1Ḿpʋ́ɣʋ́ Tɑcɑɑ yɔɣɔtɑɑ sɩ: Mɑ tǝmlɛ tʋ Yɑkɔpʋ, Ɩsɛɣɛlɩ nyɑ́ wei mɑ lǝsɑɑ tɔ nɩɩ pǝnɛntɑɑ.
2Tɑcɑɑ wei ɩ ŋmɑɣɑ-ŋ nyɑ́ hɔɔʋ tɛɛ, nɑ ɩ́ lɑ-ŋ nɑ ɩ́ pɑɑsǝɣǝnɑ-ŋ tɔ ɩ tɔmɑ sɩ: Mɑ tǝmlɛ tʋ Yɑkɔpʋ, tɑɑ nyɑ́, Yesuluŋ*fɑ* nyɑ́ mɑ́ lǝsǝnɑ-ŋ. Lɛlʋɣʋ 32:15 tɑɑ n kɑ́ nɑ mpʋ.
3Pǝ tɑɣɑ pʋlʋ, mɑɑ pǝlɩ lʋm kɛ wʋlɑɣɑ tɛtʋ tɔɔ. Mɑɑ lɑ nɑ pusi kpe tǝ tɑɑ. Mɑɑ tisi mɑ Feesuɣu kɛ nyɑ́ lʋlʋɣʋ nyǝ́mɑ tɔɔ. Mɑɑ tǝŋsɩ nyɑ́ piyɑ piyɑ kɛ nɔɔsɩ kʋpɑŋsɩ.
4Pɑɑ pɩɩ nyɩɩtʋ hɛkʋ tɑɑ ɩsɩɩ tɩɩŋ wei ɩ sǝŋɑ lʋm nɔɣɔ tɔ.
5Pɑ tɑɑ nɔɣɔlʋ kɑ yɔɣɔtɩ sɩ: Mɑ kɛ́ Tɑcɑɑ nyǝŋ kɛ́. Lɛlʋ kɑ́ hɑ ɩ tǝɣɩ Yɑkɔpʋ hǝtɛ. Ɩlɛnɑ lɛlʋ nɑ́ɑ́ ŋmɑɑ ɩ niŋ tɔɔ sɩ: Mɑ kɛ́ Tɑcɑɑ nyǝŋ. Pɑɑ yɑɑkɩ-ŋ Ɩsɛɣɛlɩ hǝtɛ.
6Ḿpʋ́ɣʋ́ Tɑcɑɑ Ɩsɛɣɛlɩ wulɑʋ wei ɩ yɑkɩ-ŋ nɑ ɩ́ kɛ́ Pǝ tǝnɑ pǝ tʋ tɔ ɩ yɔɣɔtɑɑ sɩ: Mɑɣɑlɛ kɑncɑɑlɑɣɑ tʋ nɑ kɑntǝkɑɣɑ tʋ. Mɑ wɑɑlɩ, Ɩsɔ nɔɣɔlʋ ɩ fɛɩ tɔtɔ.
7Awe wɛ ɩsɩɩ mɑ? Pʋntʋ ɩ́ yɔɣɔtɩ nɑ ɩ́ kɛɛsɩ-m hɑtoo kʋyɑŋkʋ mɑ sɩɩwɑ yǝlɑɑ kɛ tɑm tɔɔ tɔ. Pʋntʋ ɩ́ yɔɣɔtɩ nɑ ɩ́ kɛɛsɩ nti tɩɩ kɔɔ tɔ.
8Tɑɑ nyɑ́, pǝ́cɔ́ tɑɑ sele. Ɩsɩɩ mɑ tɛmɑ-ŋ-tǝɣɩ heeluɣu kɛ hɑtoo lɔŋ nɑ? N kɛ́ mɑ ɑseetɑ tʋ kɛ́. Mɑ pɑɑsi Ɩsɔ nɔɣɔlʋ ɩ wɛɛ? Pǝ́cɔ́ kʋkpɑmʋɣʋ nɑkʋlɩ kʋ fɛɩ. Mɑ tɑ nɑ pǝ tʋ.
9Tɩɩŋ kʋlɑlɑɑŋ lutɑɑ tǝnɑ kɛ́ kpɛtɛ kɛ́. Mǝ kʋlupum kʋpɑm ɩɩ wɑɑsǝɣɩ pʋlʋ. Tɩɩŋ ɩnɩ ɩ mɑɣɑmɑɣɑ ɩ lǝsǝɣǝnɑ ɩ tǝɣɩ ɑseetɑ. Mpi tɔ, ɩɩ nɑɑkɩ. Pǝ́cɔ́ ɩ tɑ nyɩ pʋlʋ. Fɛɛlɛ kɑ́ tɔɣɔ-ɩ kɛ́.
10Yʋlʋ kɑ́ lu yɑɑ ɩ́ sɑɑkɩ tʋɣʋ, nɑ kʋ kɑɑ wɑɑsɩ-ɩ pʋlʋ?
11Fɛɛlɛ kɑ́ kpɑ mǝ tǝnɑ mpɑ mɛ ɩ́ tǝŋǝɣɩ-ɩ tɔɣɔ. Tɩɩŋ lutɑɑ mɑɣɑmɑɣɑ nɑ́ kɛ́ yǝlɑɑ kɛ́. Mǝ tǝnɑ ɩ́ koti nɑ ɩ́ kɔɔ. Sɔɣɔntʋ kɑ kpɑ mǝ tǝnɑ nɑ fɛɛlɛ pɩɩ-mɛ.
12Koolu sɛtǝɣǝnɑ nyǝɣǝlʋɣʋ, nɑ ɩ́ wɔ-kʋɣʋ kɔkɔ nɑ ɩ́ tɑɣɑnɩ-kʋ. Nɑ ɩ́ mɑ-kʋɣʋ mɑɑlǝtoo nɑ ɩ tomɑ, nɑ ɩ́ lɑ-kʋɣʋ ɩsǝnɑ ɩ cɑɑ tɔ. Ye nyɔɣɔsɩ kpɑ-ɩ, ɩ fɛɩnɑ tomɑ. Ye ɩ sɔɔwɑ lʋm nyɔɔʋ ɩ pǝsǝɣɩ ɩcɑm kɛ́.
13Sɑɑkʋlʋ nɑ́ tʋɣɩ ŋmǝnɑɣɑ kɛ tǝpǝyɑɣɑ tɔɔ. Nɑ ɩ́ pɩɩ looŋɑ nɑ ŋmɑɑlɑɣɑ, nɑ ɩ́ mɑɣɑsɩ-kɛ nɑ mɑɣɑsǝlɑɣɑ. Ɩlɛnɑ ɩ́ sɑɑkɩ lɛɛsʋɣʋ ɩsɩɩ yʋlʋ nɑ sɑɑkǝlɑɣɑ, nɑ ɩ́ sɩɩ-kʋɣʋ kutuluɣu tɑɑ.
