Ɩsɑyii 43

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

¹Pǝnɛntɛ Tɑcɑɑ yɔɣɔtǝɣɩ sɩ: Yɑkɔpʋ yǝlɑɑ mɛ ɑwe ŋmɑɣɑ-mɛ? Ɩsɛɣɛlɩ nyǝ́mɑ mɛ ɑwe ŋmɑ-mɛ? Ɩ́ tɑɑ nyɑnɑ pʋlʋ. Mpi tɔ, mɑ yɑpɑ-mɛɣɛ. Mǝ hǝlɑ kɛ mɑ yɑɑnɑ-mɛ. Ɩ́ kɛ́ mɑ nyǝ́mɑ kɛ́.

²Ye ɩ́ tɛsǝɣɩ lʋm mɑ wɛ mǝ wɑɑlǝɣɩ. Pusi kɑɑ tɔɣɔ-mɛ. Pǝyele ye ɩ́ tɔŋ kɔkɔ tɑɑ kɑ kɑɑ nyɑɣɑ-mɛ. Kɔkɔ kɑɑ kʋ-mɛ.

³Mpi tɔ, mɑɣɑlɛ Tɑcɑɑ mǝ Ɩsɔ. Mɑ́ kɛnɑ Ɩsɛɣɛlɩ nyǝ́mɑ Nɑŋŋ tʋ. Wei ɩ wɑɑsǝɣɩ-mɛ tɔ. Icipiti nyǝ́mɑ kɛ mɑɑ fɛlɩ mǝ lonte. Mɑɑ lɑɣɑsǝɣǝnɑ-mɛɣɛ Ɩtiyopii nɑ Sepɑ nyǝ́mɑ.

⁴Mpi tɔ, ɩ́ kɛ-m pʋlʋ sɔsɔɔm kɛ́. Mǝ nyʋɣʋ kʋlɑɑ, nɑ mɑ́ sɔɔlɑ-mɛ. Mɑ cɛlǝɣɩ ɑpɑlɑɑ kɛ mǝ lonte. Mɑ lɑɣɑsǝɣǝnɑ yǝlɑɑ kɛ nyɑ́ weesuɣu.

⁵Mɑ wɛ mǝ wɑɑlɩ kɛ́, ɩ́ tɑɑ nyɑ́. Mɑɑ kɔnɑ mǝ lʋlʋɣʋ nyǝ́mɑ nɑ tɛʋ kite. Mɑɑ kɔnɑ-mɛ nɑ ilim tǝtʋlɛ.

⁶Mɑɑ heeli ilim ntɔɣɔŋ sɩ: Kɔnɑ-wɛ. Mɑɑ heeli ilim mpǝtǝŋ sɩ: Tɑɑ sɩɩ-wɛ. Kɔnɑ mɑ piyɑ nɑ pooluŋ. Lǝsɩ mɑ pɛɛlɑɑ nɑ tɛtʋ tǝnɑsɩ nɑ ń kɔnɑ.

⁷Pɑ tǝnɑ mpɑ pɑ yɑɑkǝnɑ mɑ hǝtɛ, nɑ mɑ ŋmɑ-wɛɣɛ mɑ teeli tɔɔ tɔ. Mɑ́ lɑpǝnɑ-wɛ.

⁸Ɩ́ yele nɑ mɑ yǝlɑɑ lɩɩ. Pɑ kɛ́ yʋlʋmɑɑ kɛ́, pǝyele pɑ wɛnɑ ɩsɛ. Pɑ kɛ́ ntɑmɑɑ kɛ́ pǝyele pɑ wɛnɑ ŋkpɑŋŋ.

⁹Piitimnɑɑ tǝnɑ ɩ́ kpeɣeli, yǝlɑɑ ɩ́ koti. Mǝ tɑɑ ɑwe kpɑɑlɑ tɔmnɑɑ mpɛ? Mpɑ pɑ heelinɑ-tʋɣʋ kɑncɑɑlɑɣɑ nyǝntʋ ntɩ? Pʋntʋnɑɑ ɩ́ hʋ́lɩ́ pɑ ɑseetɑ nyǝ́mɑ, pɑ hʋ́lɩ́ pɑ tɑmpɑnɑ, nɑ tǝ́ nɩɩ nɑ tǝ tisi sɩ ḿpʋ́ɣʋ́.

¹⁰Mɛɣɛlɛ mɑ ɑseetɑ nyǝ́mɑ. Tɑcɑɑ mɑ́ mɑ yɔɣɔtǝnɑ mpʋ. Mǝ nɑ mɑ tǝmlɛ tʋ wei mɑ lǝsɑɑ tɔ. Ɩlɛnɑ pǝ́ lɑ́ nɑ ɩ́ nyɩ-tɩ nɑ ɩ́ tɛ-m nɑ mǝ tɑɑ. Nɑ ɩ́ cɛkǝnɑ sɩ mɑɣɑ. Ɩsɔ nɔɣɔlʋ ɩ tɑɑ wɛɛ nɑ pǝ́cɔ́ pǝ́ tɑkɩ-m. Pǝyele Ɩsɔ nɔɣɔlʋ ɩ kɑɑ lɩɩ mɑ wɑɑlɩ tɔtɔ.

¹¹Mɑɣɑlɛ Tɑcɑɑ, mɑ pɑɑsi, wɑɑsʋlʋ nɔɣɔlʋ ɩ fɛɩ tɔtɔ.

¹²Mɑ́ kpɑɑlǝnɑ, mɑ́ wɑɑsǝnɑ. Mɑ heelɑ nti tɩɩ kɔɔ tɔ. Pǝ tɑɣɑ mǝ hɛkʋ tɑɑ tʋɣʋ kpɑɩ nyǝŋkʋ nɑkʋlɩ. Mɛɣɛlɛ mɑ ɑseetɑ nyǝ́mɑ. Mɑ́ kɛnɑ Ɩsɔ. Tɑcɑɑ mɑ́ mɑ yɔɣɔtǝnɑ mpʋ.

¹³Mɑɣɑlɛ Ɩsɔ kɛ́ hɑtoo tɑm tɔɔ. Nɔɣɔlʋ ɩɩ fitiɣi pʋlʋɣʋ mɑ niŋ tɑɑ. Awe kɑ wɑkǝlɩ mpi mɑ lɑkɩ tɔ?

¹⁴Tɑcɑɑ Ɩsɛɣɛlɩ Ɩsɔ Nɑŋŋ tʋ wei ɩ wɑɑsǝɣɩ tɔ. Ɩ yɔɣɔtǝɣɩ sɩ: Mǝ tɔɔ kɛ́ mɑ tiliɣi nɔɣɔlʋ sɩ ɩ́ yoonɑ Pɑpiloni. Mɑɑ yele nɑ lʋm tɔɣɔ Kɑlǝtee selɑɑ kpɩɩlǝŋ, wei ɩ tɑɑ pɑ nɩɩkɩ leleŋ tɔ.

¹⁵Mɑɣɑlɛ mǝ Nɑŋŋ tʋ Tɑcɑɑ. Mǝ wulɑʋ wei ɩ ŋmɑwɑ Ɩsɛɣɛlɩ tɔ.

¹⁶Mɑɣɑlɛ Tɑcɑɑ wei ɩ hɛɛ hɑpǝlɛ kɛ teŋku tɑɑ nɑ mpɑɑʋ kɛ lʋm toŋ nyǝm tɑɑ tɔ mɑ yɔɣɔtɑɑ sɩ:

¹⁷Ɩ lǝsɑ yoou kɛɛkɛnɑɑ nɑ pǝ kpɑɣɑnǝŋ. Pɑ hǝntɑ pɑ tǝnɑ, pɑ temɑɣɑ. Pɑ nyɑɣɑɑ kɛ́ ɩsɩɩ fǝtǝlɑ kponkpontuɣu.

¹⁸Ɩ́ tɑɑ tɔɔsɩ kɑncɑɑlɑɣɑ nyǝntʋ tɔɔ. Pǝyele ɩ́ tɑɑ pɑɑsǝnɑ kʋpǝm tɔm.

¹⁹Yɑɑsi kʋfɑlʋ kɛ mɑ cɑɑkɩ lɑpʋ, hɑlɩ yɑɑsi ɩnɩ ɩ cɑɑkɩ lɑpʋ. Ɩ tɑ nyǝmɩ-ɩ? Mɑɑ hɛɛ mpɑɑʋ kɛ wʋlɑɣɑ tɛtʋ tɑɑ, nɑ mɑ́ yele nɑ pusi sɔsɔɔnsɩ kpe.

²⁰Tɑɑlɛ wontu kɑ́ sɑ-m. Pǝ kpɑɣɑʋ tɑɑlɛ hɑsɩ nɑ tɑɑtɑɑnɑɑ tɔ. Mpi tɔ, mɑɑ tʋ́ pusi sɔsɔɔnsɩ kɛ wʋlɑɣɑ tɛtʋ tɑɑ sɩ mɑ yǝlɑɑ kʋlǝsɑɑ ɩ́ nyɔɔ.

²¹Yǝlɑɑ mpɑ mɑ ŋmɑwɑ mɑ tɩ tɔ, pɑɑ sɑ-m kɛ́.

²²Ḿpʋ́ɣʋ́ Tɑcɑɑ yɔɣɔtɑɑ sɩ: Yɑkɔpʋ pǝ tɑɣɑ mɑɣɑ n yɑɑwɑ. Ɩsɛɣɛlɩ kɑwɑ mɑ tɔm.

²³Pǝ tɑɣɑ mɑɣɑ n lɑpɑ kɔtɑɣɑ ŋkɑ kɔkɔ lusɑ kɑ tǝnɑ tɔɣɔ nyɑ́ ɩwɛɛsɩ. Pǝ tɑɣɑ mɑ hǝtɛ tɑɑ kɛ n lɑpɑ nyɑ́ kɔtɑsɩ. Mɑ tɑ wiinɑ-ŋ sɩ ń lɑ-m kɔtɑsɩ. Pǝyele mɑ tɑ cɑɑlɩ-ŋ tulɑɑlʋnɑɑ tɔɔ.

²⁴N tɑ yɑ-m tulɑɑlʋ nɑ liɣitee. Pǝ́cɔ́ n tɑ hɑɣɑsɩ-m nyɑ́ kɔtɑsɩ nim. Amɑ nyɑ́ ɩsɑɣɑtʋ kɛ n cɑɑlǝnɑ-m. N tʋ-m wɑhɑlɑ nɑ nyɑ́ kʋpǝntǝŋ.

²⁵Amɑ mɑ mɑ tike mɑ hɩɩsǝɣǝnɑ mǝ ɩsɑɣɑtʋ kɛ mɑ sɔɔlɑ-mɛ tɔ pǝ tɔɔ. Mɑ kɑɑ tɑsɑ mǝ kɑwɑlɑɣɑ tɔɔ kɛ́ tɔɔsʋɣʋ.

²⁶Mpʋ tɔ, kɛɛsɩ nyɑ́ tɔm. Tǝ́ sʋʋ hʋʋlɛ tɑɑ. Kɛɛsɩ mpi pǝ hʋlǝɣɩ sɩ n wɛnɑ tɑmpɑnɑ tɔ.

²⁷Nyɑ́ cɔsɔ pǝntɑɑ. Nyɑ́ tɔm tɛlǝsǝlɑɑ kʋlɑ mɑ tɔɔ.

²⁸Pǝ tɔɔ kɛ́ mɑ nyǝnɑ Ɩsɔ tǝsɛɛlɛ nyʋɣʋ nyǝ́mɑ kɛ tɛtɛlɑtɑɑ. Mɑ yelɑ Yɑkɔpʋ nɑ pǝ́ wɑkǝlɩ-ɩ. Mɑ yelɑɑ nɑ pɑ́ tʋʋ Ɩsɛɣɛlɩ.