Isaias 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Iyan heini impehayag te Megbevayà diyà te ki Isaias he anak ni Amoz mehitenged te Juda wey Jerusalem:

²Diyà te huziyan he menge andew, sikan is buvungan he edhitindeǥan duen te valey te Nengazen egkehimu he lavew he impurtanti te langun he menge vuvungan. Ne ebpekeuma kayi he vuvungan is mahabet he menge etew he ebpemuun diyà te langun he menge nasyun.

³Egkaǥi sikandan te, “Hendini kew en, su edtekezeg kiw ziyà te vuntud te Nengazen, diyà te valey te Megbevayà ni Jacob. Su ebpenuruen kiw zin te menge paaǥi zin su wey tew metuman heini.” Umbe, ed-ulì is menge etew he ebpuun diyà te Zion, he iyan is inged he Jerusalem, ne ed-uwiten dan is kesuǥuan te Nengazen.

⁴Ne pinaaǥi te kesuǥuan din, edhusayen din is menge kebikilan te mahabet he menge nasyun. Umbe kenè ne ebpetebtebekà is menge etew ziyà te menge nasyun, wey kenè dan en mebpenurù te menge etew te para te kebpekidtebek. Ebeelan dan dà maan he punta te menge eradu is menge ispada zan, wey ebeelan dan dà he para te igkamet is menge vangkew zan.

⁵Hendini kew is menge kevuwazan ni Jacob, ebpengungubpaan kiw he sungkad te ketutuanan he ibeǥey kenitew te Nengazen tew.

⁶Tutuu iyan he inselikwey nu, Nengazen, is menge etew nu, kes menge kevuwazan ni Jacob, su midtuu sikandan te menge tuluuwen he ebpuun diyà te edsilaan wey te menge menenagnà iring te menge Filistihanen. Mid-iringan dan is menge vetasan te menge lumelengyawà.

⁷Mahabet he menge pelata wey vulawan diyà te tanè dan, ne kenà egkaamin is ketiǥeyunan dan. Mahabet is menge kudè dan, ne kenà egkaamin is menge kerwahi zan.

⁸Mahabet is menge ed-ezapen dan. Ed-ezapen dan is menge vutang he vineelan dan dà.

⁹Umbe, ebminusen is ked-etew te kada sevaha kandan wey ebpeel-elezan nu. Kenè nu sikandan peseyluwa, Nengazen!

¹⁰Menge Israilihanen, pelaǥuy kew pehendiyà te menge surung etawa menge vudsi su wey niw meelesi is egkepeuk he Nengazen wey is utew zekelà he ǥehem din.

¹¹Egkeuma is andew he iyan dà is Nengazen edeliǥen. Ibpekevavè din is ked-etew te menge hembugiru wey menge mepelevawen.

¹²Su zuen andew he midtelaan te Nengazen he Mekeǥeǥehem he zutun ibpekevavè din is ked-etew te menge hembugiru, menge mepelevawen, wey mid-isip dan he gemhanan sikandan.

¹³Ebpemilayen din is langun he metawis he kayu he sidru ziyè te Lebanon, wey is langun he kayu he ulayan diyà te Bashan.

¹⁴Ebpetaǥen din is langun he metikang he menge vuntud wey menge vuvungan,

¹⁵wey edtempaǥen din is langun he metikang he menge turi wey menge verengbeng.

¹⁶Edlenezen din is langun he menge varku ziyà te Tarshish wey is mekempet he menge untuzà.

¹⁷Dutun he andew iyan dà edeliǥen is Nengazen. Ibpekevavè din is ked-etew te menge hembugiru wey menge mepelevawen.

¹⁸Ne egkahanew is langun he tarù he menge ed-ezapen.

¹⁹Ebpememelaǥuy is menge etew pehendiyà te menge surung diyà te kelendiǥan wey ziyà te menge vudsi te tanà su ed-elesan dan is Nengazen he egkepauk wey is utew subra he ǥehem din emun edhuyungen din en is kelibutan.

²⁰Dutun he andew, is menge ed-ezapen he menge pelata wey menge vulawan he mibeelan dan su ed-ezapen dan, ibpenimbag dan diyà te menge rumat wey menge kaveg.

²¹Ebpememelaǥuy zan pehendiyà te menge surung diyà te kelendiǥan wey ziyà te zezekelà he menge vatu su ed-elesan dan is Nengazen he egkepauk wey is utew subra he ǥehem din emun edhuyungen din en is kelibutan.

²²Kenè kew sarig te etew su ebpatey heini. Ne wazè kayi igketavang.