1Ɩ́ yele nɑ mɑ́ mɑ́, mɑ tɑɑpɑlʋ kɛ kɑwǝyɑɣɑ. Mɑ tɑɑpɑlʋ nɑ lɛsɛŋ tʋɣʋ pɑ kɑwǝyɑɣɑ kɛ́. Mɑ tɑɑpɑlʋ kɑ wɛnɑ lɛsɛŋ tʋɣʋ kɛ tɛtʋ kʋpɑntʋ pulɑɣɑ nɑkǝlɩ kɑ tɔɔ.
2Ɩ lukɑ pulɑɣɑ ŋkɛɣɛ nɑ ɩ́ lǝsɩ kɑ pɛɛ tǝnɑ. Ɩlɛnɑ ɩ́ sɔ lɛsɛŋ tʋɣʋ kʋpɑŋkʋ. Ɩ ŋmɑ́ tǝtɑŋlɛ kutuluɣu nɑ ɩ́ huli tǝnyɑɑsǝlɛ. Ɩ tɛɛlɑɣɑ sɩ kɩɩ lʋlɩ pee kʋpɑnɑ kɛ́. Amɑ kʋlɛ kʋ tɑ lʋlɩ kʋpɑnɑ.
3Ḿpʋ́ɣʋ́ mɑ tɑɑpɑlʋ tɔmɑ sɩ: Tɔʋ, Yutɑ nɑ Yosɑlɛm pǝ nyǝ́mɑ ɩ́ hʋʋ mɑ́ nɑ mɑ lɛsɛŋ tʋɣʋ tɑ́ tɔm.
4Mɑ tɛmɑ-kʋɣʋ pǝ tǝnɑɣɑ lɑpʋ, mɑ́ tɑsɑ we tɔtɔ? Mɑ tɛɛlɑɣɑɑ sɩ kɩɩ lʋlɩ lɛsɛŋnɑɑ kʋpɑmɑ. Ɩlɛ pepe tɔɔ kɛ́ kʋ tɑ lʋlɩ pʋlʋ kʋpɑm.
5Nɔɔnɔɔ, mɑɑ heeli-mɛɣɛ nti mɑɑ lɑnɑ-kʋ tɔ. Mɑɑ kpɛsɩ kʋ kɑlɑɑ nɑ heeŋ tɔɣɔ-kʋ. Mɑɑ yɔkɩ kʋ koluŋɑ nɑ mpɑtɔntɑɑ fɛlɩ-kʋɣʋ nɔɔhɛɛ.
6Mɑɑ yele nɑ nyɩɩtʋ ɩsɑɣɑtʋ lɛɛkɩ-kʋ. Nɔɣɔlʋ kɑɑ hɑlɑ-tɩ yɑɑ ɩ́ tɑɣɑnɩ-kʋ. Sɔwɑ tɩɩŋ nɑ nyɩɩtʋ ɩsɑɣɑtʋ kɑ́ nyɑlɑ. Mɑ kɑɑ yele nɑ tɛʋ tɑsɑ-kʋɣʋ nɩɩʋ.
7Pǝ tǝnɑ pǝ tʋ Tɑcɑɑ tɑɑlɛ ntɛɣɛlɛ Ɩsɛɣɛlɩ yǝlɑɑ. Yutɑ yǝlɑɑ mɛɣɛlɛ lɛsɛŋ tʋɣʋ ŋku ɩ lǝsɑɑ tɔ. Tɑmpɑnɑ tǝŋʋɣʋ kɛ ɩ tɛɛlɑɣɑɑ. Ɩlɛnɑ mɩɩ lɑkɩ ɩsɑɣɑtʋ. Pɩɩ wɛɛ sɩ ɩ́ tǝŋ siɣisuɣu. Ɩlɛnɑ mɩɩ lɑkɩ kʋtɑkɛɛsǝm kɛ pɑɑ timpi, nɑ yǝlɑɑ mɑkɩ kɑpusi nɑ lɑŋwɑkǝllɛ.
8Mpɑ pɑ pɩɩlǝɣɩ tɛɛsɩ kɛ pɑ tike tɔ pɑ tɔm wɛ wɑɩyo kɛ́. Mpɑ pɑ pɩɩlǝɣɩ tɑwɑ kɛ pɑ tike tɔ pɑ tɔm wɛ wɑɩyo kɛ́. Pɑ tɛŋ ɩcɑtɛ tǝnɑ, nɑ tɛtʋ pǝsǝɣɩ pɑ nyǝntʋ.
9Pǝ tǝnɑ pǝ tʋ Tɑcɑɑ, yɔɣɔtɑɑ nɑ ɩ́ tuu nɑ mɑ́ nɩɩ sɩ: Tɛɛsɩ nsɩ sɩ tǝnɑ sɩɩ wɑkǝlɩ. Tɛɛsɩ kʋpɑŋsɩ sɔsɔɔnsɩ nsɩ sɩɩ wɛɛ kpɛtɛ, nɔɣɔlʋ kɑɑ cɑɣɑ sɩ tɑɑ.
10Ye wei ɩ́ hɑlɑ lɛsɛŋ tɩɩŋ kɑŋkɑnɑsɩ tooso, sʋlʋm liitilinɑɑ nɩɩlɛ nɑ nɑɑnʋwɑ tike kɛ ɩ kɑ́ hiki. Wei ɩ́ tuuwɑ tɔɣɔnɑɣɑ pee kɛ sɑɑkɩ, kiloonɑɑ nɑɑnʋwɑ tike kɛ ɩ kɑ́ kʋ.
11Mpɑ pɑ pɛɛkǝɣɩ sʋlʋm toŋ nyǝm kɛ tɑnɑŋ tǝhulu, nɑ mpɑ pɑ nyɔɔkɩ-wǝɣɩ tɑpɩɩlɛ nɑ pǝ́ kʋɣɩ-wɛ tɔ, pɑ tɔm wɛ wɑɩyo kɛ́.
12Sɑŋkʋnɑɑ nɑ cǝmǝŋ nɑ ɑkilimɑnɑɑ nɑ hǝsɩ pǝ hɑŋnɑ nɑ sʋlʋm kʋɣʋ-wɛ. Amɑ pɑɑ pɑɑsǝɣǝnɑ mpi Tɑcɑɑ lɑkɩ tɔ, pǝ́cɔ́ pɑɑ cɛkǝɣǝnɑ ɩ niŋ tǝmɑ.
13Pǝ tɔɔ kɛ Tɑcɑɑ yɔɣɔtǝɣɩ sɩ: Pɑɑ kuu mɑ yǝlɑɑ. Mpi tɔ, pɑ tɑ cɛkǝnɑ pʋlʋ. Pɑ nyʋɣʋ nyǝ́mɑ kɑ́ sɩ nyɔɣɔsɩ, nɑ sɑmɑɑ nɑ́ɑ́ sɩ lʋkɔtʋ.
14Ɩsɑyii sɩ: Pǝ tɔɔ kɛ́ ɑtɛtǝlɛ hɑɑ nɔɣɔ sɩ tǝ liki ɩcɑtɛ sɔsɑɑ nɑ sǝkpemɑ. Pɑ nɑ pɑ ɑcimɑ ɑŋmɑɑlɑ, pɑɑ tii ɑtɛtǝlɛ tɑɑ.
15Pɩɩ tisi sɔsɑɑ nɑ sǝkpemɑ tǝnɑ tǝfɛ. Kɑlɑmpɑɑnɩ nyǝ́mɑ kɑ́ kɑ nyɔɔŋ.
16Pǝ tǝnɑ pǝ tʋ Tɑcɑɑ kɑ́ hʋlɩ ɩ sɔsɔɔntʋ nɑ ɩ́ sɩɩ ɩ luɣu nyǝntʋ. Ɩsɔ Nɑŋŋ tʋ ɩnɩ ɩ kɑ́ hʋlɩ ɩ tǝnɑŋŋ wɛɛtʋ nɑ ɩ́ kɔnɑ siɣisuɣu.
17Ɩcɑtɛ ncɑɑ tɑɑ kɛ́ heeŋ kɑ tɔkɩ, ɩsɩɩ nyɩɩtʋ tɑɑ. Pinɑsɩ nsi pɑ cɑlǝɣɩ teu tɔ sɩɩ pɛɛkɩ tǝnɑɣɑ sɩ tɔɣɔnɑɣɑ.
18Ɩ́ pǝsɑ pɔpɔtʋ kɛ ŋmɩɩsɩ nɑ ɩ́ hɔŋnɑ kʋpǝntǝŋ kɛ mǝ wɑɑlɩ. Ɩ́ hɔŋ mǝ kɑwɑlɑɣɑ ɩsɩɩ nɑɑŋ nɑ kɛɛkɛ tɔ, mǝ tɔm wɛ wɑɩyo kɛ́.
19Ɩ́ tɔŋ sɩ: Tɑcɑɑ lɑ mpi n cɑɑ lɑpʋ tɔɣɔ lɔŋ nɑ tǝ nɑ́. Mɛ sɩ: Tǝ cɑɑ tǝ nɑ́ mpi mpi Ɩsɛɣɛlɩ Ɩsɔ Nɑŋŋ tʋ sɩɩwɑ nɑ ɩ́ tǝŋǝɣɩ nɑ ɩ́ lɑkɩ tɔ.
20Mpɑ mɛ ɩ́ yɑɑ kʋpɑntʋ kɛ ɩsɑɣɑtʋ, nɑ ɩsɑɣɑtʋ kɛ kʋpɑntʋ tɔ. Ɩ́ yɑɑkɩ nyɑɑlǝm kɛ sǝkpɛtʋɣʋ, nɑ sǝkpɛtʋɣʋ kɛ nyɑɑlǝm. Ɩ́ lɑɣɑsǝɣɩ leleŋ kɛ nyɑŋ, nɑ nyɑŋ kɛ leleŋ tɔ, mǝ tɔm wɛ wɑɩyo kɛ́.
21Mpɑ mɛ ɩ́ nyǝnǝɣɩ mǝ tǝɣɩ lǝmɑɣɑsɛɛ nyǝ́mɑ yɑɑ lɑɣɑtʋnɑɑ tɔ, mǝ tɔm wɛ wɑɩyo kɛ́.
22Mpɑ mɛ ɩ́ kɛ́ tɑŋkɑʋnɑɑ kɛ sʋlʋm tǝnyɔɔlɛ tɔ, mǝ tɔm wɛ wɑɩyo kɛ́. Mpɑ mɛ mǝ yɑɑ mǝ tǝɣɩ ɑkɑnɑɑ kɛ sʋlʋm situɣu tɑɑ tɔ, mǝ tɔm wɛ wɑɩyo kɛ́.
23Ɩ́ hɑɑkɩ tɑsǝkǝlɛ tʋ kɛ tɑmpɑnɑ kɛ kʋhɑʋ tɔɔ kɛ́ hʋʋlɛ tɑɑ, nɑ ɩ́ kʋ tɑmpɑnɑ tʋ tɔm.
24Pǝ tɔɔ kɛ́ ɩ́ kɑ́ nyɑɣɑ kɔkɔ kɛ lɔŋ ɩsɩɩ kiisi yɑɑ nyɩɩtʋ kʋwʋlʋtʋ. Ɩ́ kɑ́ tɑsɑ mǝ kilɑ tɛɛ, nɑ ɩ́ sɑɑlɩ yem. Mpi tɔ, ɩ́ nyǝnɑ yem kɛ́ Pǝ tǝnɑ pǝ tʋ Tɑcɑɑ kʋsɛɣɛsǝtʋ. Ɩ́ footɑ Ɩsɛɣɛlɩ Ɩsɔ Nɑŋŋ tʋ kʋyɔɣɔtʋtʋ.
25Pǝ tɔɔ kɛ́ Tɑcɑɑ pɑ́ɑ́nɑ́ kpɑnɑ ɩ yǝlɑɑ. Ɩ teɣetɑ ŋkumle nɑ ɩ́ mɑ́-wɛ. Ɩlɛnɑ pɔɔŋ sele, nɑ sǝtɑɑ sɔɣɔtɩ hɑpɛɛ tɔɔ, ɩsɩɩ nyɩɩtʋ. Pɑɑ nɑ mpʋ Tɑcɑɑ pɑ́ɑ́nɑ́ tɑ hɛɛ. Tɑcɑɑ tɔŋnɑ ŋkumle kɛ teɣetuɣu kɛ́.
26Tɑcɑɑ sikɑ tuutɑ kɛ piitim pooluŋ nyǝm. Ɩ hʋlɑ kɑcʋɣʋlɑɣɑ nɑ ɩ́ yɑɑ-wɛɣɛ ɑntulinyɑ tǝnɑɣɑ tɔɔ sɩ pɑ́ kɔɔ. Mpɛɣɛlɛ nɑ pɑ́ tɔŋnɑ kɔntɛ kɛ lɔŋlɔŋ.
27Yoolɑɑ mpɛ pɑ tɑɑ nɔɣɔlʋ tɑ kɑ́ yɑɑ ɩ pɔntǝɣɩ. Tom tɑ kɑɑ nɔɣɔlʋ, nɔɣɔlʋ tɑmpɑlɑ tɑ hɛtɩ, pǝ́cɔ́ ɩ ntɑŋkpɑlɑ ŋmǝnɑɣɑ tɑ fiti.
28Yoolɑɑ sɑlɑ pɑ nyǝmɑ́ kɛ́, nɑ pɑ tɔɔŋ pɑmɑ. Pɑ kpɑɣɑnǝŋ ɑcʋwɑ wɛ toŋ kɛ ɩsɩɩ kʋkpɑmǝŋ, nɑ pɑ yoou kɛɛkɛnɑɑ cɔɔkɩ ɩsɩɩ kɑcuculɑɣɑ.
29Yoolɑɑ mpɛ pɑ yoou kɑkiisɑsɩ nǝɣǝsǝnɑ kɛ́ ɩsɩɩ tɔɣɔlɑɣɑ ɑlʋ nyǝŋkɑ wulɑ. Pɑ nyɩɩsǝɣɩ kɛ́ ɩsɩɩ tɔɣɔlɑsɩ kʋfɑsɩ. Pɑ kpɑɑkɩ pɑ tɔɣɔnɑsɩ, nɔɣɔlʋ fɛɩ sɩ ɩ lɛɛkǝɣɩ.
30Kʋyɑkʋ ŋkʋ, kɔkɔtɛ sɔsɔɔlɛ kɑ́ kʋlɩ mǝ tɔɔ ɩsɩɩ teŋku kɔkɔtɛ. Ɩ́ kɑ́ nyǝnnɑ tɛtʋ hɔɣɔlʋɣʋ tɔɔ, nɑ ɩ́ nɑ́ sǝkpɛtʋɣʋ nɑ lɑŋwɑkǝllɛ. Mʋsʋɣʋ ɑnɑɑm kɑ́ wɑ́ɑ́sɩ nyɑɑlǝm tɔɔ.
