1Isaia, Amoso natuna, ese e itaia herevana, Iuda bona Ierusalem daidiai.
2Dina gabedia ai ina na baine vara: Iehova ena dubu ororona na atai-herea ororona ai baine hahelao, bona baine heabi isi ororo maraḡidia daediai. Bese iboudiai ese bae aru henia,
3taunimanima loḡora baema, baeto: Aoma, Iehova ena ororo baita dara dae henia, Iakob ena Dirava ena dubu ai; ia ese ena kara baine hadibalaida, ena dala ai baita raka helaoreana. Badina be Siona lalona amo taravatu bainela, Ierusalem amo Iehova ena hereva bainela.
4Ia ese bese idau-idau padadiai baine hahemaoro, bona hahemaoro herevadia na taunimanima loḡora baine gwaurai henidia; bena idia ese edia dare bae hododia, ruarua auridia ai bae halaodia, bona edia io bae hododia, kwama-kwama kaiadia ae bae halaodia; bese ta ese dare basine veri lasi, bese ta ihadikana totona, bona tuari daladia basie hahedibalai lou.
5Iakob besena e, aoma, Iehova ena diari ai baita raka.
6Badina be oi ese emu orea taudia vada o dadaraidia, Iakob besena vada o dadaraia; badina be mari-abi taudia mairiveina kahana amo bona rohe taudia Filistia taudia hetomadia ai e honumu, bona idau bese taudia ida e utua hehenimu mai ima udeudedia ida.
7Edia tano na silver bona gold ai e honumu, bona edia dava-bada kohudia na asie oremu; edia tano na hosi ai e honumu, bona edia kariota na asie oremu.
8Edia tano na kaivakuku ai e honumu; imadia amo vada e kara ḡaudia, ima kwakikwakidia amo vada e kara ḡaudia, e toma henidia dihomu.
9Taunimanima na unu amo e hamanaudiamu, taunimanima na e hamaraḡidiamu; edia dika basio gwau tao.
10Nadi-gini lalonai ba komu, ḡahu ai ba hetahuni ahu, Iehova igari-henina amo, bona ena pavapava hairaina amo.
11Vairadia ai e hekokorokumu taudia ita-itadia bae hamaragi, taunimanima edia heaḡi bae hamanau; Iehova sibona mo bae imodaia una dina ai.
12Badina be Iehova Sabaota na mai ena dina ta, heaḡi bona hekokoroku idoidiai bona e heabi isimu, atai ai e heatomu, ḡaudia iboudiai ihadikadia dinana;
13Lebanon sida-audia iboudiai, ḡau-latalatadia bona kidotaodia, bona Basan oak audia iboudiai ihadikadia dinana;
14ororo badadia iboudiai bona ororo ḡau-latalatadia iboudiai ihadikadia dinana;
15kohoro latadia iboudiai bona maḡu aukadia iboudiai ihadikadia dinana;
16Tarasisi lagatoidia iboudiai bona lagatoi herea-daedia iboudiai ihadikadia dinana.
17Taunimanima edia hekokoroku bae hamanau, taunimanima edia heaḡi bae hamaraḡi, bona Iehova sibona mo bae imodaia una dina ai.
18Bona kaivakuku na bae hapuki, bae hapuki vaitani.
19Bena taunimanima na nadi kohuadia lalodiai bae raka vareai, bona tano guridia lalodiai danu, Iehova igari-henina amo, bona ena pavapava hairaina amo, tanobada ihagarina totona baine tore isi negana ai.
20Una dina ai taunimanima ese edia silver kaivakukudia bona edia gold kaivakukudia, bae toma henidia diho totona e karadia ḡaudia, na migu bona sisiboi ediai bae negedia;
21bena nadi kohuadia lalodiai bae raka vareai, bona nadi-hagadia padadiai danu, Iehova igari-henina amo, bona ena pavapava hairaina amo, tanobada ihagarina totona baine tore isi negana ai.
22Taunimanima, laḡa na udu-baubauna ai e miamu ḡauna, ena amo ba raka oho, badina be ia namona be dahaka?
