Ɩsɑyii 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

¹Ɩɩ nɑɑkɩ mpi Tɑcɑɑ Pǝ tǝnɑ pǝ tʋ kɑ́ lǝsɩ Yutɑ tɛtʋ nɑ Yosɑlɛm ɩcɑtɛ pǝ tɑɑ tɔɣɔlɔ. Ɩ kɑ́ lǝsɩ pǝ tǝnɑ mpi pǝ wɑɑsǝɣɩ yǝlɑɑ kɛ teu tɔ. Pǝ kpɑɣɑʋ tɔɣɔnɑɣɑ tǝnɑ nɑ lʋm tǝnɑ tɔ.

²Akɑnɑɑ nɑ yoolɑɑ nɑ hʋʋlɑɑ, nɑ Ɩsɔ kʋyɔɣɔtʋtʋ tɛlǝsǝlɑɑ nɑ nɑlɑɑ nɑ kʋkpɑtǝlɑɑ.

³Nɑ yoolɑɑ nɩɩlɛ nɑ nɑɑnʋwɑ nyʋɣʋ nyǝ́mɑ nɑ kʋpɑɣɑlɑɑ, nɑ lɑɣɑtʋ tɑsǝlɑɑ, nɑ mpɑ pɑ lɑkɩ niŋ tǝmɑ nɑ cɑŋǝm tɔ, nɑ topotopo nyǝ́mɑ sɔsɑɑ.

⁴Tɑcɑɑ kɑ́ kpɑ-wɛɣɛ ɑwɑɑsɑ kɛ ɑwulɑɑ, nɑ piyɑ ŋmɑkǝlǝɣɩ-wɛ.

⁵Yǝlɑɑ kɑ muɣuliɣi tǝmɑ. Ɩfepiyɑ kɑ́ kʋlɩ kʋkpɑtǝlɑɑ tɔɔ, nɑ tɛtɛlɑtɑɑ nɑ́ɑ́ kʋlɩ kʋpɑɣɑlɑɑ tɔɔ.

⁶Hɑlɩ lʋlʋɣʋ kʋlʋmʋɣʋ tʋ kɑ́ kpɑ ɩ tɛɛtʋ nɑ ɩ́ tɔmɩ-ɩ sɩ: Nyɑ́ wɛnɑ toko tɔ, lɑ tɑ wulɑʋ nɑ ń pɑɑsǝnɑ sɑmɑɑ yɛlɛyɛlɛ ɩnɛ.

⁷Amɑ ɩ́lɛ́ ɩ kɑ́ mɑ kɑpukɑ kɛ kʋyɑkʋ ŋkʋ sɩ: Mɑ tɑ kɛ kɔɔlɛ lɑtʋ. Pǝyele mɑ fɛɩnɑ tɔɣɔnɑɣɑ, yɑɑ toko kɛ mɑ tɛ. Mpʋ tɔ, ɩ́ tɑɑ kpɑ-m wulɑʋ.

⁸Yosɑlɛm cɛŋlǝɣɩ, Yutɑ hotɑɑ. Mpi tɔ, pɑ kʋlǝɣɩ Tɑcɑɑ teeli tɔɔ kɛ́ pɑ yɔɣɔtɑɣɑ nɑ pɑ kʋlɑpǝlɛ tɑɑ.

⁹Ɩsǝnɑ pɑ ɩsɛntɑɑ wɛɛ tɔ, mpʋ pǝ kʋɣʋnɑ pɑ tɔm. Pɑ lɑkɩ pɑ kɑwɑlɑɣɑ kɛ́ tǝkeelee ɩsɩɩ Sɔtɔm nyǝ́mɑ pɑɑ ŋmɛsǝɣɩ. Pɑ tɔm wɛ wɑɩyo kɛ́. Mpi tɔ, mpɛ pɑ tɑɣɑnǝnɑ pɑ mɑɣɑmɑɣɑ pɑ wɑkǝlʋɣʋ.

¹⁰Ɩ́ yɔɣɔtɩ sɩ: Pɩɩ cɑɣɑnɑ siɣisilu. Mpi tɔ, ɩ kɑ́ tɔɣɔ ɩ tǝmlɛ kʋlʋlʋm.

¹¹Amɑ ɩsɑɣɑʋ tɔm nɑ́ wɛ wɑɩyo kɛ́, pǝ kɑɑ cɑɣɑnɑ-ɩ. Mpi tɔ, ɩ wɛ mpɑɑʋ ɩsɑɣɑʋ tɑɑ kɛ́. Pɩɩ lɛɛtɩ-ɩ ɩ kʋlɑpǝlɛ.

¹²Ḿpʋ́ɣʋ́ Tɑcɑɑ tɔmɑ sɩ: Piyɑ ŋmɑkǝlǝɣǝnɑ mɑ yǝlɑɑ. Alɑɑ tɔkǝnɑ kɑwulɑɣɑ kɛ pɑ tɔɔ. Pɑ nyʋɣʋ nyǝ́mɑ tolisiɣi-wɛɣɛ nɑ pɑ́ wɑkǝlǝɣɩ mpɑɑʋ ŋku pɑ tǝŋǝɣɩ tɔ.

¹³Tɑcɑɑ kʋlɑɑ sɩ ɩ kɑlǝɣǝnɑ ɩ yǝlɑɑ. Ɩ sǝŋɑɑ sɩ ɩ hʋʋkǝnɑ-wɛ.

¹⁴Tɑcɑɑ yɑɑwɑ nɔnɔɣɔ kɛ yǝlɑɑ nyʋɣʋ nyǝ́mɑ nɑ pɑ ɑwulɑɑ, nɑ ɩ́ tɔ-wɛ sɩ: Mǝ kuntunɑ mɑ tɩɩŋ wei pɑ yɑɑ sɩ lɛsɛŋnɑɑ tɔ. Ɩ́ lɛɛkɑ kʋnyɔntʋnɑɑ nyǝm nɑ ɩ suuli mǝ tɛɛsɩ.

¹⁵Ɩlɛ pepe tɔɔ kɛ́ ɩ́ fɛlǝɣɩ mɑ yǝlɑɑ kɛ nɔɔhɛɛ nɑ ɩ́ lɑkǝnɑ mʋsʋŋ kɛ kʋnyɔntʋnɑɑ? Tɑcɑɑ Pǝ tǝnɑ pǝ tʋ yɔɣɔtǝnɑ mpʋ.

¹⁶Ḿpʋ́ɣʋ́ Tɑcɑɑ tɔmɑ sɩ: Yosɑlɛm ɑlɑɑ mɛ ɩ́ kɛ́ ɩsǝcɑʋ nyǝ́mɑ kɛ́. Ɩ́ tɔŋ nɑ ɩ́ hɔŋ luuŋ. Mǝ ɩsǝpee nyǝnʋɣʋ kʋsǝɣɩ kʋnyɩɩlǝŋ. Ɩ́ tɔŋ nɔɔhǝlɛ nɔɔhǝlɛ nɑ mǝ nɔɔkpɑlɑsɩ wiiki.

¹⁷Tɑcɑɑ kɑ looli Ɩsɛɣɛlɩ ɑlɑɑ mɛ mǝ nyɔɔŋ nɑ pǝ́ yele-mɛɣɛ ŋkoŋkolɑsɩ nɑ pǝ́ tʋ-mɛɣɛ fɛɛlɛ.

¹⁸Kʋyɑkʋ ŋkʋɣʋ Tɑcɑɑ kɑ́ wɔɣɔsɩ mǝ kɑcɔkɑ wontu tǝnɑ. Pǝ kpɑɣɑʋ mǝ nɔɔkpɑlɑsɩ nɑ puluŋ wei ɩ́ suuki nyɔɔŋ tɔ, nɑ mǝ kɑcɔkɑ wontu nti tǝ kootɑɑ ɩsɩɩ ɩsɔtʋ kʋfɑlʋ tɔ.

¹⁹Nɑ ŋkpɑnyɑpǝlɑsɩ, nɑ kpɑsɩ, nɑ tɛkɛntɛnɑɑ,

²⁰nɑ sɑɑlɑsɩ kʋtemɑsɩ, nɑ nɔɔhɛɛ tɑɑ yɔm, nɑ tɑmpɑlɑnɑɑ, nɑ tulɑɑlʋ kpɑlǝpɑnɑɑ, nɑ tǝlɑnɑɑ.

²¹Nɑ mǝ mpee tɔɔ kukuwee, nɑ mɩɩnɑ tɔɔ nyǝnɑ,

²²nɑ ɑcimɑ wontu, nɑ kpɑɩnɑɑ, nɑ tokonɑɑ sɔsɑɑ mpɑ pɑ kentiɣi wɑtʋ tɔ, nɑ sɑɑlɑsɩ nɑ huluŋ,

²³nɑ tokonɑɑ sɔsɑɑ, nɑ toko nyɑɑnɑɑ nɑ nyʋɣʋ sɑɑlɑsɩ, nɑ luɣu tɛɛ nyǝnsɩ.

²⁴Tɑsǝtʋ sɔŋ kɑ́ lɛɛtɩ tulɑɑlʋ lonte, nɑ ŋmǝnɑɣɑ kɛ tɑmpɑlɑ lonte. Nkoŋkolɑɣɑ kɛ nyɔɔsɩ kʋhɔkɑsɩ lonte, nɑ lǝ́yɑ́ɣɑ wontu kɛ ɑcimɑ nyǝntʋ lonte. Ɩ́ nɑŋ fɛɛlɛ nɑ ɩ́ tɑɑ tokuɣu kɛ kɑcɔkɑ lonte.

²⁵Lɑɣɑtɛ kɑ́ tɔɣɔ Yosɑlɛm tɑɑ ɑpɑlɑɑ. Yosɑlɛm yoolɑɑ tɑɑ yoolɑɑ kɑ́ sɩ tǝyoole.

²⁶Wɑɑtʋ ɩnǝɣɩ Siyɔŋ ɩcɑtɛ nɔnɔɔsɩ kɑ́ wii nɑ sɩ́ cɑɣɑ lǝ́yɑ́ɣɑ. Pɩɩ kpiisi nɔnɔɔsɩ, ɩlɛnɑ sɩ́ cɑɣɑ ɑtɛ.