1Eme dameŋ ira Juda e ɋafâcne jaŋe behec‐jopa ra Adulam hae mâreŋko ŋic moc ʒâŋene Hira erao juwec.
2Erâ ira juhuc Kanaaŋ ŋic moc, ʒâŋene Sua, ere otâ honerâ ŋokac rorâ ehec juwec.
3Eme ŋokac e motec kiweckerâ rorâ ʒâŋene Ero muwec.
4Juku motec mocwâc kiweckerâ rowec, ere ʒâŋe Onaŋ muwec.
5Izi motec moc kiweckerâ rowec, ere ʒâŋe Sela muwec, motec e ine Keʒibi haeo juhuc rowec.
6Eme Juda e juku mârâc ŋokâ‐ticne Ero ŋokac moc râcnewec, ʒâŋene Tama.
7Wofuŋzi ine mârâc motec ere maname mi sâckewecte mume hâmowec.
8Iŋuc fuame Judazi Onaŋ ʒiŋuc âzâcnewec: “Go qozigerao razemec, erâ qozi jaŋere ɋâric bâbâfuare dâŋ mukicne, i hâcne reŋkehuc hahacgere biŋe ɋâric bâfuazemec.”
9Onaŋzi ine ʒiŋuc manawec: No ɋâric bâfuape nore biŋe mi eniŋmu. Iŋuc muhuc hahac‐ticnere ɋâric moc mi bâfuaocte manasuhuc ŋokactao rawec sâc wie gorewac‐ticne mâc mâreŋko hoŋkeme wahawec.
10Iŋuc eme Wofuŋzi mana sâqorerâ mume e wâc hâmowec.
11Eme Judazi joŋao‐ticne Tama ʒiŋuc âzâcnewec: “Go mamacgere ficko ra hozec jaha juhaŋtec ŋokâ‐nane Selazi sokazejec.” I ʒiŋuc manahuc muwec: Sela e hahac jahec‐ticne hâmopic iŋuc jaha hâmozackohec. Eme Tama e ra mamac‐ticnere ficko juhuc juwec.
12Ehame juku ʒâhec Suare otâ, Juda ŋonâŋ‐ticne hâcne, e hâmowec. Eme ki mamakuc dameŋ tarame Judazi âgo‐ticne Hira, Adulam haeonec ehec Timina mâreŋko, lamafâc‐ticne jaŋere kanʒaŋ bâtâcnembiŋko rapic.
13Ehame Tama dâŋ ʒiŋuc âzâcnembiŋ: “Manakic, joŋaoge e lamafâcne jaŋere kanʒaŋ bâtâcneocte Timina hae mâreŋko fekac.”
14Iŋuc manarâ rurufa‐ticne hetararâ qâruruzi ʒâŋe maine foŋkewec. Erâ ra Timina hatao hae moc ŋewec, ʒâŋene Enaim, hae irec mendâŋko waha ŋewec. I Selazi soka tarame ere ŋonâŋ juocte mi râcnembiŋte iŋuc ewec.
15Eme Judazi fisi honerâ ere maname boe sau ŋokac tinac ewec, e ʒâŋe maine foŋkewec irec.
16Eme hata kizurâ erao ra muwec: “No gohec fopemurâ mana‐narec.” E joŋao‐ticnezi ŋewec i mi manahuc dâŋ i muwec hâcne. Eki muwec: “Nohec focmurâ mana‐garepe wemo wiac mo narecmu?”
17Mume muwec: “No noniŋ motecne moc râe‐garepe wareocmu.” Mume muwec: “Irec kifac wiac moc naretec bajuhape ware fisizejec.”
18Eki muwec: “Wemo kifac mo garepemurâ mukic?” Ŋokaczi muwec: “Meo fefege maqâreŋhec â mucge â gunuge meo badomakic i narec.” Eme wiac muwec sâc râcnerâ ehec fowec.
19Eme kiwechec ewec. Izi faharerâ ra qâruru hetararâ rurufa‐ticne mocwâc heme huwec.
20Eme Judazi âgo‐ticne, Adulam haeonec, e ŋokactaonec kifac wiac rorâ bârisiecneocte noniŋ motecne râcnehuc soreme rawec. Eki ine ra ŋokac basawec.
21Ehuc ŋic mu wioc ejarehuc muwec: “Boe sau ŋokac Enaim hatao ŋewec e wena?” Jaŋe mumbiŋ: “Boe sau ŋokac moczi ʒira moc mi wareme honembeŋ.”
22Eme mocwâc Judarao risie âzâcnewec: “No ŋokac e mi bâfuapo, ehame hae irec rune jaŋe ʒiŋuc nazambiŋ: Boe sau ŋokac moczi moc ʒira ware mi juwec.”
23Eme Judazi muwec: “Dâŋnâŋec fuazacte wiac i sifu focneoc. No noniŋ motecne râepe rawec, eme goki mi bâfuameŋ.”
24Eme mosa jahec â moc tarame Juda biŋedâŋ ʒiŋuc âzâcnembiŋ: “Joŋaoge sasec gie baku ʒi kiwechec jukac.” Eme Judazi muwec: “E jowa warepie ʒocte biŋe ezejec.”
25Eme jowapie rahuc joŋao‐ticnerao dâŋ ʒiŋuc râeme rawec: “Wiac ʒirec rune jukac eki bacnume kiwechec epo. Irec go honec, meo fefe maqâreŋhec â muc â gunu wiac i more?”
26Eme Juda e wiac i hone dendeŋnehuc ʒâŋitarâ muwec: “E dâŋ jâmbomac mukac, wiac i nore sasawa. No wemocte mutuc erâ ŋokâ‐nane Sela erao mi râepo.” Iŋuc murâ ŋokac ehec mocwâc mi juwec.
27Eme motec roocte dameŋne maickeme mi funʒuŋ fâri rocjofazejec i!
28Motec rozo ehame qanaŋ mocte mezi wahawec. Wahame gozi bapa ŋokaczi biac rorâ muc bâbâroŋ bândeŋnewec. I ʒiŋuc muhuc ewec: Eki hâcne bâbâni fuawec.
29Kogoc eki ine meticne mocwâc fâreme fehame ɋanezi fuawec. Eme gozi bapa ŋokaczi muwec: “Hâc, go hawec sâko mo iŋucne bâfuarâ fuamec?” Iŋuc mume ʒâŋe‐ticne Pereze mumbiŋ.
30Eme ʒâhec hahac‐ticne menao muc bâbâroŋ bândeŋnekicne eki fuawec. Ere ʒâŋe ine Sera mumbiŋ.
