Pɑɑ suunɑ-yɛɣɛ wontu kʋpɑmpɑntʋ.