1मिनु नोले यहूदा आ लोक्बपुकी रे लशा, अदुल्लाम सहर ङा हीरा माइश्शो मुर आ बाक्तीक लमाक्त।
2मेकेर बाक्शा, यहूदामी कनानी शुआ नें पाइश्शो मुर आ तमी तवा बाक्त। मिनु मेको चाक्शा, मेको नु बाक्माक्त।
3मिनु मेकोमी कोव़ज कुरशा, तौ का थिमाक्त। मेको आ नें एर वोदा बाक्त।
4मिनु लेंशा कोव़ज कुरशा, अर्को तौ का नु थिमाक्त। मेको आ नें ओनान वोदा बाक्त।
5मेकोमी लेंशा कोव़ज कुरशा, अर्को तौ का नु थिमाक्त। मेको आ नें शेलाह वोदा बाक्त। मेको आल थिची ना यहूदा केसीब माइक्तीकेमी बाक्शो बाक्माक्त।
6मिनु यहूदामी आ ङोंइती जरमेशो तौ एर कली मीश आल का चाक्गा बाक्त। मेको आ नें तामार बाक्माक्त।
7यहूदा आ ङोंइती जरमेशो तौ एरमी परमप्रभु यावे आ ङोंइती मरिम्शो पना पन बाक्माक्त। मिनु परमप्रभु यावेमी मेको कली सदा बाक्त।
8मिनु यहूदामी ओनान कली “रिउम पतीक गेय पा इ लोक्ब आ मीश नु बाक्को। इ लोक्ब कली आल सेलो” दे मदा बाक्त। ब्यवस्था २५:५-१०
9मिनु ओनानमी आ आल मदुम्ब, दे तुइश्शा, आ लोक्ब आ मीश नु बाक्ची ना आ लोक्ब आ आल मसेल्चा, दे आ वांचेर खपीम ताइक्बाक्माक्त।
10मिनु मेको कली मो पशो तशा, परमप्रभु यावेमी मेको कली मदाक्शो बाक्माक्त। मोपतीके मेको कली यो सदा बाक्त।
11मिनु यहूदामी आ चाइमी तामार कली “इ आफ आ खिंम बाक्शा, शेलाह मकोल्म सम्म रिम्दो” दे लेम्दा बाक्त। मारदे हना यहूदामी “मेको नु बाक्शा, आ लोक्ब निक्शी खोदेंशो पा, अर्को यो बेक्बा कों” दे मिम्ता बाक्त। मिनु तामार आ आफ आ खिं लमाक्त।
12मिनु नोले शुआ आ तमी, यहूदा आ मीश बेक्माक्त। मिनु आ रोंका पतीक नुम नोले यहूदा आ भेडा आन कली ऊन ख्रोइक्बपुकी ग्रुम्चा कली आ वारच अदुल्लाम सहर ङा मुर हीरा नु तिम्नाह लमाक्त।
13मिनु मुर कामी तामार कली “इ शिउ आ भेडा ऊन ख्रोइक्थ तिम्नाह कुइब” दे मदा बाक्त। यहोसु १५:५७
14मिनु आ वोंइश बेक्शो वा प्रुइश्शा, आ कुल तेल्लेम खोदेंशो पा सुम्से बाक्त। मिनु मोदेंशो पा तिम्नाह एनाइम लतीक लांमी निश्शा बाक्माक्त। मारदे हना शेलाह कोल्शा यो, यहूदामी मेको नु ग्युंबे मपाइक्ता बाक्त।
15मिनु यहूदाम मेको कली लांम तशा “तेल्लेम का बाक्ब” दे मिम्ता बाक्त। मारदे हना आ कुल सुमा बाक्त।
16मिनु मेको कली “आं कली ओव़चा गेयी” देंमाक्त। मारदे हना आ चाइमी बाक्ब, दे मतुइक्ता बाक्त। मिनु तामारमी “गे गो नु बाक्शो ङा आं कली मार गेनीनी?” दे हिल्लो पवा बाक्त। लेवी १८:१५
17मिनु “गो आं गोठ ङा पाठा का सोइक्नन” देंमाक्त। मिनु तामारमी “मेको मसोइक्तीनी सम्म मार गेनीनी?” दे हिल्लो पवा बाक्त।
18मिनु यहूदामी “मार पुंइनेवे?” दे हिल्लो पवा बाक्त। मिनु मेकोमी “इन छाप, इन डोरी नु इन गुइ ङा कोक्के गेचा नङ” दे मदा बाक्त। मिनु मेको नेल्ल गेशा नोले मेको नु बाक्माक्त। मिनु कोव़ज कुरा बाक्त।
19मिनु तामार बोक्शा लशा, आ वोंइश बेक्शो ङा वा लेंशा फेक्से बाक्त।
20मिनु यहूदामी मेको पाठा गेचा नु आ छाप, डोरी नु कोक्के लेत्चा कली आ अदुल्लाम ङा आ वारच कली सोइक्ता बाक्त। मेकोमी मेको मीश मुर कली मथिदा बाक्त।
21मिनु मेकोमी मेकेर ङा मुर आन कली “एकेर एनाइम ङा लांम बाक्ब तेल्लेम ते लमे?” दे हिल्लो पामी बाक्त। मिनु मेकोपुकीमी “एकेर तेल्लेम मबाक्ब” देंमा बाक्त।
22मिनु मेको यहूदा आ बाक्तीक लेश्शा “मेको कली थिन्ने मचबु। मेकेर ङा मुरपुकीमी ‘एकेर तेल्लेम मबाक्ब’ देंतेक्म” दे यहूदा कली शेंदा बाक्त।
23मिनु यहूदामी “मेकोन बाक्ल। गो मुने मदोक्ङल। गो पाठा का सोइक्ताक्ङ। गे मेको कली मथिदी, मार पचा ङा?” देंमाक्त।
24मिनु महिना सां नोले मुर कामी यहूदा कली “इ चाइमी तामारम तेल्लेम पाप्तु। तेल्लेम पा कोव़ज कुरशो बाक्त” देंमाक्त। मिनु यहूदामी “मेको चोचा कली चाक्कीन” दे लोव़ लेत्ता बाक्त।
25मिनु तामार कली चाक्गमेनु, मेकोमी आ शिउ कली “एको छाप, डोरी नु कोक्के सु के बाक्मे मेको रे पा कोव़ज कुरशो नङ। एको छाप, डोरी नु कोक्के सु के बाक्मे, कोव़ङीन” दे लोव़ कुरब सोइक्ता बाक्त।
26मिनु यहूदा मेको छाप, डोरी नु कोक्के तुइश्शा, मेकोमी “आं क्येङा मेको ठीक पाइब बाक्त। मारदे हना गो मेको कली आं तौ शेलाह मगेङ” देंमाक्त। तन्न तामार कली मचाक्गा बाक्त।
27मिनु आल थिचा रोइ पची ना, आ कोव़जम जौंले आल बाक्सा बाक्त।
28मिनु आल थिचावानु, आल कामी आ गुइ ग्रुंइदा बाक्त। मिनु आ वारच पाइब मीश मुरुमी लल श्येले पाइश्शा “एको ङोंइती ङा बाक्ब” देंमाक्त।
29मिनु मेको आ गुइ ओंइशा, आ लोक्ब जरमेसे बाक्त। मिनु मेको वारच पाइबमी “इ ग्रूची ना गिश ठेयब गार सेली” दे मदा बाक्त। मोपतीके आ नें पेरेस वोदा बाक्त। पेरेस आ अर्थ खाक्शो गार बाक्ब।रूथ ४:१८; मत्ती १:३
30मिनु नोले लल श्येले पाइश्शो आल जरमेसे बाक्त। मिनु मेको आ नें जेराह वोदा बाक्त।
