Esayi 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Mbir mii la Yàlla won Esayi doomu Amocc ci mbirum Yuda ak Yerusalem.

²Fan yu mujj ya, dees na taxawal tundu kër Aji Sax ji, Aji Sax ji mooy gëna kawe ci tund yi, tiim tund yu ndaw yi, xeet yépp riirandoo, wutsi ko.

³Ay askan yu bareey dikk, naan: «Dikkleen nu yéegi tundu Aji Sax ji, fa kër Yàllay Yanqóoba, mu xamal nuy yoonam, ba nu doxe yooyu ñallam.» Siyoŋ kat la ndigalu yoon di bawoo, Yerusalem googu la kàddug Aji Sax ji di jóge.

⁴Mooy àtte diggante xeet yi, mooy dogalal ay askani askan, ñu tëgg seeni saamar ay illéer, def seeni xeej ay sàrt; aw xeet dootu xàccil moroom ma saamar, te dootuñu jàngati xare.

⁵Yeen waa kër Yanqóoba, kaayleen nu doxe leeru Aji Sax ji!

⁶Boroom bi, bàyyi nga waa kër Yanqóoba, sa ñoñ, ndax jëfi waa penku lañu feese, aki gisaanekat, ba mel ni waa Filisti, te ñooy tàppante pasook doomi doxandéem yi.

⁷Seen réew maa ngi ne gàññ ak xaalis ak wurus, alal du jeex, fas ne xas, watiiri xare du jeex.

⁸Seen réew maa ngi fees aki yàllantu; ñuy sujjóotal seen liggéeyu loxo yooyu, te ñoo ko sàkkal seen bopp.

⁹Doom aadama torox na, ku ne detteelu, waaye bu leen yékkati!

¹⁰Ayca ca xunti ma, làqujileen biiri pax, ba sore tiitaange ji Aji Sax ji sabab, sore darajay màggaayam.

¹¹Bésub keroog booba, ku bew bay regeju mooy detteelu, sagub nit sàggiku, Aji Sax ji doŋŋ mooy jagoo kawe.

¹²Bés déy ñeel na Aji Sax ju gàngoor yi, ca lay xaare képp ku bew ak ku reew, ba kuy daŋŋiiral, detteelu.

¹³Ca lay xaare garabi seedari Libaŋ yi ne coleet, ba kawe, ak garab yu mag ya fa Basan.

¹⁴Ca lay xaare wépp tund wu mag wu ne coleet, ak bépp jànj bu kawe,

¹⁵ak jépp tata ju gudd, ak bépp miir bu ñu dàbbli,

¹⁶ak gaalu Tarsis gu mag gu mu doon, ak gépp gaal gu taaru.

¹⁷Bésub keroog booba, kuy daŋŋiiral, detteelu, sagub nit sàggiku, Aji Sax ji doŋŋ mooy jagoo kawe.

¹⁸Yàllantu yépp a naan mes,

¹⁹nit ñi làquji biir xuntiy doj, ruuruji biiri pax, ba sore tiitaange ji Aji Sax ji sabab, sore darajay màggaayam, kera buy taxaw, ba suuf di lox.

²⁰Bésub keroog booba, yàllantuy xaalis ak wurus ya nit sàkkal boppam, di leen sujjóotal, ñoom lay sànni ca jaar yaak njugub ya,

²¹ba mana làquji ca xunti ya ak xarantey doj ya, ba sore tiitaange ji Aji Sax ji sabab, sore darajay màggaayam, kera buy taxaw, ba suuf di lox.

²²Baleen nit, noowal bakkan kese la! Ana lees koy nawe?